ລາຍງານຂ່າວຈາກທິເບດແຈ້ງວ່າ ພະສົງທິເບດອີກອົງນຶ່ງໄດ້ເຖິງແກ່ມໍລະນະພາບໃນວັນ
ອາທິດວານນີ້ ຫລັງຈາກເອົາໄຟເຜົາຕົນເອງຕາຍໃນເມືອງ Dari ໃນເຂດ Amdo.
ລາຍງານເວົ້າວ່າ ກ່ອນພະ Lama Sopa Tulku ໄວ 42 ປີ ຈະເອົາໄຟເຜົາໂຕຕາຍນັ້ນ
ເພິ່ນກ່າວວ່າ ເພິ່ນເຮັດສິ່ງນີ້ແມ່ນເພື່ອລະລຶກເຖິງດວງວິນຍານຂອງຊາວທິເບດໝົດສູ່ຄົນ
ທີ່ໄດ້ເສຍຊີວິດໄປຕັ້ງແຕ່ປີ 2009 ເພື່ອເສລີພາບຂອງທິເບດ ແລະເພື່ອໃຫ້ອົງດາໄລ ລາ
ມະ ຜູ້ນໍາດ້ານຈິດໃຈຂອງເຂົາເຈົ້າ ກັບຄືນມາຍັງບ້ານເດີມເມືອງນອນ ຊຶ່ງພະອົງໄດ້ຫລົບ
ໜີຈາກປະເທດໄປອາໄສຢູ່ໃນອິນເດຍໃນປີ 1959 ທ່າມກາງທໍາການລຸກຮືຂຶ້ນຕໍ່ຕ້ານອໍາ
ນາດປົກຄອງຈີນທີ່ບໍ່ປະສົບຜົນສໍາເລັດນັ້ນ.
ພະ Lama Sopa Tulku ເປັນພະສົງທີເບດອົງທີສາມທີ່ຈູດໂຕເອງຕາຍໃນໄລຍະ 3 ມື້
ຜ່ານມານີ້ ເພື່ອເປັນການປະທ້ວງຕໍ່ຕ້ານການປົກຄອງຂອງຈີນຢູ່ທິເບດນັ້ນ.
ອົງການຂ່າວຊິນຫົວຂອງທາງການຈີນໄດ້ຢືນຢັນຂ່າວໃນວັນອາທິດວານນີ້ ວ່າອະດີດພະ
ທີເບດອົງນຶ່ງໄດ້ເສຍຊີວິດ ຫລັງຈາກຜູ້ກ່ຽວແລະຜູ້ຊາຍອີກຄົນນຶ່ງເອົາໄຟເຜົາໂຕເອງ ໃນ
ວັນສຸກຜ່ານມາໃກ້ໆກັບວັດ Kirti ທີ່ເປັນຈຸດຂອງການປະທ້ວງໃນແຂວງຊີສວນນັ້ນ.
ຊິນຫົວເວົ້າວ່າ ອະດີດພະ ໄວ 18 ປີ ອົງນັ້ນໄດ້ເອົາໄຟເຜົາໂຕຕາຍ ຢູ່ໃນຫ້ອງພັກໂຮງ
ແຮມແຫ່ງນຶ່ງ ໃນຂະນະດຽວກັນກັບທີ່ຊາຍ ໄວ 22 ປີ ຄົນນຶ່ງໄດ້ເຂົ້າໄປປິ່ນປົວບາດແຜ
ຈາກໄຟໄໝ້ອາການສາຫັດໃນໂຮງໝໍ ຫລັງຈາກຜູ້ກ່ຽວພະຍາຍາມເຜົາໂຕຕາຍຢູ່ສີ່ແຍກ
ແຫ່ງນຶ່ງໃກ້ໆນັ້ນ.
ເຊື່ອກັນວ່າ ມີພະສາດສະໜາພຸດທິເບດຢ່າງໜ້ອຍ 14ອົງແລ້ວ ທີ່ໄດ້ເອົາໄຟເຜົາໂຕເອງ
ໃນປີແລ້ວນີ້ ນັບແຕ່ພະໜຸ່ມອົງນຶ່ງທີ່ທໍາການປະທ້ວງການປົກຄອງຂອງຈີນ ໄດ້ເອົາໄຟ
ເຜົາໂຕເອງຕາຍຢູ່ນອກວັດ Kirti ໃນເດືອນມີນາປີກາຍນີ້. ການຕາຍດັ່ງກ່າວໄດ້ກະຕຸ້ນ
ໃຫ້ພວກພະສົງແລະແມ່ຊີທໍາການປະທ້ວງມາເປັນເວລາຫລາຍເດືອນ ແລະກະຕຸ້ນໃຫ້
ລັດຖະບານຈີນທໍາການປາບປາມ ທີ່ຮວມທັງການຈັບກຸມແລະການຫາຍໂຕໄປຂອງພວກ
ພະສົງຫລາຍຮ້ອຍອົງ.
