ອົງການຂ່າວທາງການຂອງຈີນ ເວົ້າວ່າ ພວກປະທ້ວງໄດ້ພາກັນກາງເຕັ້ນພັກຢູ່ຕໍ່ໜ້າໂຮງ ງານຜະລິດແຜ່ນກອງແສງຕາເວັນແຫ່ງນຶ່ງ ຢູ່ພາກຕາເວັນອອກຂອງຈີນ ມາໄດ້ດົນກວ່າ
ສາມມື້ແລ້ວ. ພວກເຂົາເຈົ້າກ່າວຫາວ່າ ໂຮງງານດັ່ງກ່າວແຜ່ຜາຍມົນລະມິດທີ່ພາໃຫ້ເປັນ
ໂຣກມະເຮັງ.
ອົງການຂ່າວຊີນຫົວຂອງທາງການຈີນກ່າວໃນວັນອາທິດມື້ນີ້ວ່າ ພວກປະທ້ວງປະມານ 500 ຄົນໄດ້ເຕົ້າໂຮມກັນ ຢູ່ເມືອງ Haining ແຂວງ Zhejiang ເມື່ອວັນພະຫັດ ເພື່ອທວງໃຫ້ ລັດຖະບານອະທິບາຍເຖິງການຕາຍ ຂອງປາຈໍານວນຫລວງຫລາຍ ຢູ່ແມ່ນໍ້າໃກ້ໂຮງ ງານດັ່ງກ່າວ.
ນອກນີ້ແລ້ວ ພວກຊາວບ້ານກ່າວວ່າ ມົນລະພິດຈາກໂຮງງານອຸດສາຫະກໍາໄດ້ພາໃຫ້ ພວກຊາວບ້ານ Hongxiao ໃນເມືອງ Haining ນັ້ນເປັນມະເຮັງຢ່າງໜ້ອຍ 31 ຄົນແລ້ວ.
ຂ່າວຊິນຫົວກ່າວວ່າ ພວກປະທ້ວງໄດ້ບຸກເຂົ້າໄປໃນໂຮງງານຜະລິດແຜ່ນ ກອງແສງຕາເວັນ Jinko ແລະພາກັນທໍາລາຍເຄື່ອງຂອງໃນຫ້ອງການ ແລະຂວໍ້າລົດຫລາຍຄັນ ກ່ອນຖືກຕໍາ ຫລວດບັງຄັບໃຫ້ລ່າຖອຍອອກໄປ.
ເວບໄຊ້ຂອງບໍລິສັດກ່າວວ່າ ໂຮງງານ Jinko Solar ທີ່ລົງບັນຊີຢູ່ໃນ ຕະຫລາດຮຸ້ນ New York Stock Exchange ນັ້ນ ວ່າຈ້າງຄົນງານຫລາຍກວ່າ 10,000 ຄົນ ເຮັດວຽກຢູ່ ໂຮງງານຫລາຍໆແຫ່ງ ໃນແຂວງ Jiangxi ແລະແຂວງ Zhejiang.
