ຈີນ ແລະ ເກົາຫຼີໃຕ້ ໄດ້ລາຍງານວ່າ ມີກໍລະນີຕິດເຊື້ອໄວຣັສໂຄໂຣນາສາຍພັນໃໝ່ ຫຼາຍຂຶ້ນຕື່ມອີກ ໃນວັນອັງຄານມື້ນີ້ ໃນຂະນະທີ່ຕະຫຼາດຮຸ້ນຕ່າງໆ ໃນຍີ່ປຸ່ນ ໄດ້ປະສົບກັບບັນຫາສອງມື້ລຽນຕິດຫຼັງຈາກນຶ່ງວັນໃນການຕົກລາຄາຂອງຕະຫລາດຮຸ້ນໃນທົ່ວໂລກ ແລະປະທານາທິບໍດີ ສະຫະລັດ ທ່ານດໍໂນລ ທຣຳ ພວມສະແຫວງຫາທຶນຈຳນວນ 2,500 ລ້ານໂດລາ ຈາກລັດຖະສະພາ ເພື່ອຕໍ່ສູ້ກັບການລະບາດຂອງໄວຣັສໂຄໂຣນານີ້.
ບັນດາເຈົ້າໜ້າທີ່ສາທາລະສຸກຂອງຈີນ ໄດ້ກ່າວວ່າ ມີການເສຍຊີວິດໃໝ່ອີກ 71 ລາຍ ແລະ 508 ກໍລະນີຕິດເຊື້ອໄວຣັສໃໝ່ອີກຢູ່ຈີນ ຊຶ່ງເຮັດໃຫ້ຈຳນວນລວມທັງໝົດຢູ່ໃນປະເທດ ບ່ອນທີ່ການລະບາດໄດ້ເລີ້ມຂຶ້ນ ເມື່ອສອງເດືອນກ່ອນນັ້ນ ເປັນຫຼາຍກວ່າ 2,663 ຄົນເສຍຊີວິດ ແລະ 77,500 ຄົນຕິດເຊື້ອໄວຣັສ.
ສ່ວນເກົາຫຼີໃຕ້ ໄດ້ຮັບຜົນກະທົບໜັກທີ່ສຸດ ຢູ່ນອກປະເທດຈີນ ໂດຍຈຳນວນກໍລະນີຕິດເຊື້ອໄວຣັສທັງໝົດຂອງປະເທດນີ້ ເພີ້ມຂຶ້ນເປັນປະມານ 1,000 ຄົນແລ້ວ ໃນວັນອັງຄານມື້ນີ້ ພ້ອມກັບ 10 ຄົນໄດ້ເສຍຊີວິດ.
ທາງການຢູ່ທີ່ນັ້ນ ກໍໄດ້ເລື່ອນການເປີດສົກຮຽນປະຈຳປີອອກໄປ ແລ້ວໄດ້ທຳການຂ້າເຊື້ອພະຍາດຢູ່ທີ່ຫໍປະຊຸມຕ່າງໆຂອງສະພາແຫ່ງຊາດ ແລະ ໄດ້ຮຽກຮ້ອງໃຫ້ພວກຄົນທັງຫຼາຍ ຜູ້ທີ່ຫາກມີອາການເປັນໄຂ້ ຫຼື ອາການທາງລະບົບຫາຍໃຈ ໃຫ້ຢູ່ພາຍໃນເຮືອນ. ບັນດາເຈົ້າໜ້າທີ່ ຍັງໄດ້ໂຈະ ການເປີດລະດູການແຂ່ງຂັນເຕະບານ ຂອງສະຫະພັນບານເຕະບານພາຍໃນປະເທດນຳດ້ວຍ ແລະໃນວັນອັງຄານມື້ນີ້ ສະຫະພັນກິລາບານບ້ວງອາຊີບ ໄດ້ກ່າວວ່າ ເກມການແຂ່ງຂັນທັງຫນາຍ ຈະດຳເນີນໄປໂດຍປາສະຈາກພວກຜູ້ເຂົ້າຊົມ.
ປະທານາທິບໍດີເກົາຫຼີໃຕ້ ທ່ານມູນ ແຈ-ອິນ ໄດ້ເອີ້ນສະຖານະການນີ້ວ່າ “ຮ້າຍ ແຮງແທ້ໆ” ໃນຂະນະທີ່ທ່ານເດີນທາງໄປຢ້ຽມຢາມເມືອງເດກູໃນວັນອັງຄານມື້ນີ້ ບ່ອນທີ່ກໍລະນີການຕິດເຊື້ອໄວຣັສສ່ວນໃຫຍ່ຂອງປະເທດ ໄດ້ເກີດຂຶ້ນນັ້ນ. ທ່ານມູນ ໄດ້ປະຕິຍານວ່າ ລັດຖະບານ ຈະໃຫ້ການສະໜັບສະໜຸນຢ່າງເຕັມສ່ວນ ແລະໄດ້ກ່າວຕື່ມວ່າ ເກົາຫຼີໃຕ້ ຈະ “ບັນລຸໄຊຊະນະ” ໃນການຕໍ່ສູ້ຕ້ານໄວຣັສນີ້.
ເລຂາທິການໃຫຍ່ອົງການສະຫະປະຊາຊາດ ທ່ານແອນໂຕນີໂອ ກູເຕເຣັສ ໄດ້ຮຽກຮ້ອງຕໍ່ບັນດາລັດຖະບານໃນທົ່ວໂລກ ຈົ່ງໃຫ້ເຮັດ “ທຸກສິ່ງທຸກຢ່າງທີ່ຈຳເປັນ.”
ທ່ານກ່າວອີກວ່າ “ປະເທດທັງໝົດ ແລະດຽວນີ້ ເປັນບັນຫາທີ່ສົ່ງຜົນກະທົບຕໍ່ ຫຼາຍໆປະເທດໃນທົ່ວໂລກແລ້ວ ທຸກປະເທດ ຕ້ອງເຮັດທຸກສິ່ງທຸກຢ່າງເພື່ອກຽມພ້ອມ ແລະທຸກປະເທດ ຕ້ອງເຮັດທຸກສິ່ງທຸກຢ່າງ ໂດຍເຄົາລົບນັບຖື ຕາມທຳມະດາແລ້ວ ອີງຫລັກການຂອງການບໍ່ຈຳແນກເຊື້ອຊາດຊົນກີດກັນ ປາສະຈາກການດູໝິ່ນດູຖູກ ແລະໃຫ້ເຄົາລົບນັບຖືສິດທິມະນຸດ ແຕ່ເຮັດທຸກສິ່ງທຸກຢ່າງ ທີ່ປະເທດທັງຫຼາຍ ສາມາດເຮັດໄດ້ ເພື່ອຄວບຄຸມພະຍາດນີ້.”
ຄະນະລັດຖະບານທ່ານທຣຳ ໄດ້ຂໍຮ້ອງໄປຍັງລັດຖະສະພາ ໃນວັນຈັນວານນີ້ ໂດຍກ່າວວ່າ ເງິນຈຳນວນທີ່ຮ້ອງຂໍນັ້ນ ຈະນຳໄປໃຊ້ໃນການພັດທະນາຢາວັກຊີນ ແລະເພື່ອຊື້ອຸປະກອນຕ່າງໆ ສຳລັບການປິ່ນປົວ ແລະ ເຄື່ອງປ້ອງກັນຕ່າງໆ.
