ລິ້ງ ສຳຫລັບເຂົ້າຫາ

ທ່ານ​ເຫ​ວິ້ນ​ເຈຍ​ບາ​ວ ນາຍົກລັດຖະມຸນຕີຈີນ ຕໍາ​ໜິຕິຕຽນ​ພວກ​ສະມາຊິກລັດຖະ​ສະພາ​ສະຫະລັດ​ວ່າ ຫລິ້ນ​ການ​ເມືອງກັບເລື້ອງ​ຄວາມບໍ່​ກໍ້າ​ເກິ່ງ​ກັນ​ທາງ​ດ້ານ​ການ​ຄ້າ​ລະຫວ່າງ​ສະຫະລັດ​ກັບ​ຈີນ​.

ທ່ານ​ເຫ​ວິ້ນ​ເຈຍ​ບາ​ວສະ​ແດງ​ຄວາມ​ເຫັນດັ່ງກ່າວ​ນີ້ ​ໃນ​ການ​ໃຫ້​ສໍາພາດ ຊຶ່ງ​ກໍານົດ​ຈະນໍາ​ອອກ​ຖ່າຍ​ທອດ​ທາງ​ຕາໜ່າງ​ໂທລະພາບ CNN ​ໃນ​ວັນ​ອາທິດ​ມື້​ນີ້. ການ​ສໍາພາດ​ດັ່ງ ກ່າວ​ມີ​ຂຶ້ນ​ໃນ​ວັນ​ທີ 23 ກັນຍາ​ຜ່ານ​ມາ​ນີ້ ​ເຊິ່ງທ່ານ​ເຫ​ວິ້ນ​ ເຈຍ​ບາ​ວ​ໄດ້​ເດີນທາງ​ມາ​ສະຫະລັດ​ເພື່ອ​ເຂົ້າ​ຮ່ວມ​ໃນ​ກອງ​ປະຊຸມສະມັດຊາ​ໃຫຍ່​ສະຫະ​ປະຊາ​ຊາດ​.

ທ່ານ​ເຫ​ວິ້ນກ່າວ​ວ່າ ພວກ​ສະມາຊິກລັດຖະ​ສະພາ​ສະຫະລັດ​ບາງ​ຄົນ ບໍ່​ຮູ້ຈັກ​ຫຍັງ​ຫລາຍ​ພໍ​ກ່ຽວ​ກັບ​ຈີນ. ​ທ່ານ​ຍັງ​ເວົ້າ​ຕື່ມ​ວ່າ ຄວາມ​ບໍ່​ກໍ້າ​ເກິ່ງ​ກັນ​ທາງ​ດ້ານ​ການ​ຄ້າ​ຈະ​ບໍ່​ສາມາດ​ແກ້​ໄຂ​ໄດ້​ ໂດຍ​ການຕັດ​ການ​ສັ່ງ​ຊື້​ສິນຄ້າ​ຈາກ​ຈີນ​ລົງ​ນັ້ນ.

ໃນ​ວັນ​ພຸດ​ຜ່ານ​ມາ​ນີ້ ສະພາ​ຕໍ່າ​ສະຫະລັດ​ໄດ້​ຮັບ​ຜ່ານ​ຮ່າງ​ກົດໝາຍ​ສະບັບນຶ່ງ​ ອະນຸມັດ​ໃຫ້​ສະຫະລັດ​ເກັບພາສີພວກ​ສິນຄ້າ​ທີ່ສັ່ງ​ເຂົ້າ​ມາ​ຈາກພວກ​ປະ​ເທດ​ທີ່​ມີ​ຕັ້ງ​ລາຄາເງິນຕາ​ຂອງ​ຕົນຕໍ່າ​ກ່ວາ​ທ້ອງ​ຕະຫລາດນັ້ນ.

ກະຊວງ​ການ​ຕ່າງປະ​ເທດ​ຈີນ​ໄດ້​ຕອບ​ໂຕ້​ ຕໍ່​ການ​ຮັບ​ຜ່ານ​ຮ່າງ​ຍັດຕິ​ດັ່ງກ່າວ​ດ້ວຍ​ອອກ​ຄໍາ​ເຕືອນ​ວ່າ ການ​ກົດ​ດັນໂດຍ​ລັດຖະ​ສະພາ​ສະຫະລັດ​ເພື່ອ​ບັງຄັບ​ໃຫ້​ຈີ​ນປັບ​ຄ່າ​ເງິນຕາ​ຂອງ​ຕົນ​ນັ້ນ ຈະສົ່ງ​ຜົນ​ກະທົບ​ຢ່າງ​ຮ້າຍ​ແຮງ​ຕໍ່​ສາຍ​ພົວພັນສອງ​ຝ່າຍ.

XS
SM
MD
LG