ນັກຊ່ຽວຊານເລື່ອງທິເບດຊາວຈີນຄົນນຶ່ງໄດ້ກ່າວຫາພວກຜູ້ນຳສາສະໜາທີ່ໃກ້ຊິດກັບອົງດາ
ໄລລາມະ ຜູ້ນຳທາງດ້ານຈິດໃຈຂອງຊາວທິເບດທີ່ລີ້ໄພຢູ່ໃນຕ່າງປະເທດເວລານີ້ວ່າໃຊ້ຄຳສັ່ງ ສອນແບບຫົວຮຸນແຮງເກີນຂອບເຂດເພື່ອຊຸກຍູ້ໃຫ້ພະສົງຂອງສາສະໜາພຸດຢູ່ໃນຈີນເອົາໄຟ
ຈູດເຜົາໂຕເອງ.
ມີພະສົງ 9 ອົງແລະນາງຊີອີກ 2 ຄົນໄດ້ຈູດໄຟເຜົາໂຕເອງໃນເຂດທີ່ມີຊາວທິເບດອາໄສຢູ່
ໃນພາກຕາເວັນຕົກສຽງໃຕ້ຂອງຈີນປີນີ້ເພື່ອປະທ້ວງຕໍ່ການກົດຂີ່ທາງດ້ານສາສະໜາຂອງ
ຈີນ. ນາງຊີແລະພະສົງຈຳນວນຫຼາຍໆອົງແມ່ນມາຈາກວັດ Kirti ໃນແຂວງສີສວນຂອງຈີນ.
ອົງການຂ່າວຊິນຫົວຂອງທາງການຈີນໄດ້ພິມເຜີຍແຜ່ບົດຂຽນບົດນຶ່ງທີ່ຂຽນໂດຍທ່ານ Hua
Zi ນັກຊ່ຽວຊານເລື່ອງທິເບດທີ່ມີສຳນັກງານຢູ່ກຸງປັກກິ່ງທີ່ກ່າວເຖິງການເຜົາໂຕເອງວ່າເປັນ ການກະທຳແບບຮຸນແຮງເກີນຂອບເຂດແລະເປັນການກໍ່ການຮ້າຍ.
ລາຍງານນີ້ໄດ້ອ້າງຄຳເວົ້າຂອງຫົວໜ້າພະແນກສາສະໜາໃນເຂດທ້ອງຖິ່ນທີ່ກ່າວວ່າ ພະອະ
ວຸໂສອົງນຶ່ງຈາກວັດ Kirti ທີ່ໄດ້ຫຼົບໜີໄປຍັງອິນເດຍໃນປີ 1959 ພ້ອມກັບອົງດາໄລລາມະ
ນັ້ນ ເປັນຜູ້ຊຸກຍູ້ໃຫ້ເຮັດການປະທ້ວງ ແບບບໍ່ຄິດເຖິງຊີວິດດັ່ງກ່າວ. ລາຍງານບໍ່ໄດ້ລະບຸຊື່
ຂອງພະອົງນີ້.
ແຕ່ຫົວໜ້າພະລາມະຂອງວັດ Kirti ທີ່ລີ້ໄພຢູ່ຕ່າງປະເທດ ຄືອົງລາມະ Kirti Rinpoche
ກ່າວຕໍ່ວີໂອເອພາກພາສາທິເບດ ທາງໂທລະສັບ ໃນມື້ວັນສຸກວານນີ້ວ່າ ພວກຜູ້ນຳຊາວທິ
ເບດທີ່ລີ້ໄພຢູ່ໃນຕ່າງປະເທດບໍ່ເຄີຍພະຍາຍາມສ້າງອິດທິພົນຂອງຕົນເລີຍ. ເພິ່ນເວົ້າຕື່ມວ່າ
ເວລາພວກເຈົ້າໜ້າທີ່ຈີນບໍ່ສາມາດຫາຫຼັກຖານມາພິສູດໄດ້ພວກເຂົາເຈົ້າກໍຈະກ່າວຫາໃນສິ່ງ
ທີ່ພວກເຂົາເຈົ້າຢາກເວົ້າ.
ອົງດາໄລລາມະຊົງກ່າວຕໍ່ວິທະຍຸບີບີຊີ ໃນສັບປະດາແລ້ວນີ້ວ່າ ການເຜົາໂຕຕາຍແມ່ນເປັນ
ຄວາມກ້າຫານ ແຕ່ບໍ່ສະຫຼາດ ຍ້ອນມີແຕ່ຈະກໍ່ໃຫ້ເກີດການຕອບໂຕ້ແບບໜັກຂຶ້ນກວ່າເກົ່າ
ຈາກລັດຖະບານຈີນ. ພະອົງໄດ້ຊົງປະຕິເສດຕໍ່ການກ່າວຫາຂອງປັກກິ່ງທີ່ວ່າ ພະອົງໄດ້ຊຸກ
ຍູ້ໃຫ້ກະທຳການໃນທຳນອງນັ້ນ.
