ລິ້ງ ສຳຫລັບເຂົ້າຫາ

ຄື້ນທະເລ​ໃຫຍ່ໆ ແລະຝົນຕົກໜັກ ໄດ້ປະທະຂົງເຂດຕາເວັນອອກຂອງຈີນ ໃນວັນອາທິດມື້ນີ້ ໃນຂະນະທີ່ລົມພາຍຸໃຕ້ຝຸ່ນມຸ່ຍຟ້າພັດ​ເລາະ​ແຄມຝັ່ງຂຶ້ນ​ເໜືອ​ໄປດ້ວຍລົມແຮງສູງເຖິງ 178 ກິໂລແມັດຕໍ່ຊົ່ວໂມງ.

ໄດ້​ມີ​ການຄາດໝາຍກັນໃນເບື້ອງຕົ້ນວ່າ ລົມພາຍຸດັ່ງກ່າວຈະພັດເຂົ້າຝັ່ງ ​ໃກ້ໆເມືອງຊຽງໄຮ້ ​ໃນຕອນບ່າຍວັນເສົາວານນີ້ ແຕ່ກົມອຸຕຸນິຍົມກາງຂອງຈີນກ່າວວ່າ ພາຍຸມຸ່ຍຟ້າໄດ້ປ່ຽນທິດ ທາງ​ແລະ​ກໍາລັງພັດຂຶ້ນ​ເໜືອ ໄປຍັງ​ແຂວງ​ Shandong ແລະຄາດວ່າຈະພັດ​ຢູ່​ຕາມ​ແຄມ ຝັ່ງ ໃນ​ເວລາສອງມື້ຕໍ່ໜ້ານີ້.

ໃນການຕຽມການຮັບມືກັບພາຍຸໃຕ້ຝຸ່ນມຸ່ຍຟ້ານັ້ນ ພວກເຈົ້າໜ້າທີ່ຈີນໄດ້ລົບລ້າງຫລາຍກວ່າ 100 ຖ້ຽວບິນໃນຂົງເຂດ ແລະກໍາປັ່ນຫລາຍພັນລໍາຕາມຝັ່ງທະເລກໍ້າຕາເວັນອອກ ໄດ້ຖືກ ຮຽກໃຫ້ກັບຄືນເຂົ້າຝັ່ງ.

ພວກເຈົ້າໜ້າທີ່ກ່າວວ່າ ພວກເຂົາເຈົ້າ​ໄດ້ກຽມທີ່ຈະຢຸດ ຫລື​ເລື່ອນເວລາການບໍລິການ
ລົດໄຟຄວາມໄວສູງນັ້ນ ແລ້ວ​ແຕ່​ວ່າພາຍຸ​ລູກ​ນີ້​ຈະຮຸນແຮງສໍ່າ​ໃດ ພວກເຈົ້າໜ້າທີ່ສຸກ ເສີນໄດ້ຕຽມສະບຽງບັນເທົາສຸກເສີນຕ່າງໆໄວ້ແລ້ວ ແລະ ຕຽມສໍາລັບ​ການຍົກຍ້າຍ​
ປະຊາຊົນນໍາ.

ເຖິງແມ່ນເມືອງຊຽງໄຮ້​ໄດ້​ລອດພົ້ນຈາກຄວາມແຮງເຕັມທີ່ຂອງລົມ ແລະຝົນຕົກໜັກ
ຂອງພາຍຸມຸ່ຍຟ້າກໍຕາມ ​ແຕ່​ມັນກໍຍັງພັດທໍາລາຍປ້າຍໂຄສະນາ ຕັດກະແສໄຟຟ້າຢູ່ໃນ ບາງເຂດ ແລະບັງຄັບໃຫ້ທາງ​ການ​ຕ້ອງ​ໄດ້​ອັດຂົວສໍາຄັນສອງແຫ່ງ ທີ່ເຊື່ອມໂຍງແຜ່ນດິນໃຫຍ່
ກັບພວກໝູ່ເກາະ ທີ່ຢູ່ໄກຝັ່ງອອກ​ໄປ.

ພາຍຸໃຕ້ຝຸ່ນມຸ່ຍຟ້າ ໄດ້ເອົາຊີວິດຜູ້ຄົນໄປແລ້ວ 4 ຄົນ ເວລາພັດຜ່ານຂົງເຂດພາກເໜືອ ແລະພາກກາງຂອງຟິລິບປິນເມື່ອອາທິດ​ແລ້ວ​ນີ້ ແລະປະທະເກາະໂອກິນາວາຂອງຍີ່ປຸ່ນ
​ໃນ​ວັນ​ສຸກ​ຜ່ານ​ມາ ດ້ວຍຝົນຕົກໜັກ ແລະລົມແຮງ ທີ່ຍັງຜົນໃຫ້ມີຜູ້ໄດ້ຮັບບາດເຈັບຫລາຍ
ຄົນ ແຕ່ບໍ່ມີຜູ້ເສຍຊີວິດ.

XS
SM
MD
LG