ປະທານປະເທດຈີນ ທ່ານສີ ຈິ້ນຜິງ ໄດ້ເປັນເຈົ້າພາບຈັດການສົນທະນາທະວີພາຄີແບບກວມລວມ ໃນວັນພຸດວານນີ້ ກັບນາຍົກລັດຖະມົນຕີຂອງປາກິສຖານ ທ່ານເຊບາສ ຊາຣິຟ, ແລະໄດ້ “ສະແດງຄວາມກັງວົນຂອງທ່ານ ຢ່າງໃຫຍ່ຫຼວງ” ກ່ຽວກັບຄວາມປອດໄພຂອງປະຊາຊົນຊາວຈີນ ທີ່ອາໄສມາເປັນເວລາດົນນານ ໃນປະເທດພັນທະມິດເອເຊຍໃຕ້ແຫ່ງນີ້.
ທ່ານຊາຣີຟ ໄດ້ເດີນທາງໄປຢ້ຽມຢາມນະຄອນຫຼວງປັກກິ່ງເປັນຄັ້ງທໍາອິດ ນັບຕັ້ງແຕ່ທ່ານໄດ້ເຂົ້າດໍາລົງຕໍາແໜ່ງ ໃນເດືອນເມສາທີ່ຜ່ານມາ. ທ່ານເປັນຜູ້ນໍາຕ່າງປະເທດຄົນທໍາອິດ ທີ່ເດີນທາງໄປພົບກັບ ທ່ານສີ ລຸນຫຼັງການເຂົ້າຮັບຕໍາ ແໜ່ງທີ່ເປັນປະຫວັດການຂອງທ່ານສີ ສະໄໝທີສາມເມື່ອເດືອນຕຸລາທີ່ຜ່ານມາ.
ເຈົ້າໜ້າທີ່ກ່າວວ່າ ທ່ານສີ ແລະທ່ານຊາຣີຟ ໄດ້ພາກັນກວດກາຄືນ ກ່ຽວກັບການຮ່ວມມືທະວີພາຄີ, ເຊິ່ງຢືນຢັນເຖິງຄວາມມຸ່ງໝັ້ນຂອງພວກທ່ານກ່ຽວກັບເສັ້ນທາງເສດຖະກິດ ລະຫວ່າງຈີນ ແລະປາກິສຖານຫຼື CPEC, ເຊິ່ງຈີນໄດ້ອອກທຶນຫຼາຍພັນລ້ານໂດລາ ເຂົ້າໃນໂຄງການທະວີພາຄີ ເຊິ່ງໄດ້ຈັດສັນອອກມາເພື່ອຊ່ວຍຟື້ນຟູ ແລະຂະຫຍາຍລະບົບເສດຖະກິດຂອງອິດສະລາມາບັດ.
ກະຊວງການຕ່າງປະເທດຂອງຈີນ ໄດ້ກ່າວຢູ່ໃນຖະແຫຼງການວ່າ “ປະທານປະເທດສີ ໄດ້ສະແດງຄວາມກັງວົນເປັນຢ່າງສູງ ກ່ຽວກັບຄວາມປອດໄພຂອງປະ ຊາຊົນຊາວຈີນ ທີ່ອາໄສຢູ່ໃນປາກິສຖານ, ແລະໄດ້ສະແດງຄວາມຫວັງຂອງທ່ານອອກມາວ່າ ປາກິສຖານຈະສະໜອງສະພາບແວດລ້ອມ ທີ່ໜ້າເຊື່ອຖືແລະມີຄວາມປອດໄພໃຫ້ແກ່ສະຖາບັນ ແລະບັນດາບຸກຄະລາກອນຊາວຈີນທີ່ປະຕິ ບັດງານ ຢູ່ໃນໂຄງການຮ່ວມມື ຢູ່ທີ່ນັ້ນ.”
