ຊາວທິເບດຫຼາຍຮ້ອງຄົນໄດ້ພາກັນປະທ້ວງໃນພາກໃຕ້ຂອງຈີນ ໃນວັນຊາດຂອງປະເທດ
ທີ່ນໍາພາໂດຍພັກຄອມມຸຍນິດນັ້ນ.
ລາຍງານຂ່າວທີ່ອອກໃນວັນອາທິດວານນີ້ເວົ້າວ່າ ການປະທ້ວງນັ້ນໄດ້ເລີ່ມຂຶ້ນ ຫຼັງຈາກທີ່
ທຸງທິເບດແລະຮູບຂອງອົງດາໄລ ລາມະ ຜູ້ນໍາທາງຈິດໃຈຂອງຊາວທິເບດ ໄດ້ຖືກປົດອອກ
ໃນເມືອງ Seda ແຂວງ Sichuan ນັ້ນ.
ໃນການປະທ້ວງໄດ້ມີຂຶ້ນໃນວັນເສົາຜ່ານມາ ກົງກັບວັນຊາດຂອງຈີນ ຊຶ່ງເປັນ ວັນທີ່ພັກ
ຄອມມຸຍນິດເຂົ້າຢຶດຄອງອໍານາດນັ້ນ.
ຄວາມເຄັ່ງຕຶງໄດ້ເພີ່ມທະວີຂຶ້ນໃນຂົງເຂດນັ້ນ ຕັ້ງແຕ່ໄດ້ມີການປະທ້ວງເກີດ ຂຶ້ນໃນເດືອນ
ມີນາ ແລະຫຼັງຈາກນັ້ນ ກໍໄດ້ມີພະສົງ ຈໍານວນ 300 ອົງ ຫາຍສາບສູນ ຊຶ່ງພວກທີ່ເຫັນ
ເຫດການເວົ້າວ່າ ໄດ້ຖືກທາງການຈີນຈັບໄປແລະນໍາໄປຍັງສະຖານທີ່ໃດນຶ່ງທີ່ບໍ່ບອກໃຫ້
ຊາບ. ທາງການກຸງປັກກິ່ງໄດ້ຮັບຮູ້ເຖິງການຫາຍສາບສູນດັ່ງກ່າວໃນເດືອນມິຖຸນາແລ້ວນີ້
ແລະວ່າ ພວກພະສົງທີ່ຖືກກັກຂັງນັ້ນ ແມ່ນກໍາລັງໄດ້ຮັບການສຶກສາທາງດ້ານກົດໝາຍ.
ໃນສັບປະດາແລ້ວນີ້, ພະສົງຊາວທິເບດ 2 ອົງໄດ້ຈຸດໄຟເຜົາຕົວເອງຕາຍເພື່ອເປັນການ
ປະທ້ວງຕໍ່ຈີນໃນວັດແຫ່ງທາງພາກໃຕ້ຂອງຈີນ ບ່ອນທີ່ພະສົງທິເບດໜຸ່ມອົງນຶ່ງ ໄດ້ເຜົາ
ຕົວເອງຕາຍ ໃນຕົ້ນປີນີ້.
