ພວກນັກຊ່ຽວຊານດ້ານຄວາມປອດໄພ ກ່ຽວກັບຕາໜ່າງຄອມພິວເຕີ້ ກ່າວວ່າ ເມື່ອບໍ່ມາ ນີ້ ພວກເຈາະຂໍ້ມູນຫຼືແຮັກເກີ້ຈີນເລີ້ມທຳການໂຈມຕີທາງຄອມພິວເຕີ້ທີ່ແນເປົ້າໝາຍໃສ່ພວກທີ່ໄປຮ່ວມກອງປະຊຸມ ອຸດສາຫະກຳປ້ອງກັນປະເທດ ລະຫວ່າງ ສະຫະລັດກັບໄຕ້ຫວັນ.
ເຈົ້າໜ້າທີ່ກ່າວວ່າ ການພະຍາຍາມໂຈມຕີດັ່ງກ່າວ ແມ່ນມີຂຶ້ນໃນຕົ້ນເດືອນນີ້ທີ່ກອງປະ ຊຸມ ຊຶ່ງຈັດຂຶ້ນທີ່ເມືອງ Williamsburg ລັດເວີຈີເນຍ ທີ່ໄປຮ່ວມໂດຍ ບັນດາເຈົ້າໜ້າທີ່ປ້ອງກັນປະເທດ ຜູ້ຕາງໜ້າຂອງອຸດສາຫະກຳທາງທະຫານ ພວກນັກຊ່ຽວຊານແລະນັກ ປາດດ້ານຄວາມປອດໄພ.
ທ່ານ Steven Adair ຜູ້ກໍ່ຕັ້ງ Volexity ຊຶ່ງເປັນບໍລິສັດຕາໜ່າງຄວາມປອດໄພ ໃນເຂດນະຄອນຫຼວງວໍຊິງຕັນ ກ່າວວ່າ ການພະຍາຍາມໂຈມຕີເຈາະຂໍ້ມູນນີ້ ແມ່ນອີງຕາມການໃຊ້ອີແມລເພື່ອເກັບກຳຂໍ້ມູນຂອງຈີນໂດຍຂໍໃຫ້ຜູ້ຮັບເປີດເຜີຍ ຂໍ້ມູນຂອງຕົນໃຫ້ຊາບ. ອີແມລນີ້ບັນຈຸຊອບແວທີ່ມີຈຸດປະສົງຮ້າຍທີ່ອາດຈະອະນຸຍາດໃຫ້ພວກແຮັກເກີ້ເຂົ້າໄປໃນທຸກລະບົບ ທີ່ເຊື່ອມຕໍ່ກັບຕາໜ່າງຄອມພິວເຕີ້ໄດ້.
ຍານາງ Lotta Danielson ຮອງປະທານສະມາຄົມທຸລະກິດສະຫະລັດໄຕ້ຫວັນຊຶ່ງເປັນເຈົ້າພາບ ຈັດກອງປະຊຸມໃນຄັ້ງນີ້ ກ່າວຕໍ່ວີໂອເອວ່າ ສະມາຄົມ ໄດ້ຕົກເປັນເປົ້າໃນການໂຈມຕີ ມາຫລາຍປີແລ້ວ ແລະໄດ້ເຝົ້າລະວັງກ່ຽວກັບການໂຈມຕີເຈາະຂໍ້ມູນມາຕະຫຼອດ. ຍານາງກ່າວວ່າ ລາວໄດ້ແຈ້ງໃນທັນທີໃຫ້ທຸກໆຄົນທີ່ເຂົ້າຮ່ວມປະຊຸມຊາບເວລານາງພົບເຫັນອີແມລທີ່ໜ້າສົງໄສ.
ຍານາງ Danielson ກ່າວວ່າ ໄດ້ສົ່ງອີແມລນີ້ໄປໃຫ້ພວກນັກຊ່ຽວຊານດ້ານຄວາມປອດ ໄພແລ້ວ ຊຶ່ງຍານາງເວົ້າວ່າ “ເວລາຂ້ອຍໄດ້ຮັບອີແມລນີ້ ຊຶ່ງມັນ ໄດ້ແນໃສ່ອຸດສາຫະກຳປ້ອງກັນປະເທດຂອງໄຕ້ຫວັນ ພວກຜູ້ຮັບບາງຄົນແມ່ນໄປຮ່ວມກອງປະຊຸມ ບາງຄົນບໍ່ໄດ້ໄປຮ່ວມ ຂ້ອຍຈຶ່ງມີຄວາມສົງໄສໃນທັນທີ.”
