ໄອຍະການສານອາຍາສ​າ​ກົນ ຮ້ອງຂໍໝາຍຈັບຜູ້ນຳກອງທັບ ມຽນມາ

ໄອຍະການຂອງສານອາຍາລະຫວ່າງປະເທດ ( ICC ) ເປີດເຜີຍໃນວັນພຸດ ວານນີ້ວ່່າ ໄດ້ຍື່ນເລື່ອງຂໍໝາຍຈັບພົນເອກອາວຸໂສ ມິນ ອ່ອງ ລາຍ ຜູ້ນໍາກອງທັບ ມຽນມາ ສຳລັບການກໍ່ອາຊະຍາກຳ ຕໍ່ມະນຸດສະຍາຊາດ ຈາກຂໍ້ກ່າວຫາວ່າໄດ້ທຳການປະຫັດປະຫານຊາວໂຣຮີງຢາ ເຊີ່ງນັບຖື ສາສະໜາອິສຣາມ.

ລັດຖະບານທະຫານມຽນມາ ອອກຖະແຫຼງການທີ່ສົ່ງໃຫ້ກັບອົງການຂ່າວ ຣອຍເຕີ້ວ່າ ມຽນມ້າບໍ່ໄດ້ເປັນສາມະຊິກຂອງສານອາຍາໂລກ ແລະບໍ່ຍອມຮັບ ຄຳຖະແຫຼງທັງໝົດຂອງສານນີ້.

ຊາວໂຣຮິງ​ຢາ ນັບລ້ານຄົນໄດ້ຫລົບໜີໄປຍັງ ບັງກລາ​ແດັສ໌ ເຊິ່ງເປັນປະເທດ ເພື່ອນບ້ານເພື່ອໃຫ້ລອດພົ້ນ​ຈາກປະຕິບັດການໂຈມຕີິຂອງກອງທັບ ມຽນມາ ທີ່ເລີ່ມຕົ້ນຕັ້ງແຕ່ເມື່ອເດືອນສິງຫາປີ 2017 ແລະ ເປັນສິ່ງທີ່ເຈົ້າໜ້າທີ່ສອບ ສວນຂອງສະ ຫະປະຊາຊາດລະບຸວ່າ ເປັນຕົວຢ່າງຕາມຕຳລາຂອງການຂ້າ ລ້າງເຜົ່າພັນ.

ເຈົ້າໜ້າທີ່ສອບສວນຂອງສະຫະປະຊາຊາດກ່າວຫາທະຫານ, ຕຳຫລວດແລະຜູ້ ນັບຖືສາສະໜາພຸດໃນມຽນມາ ວ່າໄດ້ທຳລາຍລ້າງໝູ່ບ້ານນັບຮ້ອຍແຫ່ງໃນ ພື້ນທີ່ ລັດຍະໄຂ່ທາງຕາເວັນຕົກຂອງປະເທດ ແລະທຳການທໍລະມານຊາວບ້ານ ທີ່ພະຍາຍາມໜີຕາຍລວມທັງທຳການສັງຫານໝູ່ແລະຂົ່ມຂືນກຸ່ມແມ່ຍິງ.

ມຽນມາ ປະຕິເສດຄຳກ່າວຫາເຫລົ່ານີ້ແລະກ່າວວ່າກອງກຳລັງດ້ານຄວາມໝັ້ນຄົງດຳເນີນປະຕິບັດການທີ່ຖືກກົດໝາຍໃນການຈັດການກັບກຸ່ມຕິດອາວຸດທີ່ໂຈມຕີທີ່ໝັ້ນຂອງຕຳຫລວດ. ອົງການຂ່າວຣອຍເຕີ້ລາຍງານວ່າ ໃນເວລານີ້ຜູ້ລີ້ໄພ ສ່ວນ ຫຼາຍໃຊ້ຊີວິດຢູ່ໃນສູນ​ພົບ​ພະ​ຍົບທີ່ມີສະພາບແອອັດໃນ ບັງກລາແດັ​ສ.

ທ່ານ ໂມຮໍາເມັດ ຊູແບຣ ນັກວິໄຈດ້ານໂຣຮິງຢາ ໃນສູນລີ້ໄພໃນບັງກລາ​ແດັ​ສ ກ່າວວ່າ “ທ່ານ ມິນ ອ່ອງ ລາຍ ຮັບຜິດຊອບຄວບຄຸມສັ່ງການຂ້າລ້າງເຜົ່າພັນ ຊາວໂຣຮິງ​ຢາ ຜູ້ບໍລິສຸດ” ພາຍໃຕ້ການບັນຊາການຂອງ ທ່ານ ມິນ ອ່ອງ ລາຍ ທະຫານ ໄດ້ຂ້າຊາວໂຣຮິງ​ຢາ ຫລາຍພັນຄົນແລະເຮັດໃຫ້ແມ່​ຍິງ ແລະ ເດັກຍິງນັບບໍ່ຖ້ວນຕ້ອງປະເຊີນກັບເຫດການຄວາມຮຸນແຮງທາງເພດ”

ທ່ານ ນິໂຄລັສ ຄຸມຈິອັນ ຫົວໜ້າຄະນະສອບສວນອິດສະຫລະໃນ ມຽນມາ ຂອງສະຫະ ປະຊາຊາດເຊິ່ງຊ່ອຍສານອາຍາໂລກທຳການສືບສວນຄະດີນີ້ ກ່າວວ່າ “ການຮ້ອງຂໍໝາຍຈັບບຸກຄົນທີ່ດຳລົງຕຳແໜ່ງສູງສຸດທາງທະຫານໃນ ມ້ຽນມ້າ ສົ່ງສານທີ່ຊັດເຈັນໄປຍັງຜູ້ກະທຳຄວາມຮຸນແຮງວ່າບໍ່ມີໃຜຢູ່ເໜືອ ກົດໝາຍ”

ຈາກນີ້ຄະນະຕຸລາການທີ່ມີສະມາຊິກ 3 ຄົນຈະຕັດສີນວ່າ ມີເຫດຜົນທີ່ເໝາະ ສົມທີ່ຈະເຊື່ອວ່າ ທ່ານ ມິນ ອ່ອງ ລາຍ ຕ້ອງຮັບຜິດຊອບຕໍ່ອາຊະຍາກຳທີ່ ກ່ຽວຂ້ອງກັບການສົ່ງໂຕກັບປະເທດແລະການປະຫັດປະຫານຊາວໂຣຮິງ​ຢາ ໃນມຽນມາແລະບັງກລາເທດຫຼືບໍ່.

ທັງນີ້ບໍ່ມີກຳນົດເວລາວ່າ ຄະ​ນະຕຸລາການສານອາຍາໂລກຕ້ອງຕັດສິນເລື່ອງນີ້ ເມື່ອໃດ. ແຕ່ປົກກະຕິແລ້ວຂະບວນການນີ້ມັກໃຊ້ເວລາປະມານ 3 ເດືອນ ກ່ອນຈະມີການຕັດສີນວ່າຈະອອກໝາຍຈັບຫຼືບໍ່.

ການຂໍໝາຍຈັບນີ້ເກີດຂຶ້ນ, ຂະນະທີ່ສຳນັກງານໄອຍາການສານອາຍາໂລກກຳ ລັງປະເຊີນແຮງກົດດັນທາງການເມືອງຢ່າງໜັກຈາກລັດຖະບານ ວໍຊິງຕັນ ແລະ ຫຼາຍປະເທດຈາກການອອກໝາຍຈັບນາຍົກລັດຖະມົນຕີ ທ່ານ ເບັນຈາມິນ ເນທັນຢາຮູ ແລະ ໂຍອາຟ ກາລແລນ ອາດີດລັດຖະມົນກະຊວງປ້ອງກັນປະ ເທດຂອງອິສຣແອນ.