ລິ້ງ ສຳຫລັບເຂົ້າຫາ

ຈີນປິດໂຮງງານເຄມີນໍ້າມັນ ທີ່ເມືອງທ່າ ດາລຽນ

  • ທອງປານ ເທບວົງສາ

ພວກຊາວເມືອງ Dalian ພາກັນປະທ້ວງ ເມື່ອວັນທີ່ 14 ເດືອນສິງຫານີ້ ເພື່ອທວງໃຫ້ລັດຖະບານຍ້າຍ ໂຮງງານຜະລິດເຄມີນໍ໊າ ທີ່ເປັນອັນຕະລາຍນັ້ນ ອອກຈາກຕົວເມືອງ

ສື່ມວນຊົນລັດຂອງຈີນກ່າວ​ໃນວັນອາທິດມື້ນີ້ວ່າ ພວກເຈົ້າໜ້າທີ່ຈີນໄດ້ອອກຄໍາສັ່ງໃຫ້ປິດ
ໂຮງງານເຄມີນໍ້າມັນ ທີ່ເມືອງທ່າ Dalian ທາງພາກຕາເວັນອອກສຽງເໜືອຂອງຈີນໂດຍ
ທັນທີ ຫລັງຈາກປະຊາຊົນຫລາຍພັນຄົນໄດ້​ໄປເຕົ້າໂຮມກັນຢູ່ນອກຕຶກ​ໂຮງການຂອງລັດ
ຖະບານ​ໃນເມືອງດັ່ງກ່າວ ເພື່ອທວງໃຫ້ລັດຖະບານຍ້າຍໂຮງງານຜະລິດເຄມີ​ແຫ່ງນີ້.

ອົງການຂ່າວຊິນຫົວຂອງທາງການຈີນ ກ່າວວ່າ ນອກ​ນັ້ນ ພວກເຈົ້າໜ້າທີ່ ຍັງໄດ້ຮັບປາກ ທີ່ຈະຍ້າຍໂຮງງານຜະລິດເຄມີ Fujia ອອກ​ໄປຈາກຕົວເມືອງ​ນໍາ.

ຂ່າວຊິນຫົວ ເວົ້າວ່າ ປະຊາຊົນປະມານ 12,000 ຄົນ ໄດ້​ໄປເຕົ້າໂຮມກັນເພື່ອທໍາການ
ປະທ້ວງກ່ອນໜ້ານັ້ນ ໃນມື້ນີ້ ແລະໄດ້ເກີດມີການຕໍ່ສູ້ກັນເລັກ​ນ້ອຍລະຫວ່າງຝຸງຊົນ ແລະ ຕໍາຫລວດປາບຈະລາຈົນຫລາຍຮ້ອຍຄົນ ແຕ່ບໍ່ມີລາຍງານວ່າ ມີໃຜໄດ້ຮັບບາດເຈັບ.

ການປະທ້ວງດັ່ງກ່າວ ໄດ້ເລິ່ມຂຶ້ນຈາກຄວາມຢ້ານກົວທີ່​ເພີ່ມ​ທະວີ​ຂຶ້ນ​ເລື້ອຍໆກ່ຽວ​ກັບຄວາມ ປອດໄພຂອງໂຮງງານເຄມີດັ່ງກ່າວ ທີ່ຜະລິດເຄມີ paraxylene ຄືສານແຫລວທີ່ພາໃຫ້
ເປັນມະເຮັງ ສໍາລັບໃຊ້ຜະລິດຟິມ ແລະແຜ່ນຜ້າພໍລີແອສເຕີ ນັ້ນ.

ເມື່ອວັນຈັນຜ່ານມາ ພວກຊາວເມືອງທີ່ອາໃສຢູ່​ໃກ້ໂຮງງານເຄມີດັ່ງກ່າວ ຕ້ອງໄດ້ພາກັນຍ້າຍ
ໜີອອກຈາກບ້ານ ຫລັງຈາກຄື້ນທະ​ເລ​ທີ່​ເກີດ​ຈາກພາຍຸ​ເຂດຮ້ອນມຸ່ຍຟ້າ ໄດ້ທໍາລາຍເຂຶ່ອນ ກັ້ນນໍ້າທີ່ປ້ອງກັນບໍ່ໃຫ້ນໍ້າຖ້ວມໂຮງງານເຄມີນັ້ນ.

XS
SM
MD
LG