ກຸ່ມເຄື່ອນໄຫວເພື່ອທິເບດກຸ່ມນຶ່ງກ່າວວ່າ ຊາຍໜຸ່ມຊາວທິເບດຄົນນຶ່ງໄດ້ຈູດໄຟເຜົາຕົນເອງ
ເມື່ອວັນເສົາວານນີ້ ເພື່ອປະທ້ວງການປົກຄອງຂອງຈີນໃນເຂດທິເບດ.
ກຸ່ມເຄື່ອນໄຫວ Free Tibet ທີ່ມີສໍານັກງານຢູ່ນະຄອນຫລວງລອນດອນຂອງປະເທດອັງ
ກິດ ກ່າວໃນວັນອາທິດມື້ນີ້ວ່າ ນາຍ Norbu Dathul ອາຍຸ 19 ປີ ທີ່ເຄີຍບວດເປັນພະ
ໄດ້ຈູດໄຟເຜົາຕົນເອງ ຕອນໃກ້ທ່ຽງວັນຂອງວັນເສົາວານນີ້ ທີ່ຕະຫລາດໃຫຍ່ຂອງເມືອງ
Ngaba ທາງພາກ ຕາເວັນອອກຂອງທິເບດ.
ກຸ່ມດັ່ງກ່າວເວົ້າວ່າ ຜູ້ກ່ຽວໄດ້ຮຽກຮ້ອງໃຫ້ອົງດາໄລ ລາມະ ຜູ້ນໍາຈິດໃຈທີ່ພັດຖິ່ນນັ້ນ ຈົ່ງ
ກັບຄືນໄປທິເບດ ແລະຮຽກຮ້ອງເອົາເສລີພາບສໍາຫລັບ ທິເບດ ກ່ອນທີ່ຜູ້ກ່ຽວຈະຈູດໄຟ
ເຜົາຕົນເອງ. ຕໍາຫລວດໄດ້ຮີບມອດໄຟ ແລະເອົາຕົວນາຍ Norbu ອອກໄປຈາກທີ່ນັ້ນ.
ກຸ່ມເຄື່ອນໄຫວ Free Tibet ກ່າວວ່າ ນາຍ Norbu ເປັນຊາວທິເບດຄົນທີ່ແປດທີ່ຈູດເຜົາ
ຕົນເອງ ນັບຕັ້ງແຕ່ເດືອນມີນາ ປີນີ້ ເປັນຕົ້ນມາ.
ກະຊວງຕ່າງປະເທດສະຫະລັດໄດ້ກ່າວເມື່ອອາທິດຜ່ານມານີ້ວ່າ ວໍຊິງຕັນ ແມ່ນເປັນຫ່ວງ ນໍາການຂ້າສັງເວີຍຕົນເອງຂອງພວກພະສົງຊາວທິເບດເມື່ອໝໍ່ໆມານີ້ ແລະຄວາມໂກດແຄ້ນ ແລະຄວາມທໍ້ແທ້ໃຈອັນແຈ່ມແຈ້ງ ທີ່ທ່າອ່ຽງດັ່ງກ່າວສະແດງເຫັນນັ້ນ. ທາງວໍຊິງຕັນໄດ້ຮຽກ
ຮ້ອງຊໍ້າແລ້ວຊໍ້າເລົ່າ ໃຫ້ຈີນຈົ່ງເຄົາລົບນັບຖື ສາສະໜາ ປະເພນີ ແລະພາສາ ອັນເປັນເອກ
ກະລັກຂອງທິເບດນັ້ນ.
ທາງຈີນແມ່ນໄດ້ປະຕິເສດມາເປັນປະຈໍາ ການຕໍາໜິຕິຕຽນຕໍ່ການປະຕິບັດຂອງຕົນຕໍ່ພວກ
ຊົນກຸ່ມນ້ອຍຂອງຕົນນັ້ນ ໂດຍເວົ້າວ່າມັນເປັນການແຊກ ແຊງເຂົ້າໃນກິດຈະການພາຍໃນ
ປະເທດຂອງຕົນ.
