ອົງການນິລະໂທດກໍາສາກົນຫລື Amnesty International ເວົ້າວ່າ ຈີນຍັງສືບຕໍ່ປິດປາກ
ປິດສຽງຊົນເຜົ່າວີເກີ (UIGURS) ທີ່ໄດ້ເວົ້າເຖິງເລື້ອງລະເມີດສິດທິມະນຸດທີ່ຖືກກ່າວຫາວ່າ
ໄດ້ເກີດຂຶ້ນເມື່ອສາມປີກ່ອນໃນໄລຍະທີ່ມີການກໍ່ການຈະລາຈົນຮ້າຍແຮງໃນແຂວງຊິນຈຽງ ໃນພາກຕາເວັນຕົກຂອງຈີນ.
ກຸ່ມປົກປ້ອງສິດທິມະນຸດດັ່ງກ່າວເວົ້າວ່າ ມີຊາວວີເກີຈໍານວນຫຼາຍສິບຄົນ ຖ້າຫາກບໍ່ແມ່ນ
ຫລາຍຮ້ອຍຄົນ ຍັງຖືກກັກຂັງຢູ່ ລຸນຫລັງທີ່ໄດ້ຫາຍສາບສູນໄປ ຫລັງຈາກເກີດການຈະລາ
ຈົນ ທີ່ເຮັດໃຫ້ເກືອບ 200 ຄົນເສຍຊີວິດນັ້ນ.
ຢູ່ໃນບົດລາຍງານທີ່ນໍາອອກເຜີຍແຜ່ໃນວັນພະຫັດມື້ນີ້, ອົງການນິລະໂທດກໍາເວົ້າວ່າ ເຈົ້າ
ໜ້າທີ່ຈີນຂົ່ມຂູ່ ແລະຂູ່ເຂັນພວກທີ່ຊອກຮູ້ຂໍ້ມູນວ່າພີ່ນ້ອງຂອງຕົນ ຢູ່ໃສ.
ຄວາມວຸ້ນວາຍ ທີ່ເລີ້ມຕົ້ນຂຶ້ນໃນເມືອງອູຣຸມຈີ, ນະຄອນຫລວງຂອງຂົງເຂດນັ້ນ ໃນເດືອນກໍ
ລະກົດປີ 2009 ແມ່ນຕາມມາດ້ວຍການຈັບກຸມ ແລະການຟ້ອງຮ້ອງ ທີ່ກຸ່ມປົກປ້ອງສິດທິ
ມະນຸດກຸ່ມນີ້ເອີ້ນວ່າ ໄດ້ດຳເນີນໄປໂດຍພະລະການຕະຫຼອດ ທັງການຄວບຄຸມການຮັກສາ
ຄວາມສະຫງົບຢ່າງເຄັ່ງຄັດຢູ່ໃນຂົງເຂດດັ່ງກ່າວ.
ນັບແຕ່ນັ້ນມາ ຈີນໄດ້ເພີ້ມງົບປະມານຮັກສາຄວາມສະຫງົບໃນເຂດດັ່ງກ່າວຂຶ້ນສອງທົບແລະ
ຕິດຕັ້ງກ້ອງຖ່າຍຮູບວົງຈອນປິດ 40 ພັນໜ່ວຍ ຊຶ່ງເປັນການດໍາ ເນີນຄວາມພະຍາຍາມເພື່ອ
ຮັດແໜ້ນການຄວບຄຸມເພີ່ມຂຶ້ນຕໍ່ເຂດປົກຄອງຕົນເອງ ທີ່ອຸດົມສົມບູນໄປດ້ວຍຊັບພະຍາ
ກອນທໍາມະຊາດແຫ່ງນັ້ນ. ປະມານຫຼາຍກວ່າ 20 ຄົນໄດ້ຖືກຕັດສິນໂທດປະຫານຊີວິດ ຫລື
ປະຫານຊີວິດໄປແລ້ວ ແລະອີກຈຳນວນນຶ່ງໄດ້ຮັບໂທດຈໍາຄຸກ ເປັນເວລາດົນນານ.
