ເບິ່ງວິດິໂອລາຍງານຂ່າວພາສາລາວ:
ພວກຊາວບ້ານໆ Wukan ທາງພາກຕາເວັນອອກສຽງໃຕ້ຂອງຈີນ ພາກັນຢືນຢັດຮ້ອງທຸກ
ຕໍ່ພວກເຈົ້າໜ້າທີ່ ຊຶ່ງບໍ່ຄ່ອຍເຫັນເກີດຂຶ້ນນັ້ນ.
ເປັນເວລາຫລາຍເດືອນແລ້ວ ທີ່ພວກເຂົາເຈົ້າປະທ້ວງກ່ຽວກັບຂໍ້ກ່າວຫາທີ່ວ່າພວກເຈົ້າໜ້າທີ່
ຂອງພັກໃນເຂດທ້ອງຖິ່ນທັງຫລາຍສໍ້ລາດບັງຫລວງ ແລະໃນສິ່ງທີ່ພວກເຈົ້າເວົ້ານັ້ນກໍແມ່ນວ່າ
ເປັນການຕົກລົງການຂາຍດິນໄຮ່ດິນນາຢ່າງຜິດກົດໝາຍໃຫ້ແກ່ພວກນາຍໜ້າຈັດສັນດິນ.
ແລະໝູ່ບ້ານ ວູຄານ ດັ່ງກ່າວນີ້ເປັນພຽງຕົວຢ່າງນຶ່ງຂອງຫລາຍໆບັນຫາທີ່ສ້າງຄື້ນຟອງແຫ່ງ
ຄວາມບໍ່ສະຫງົບດ້ານສັງຄົມຢູ່ໃນຈີນ.
ໃນເດືອນຕຸລາຜ່ານມານີ້ ເກີດມີການຂັດແຍ້ງກັນດ້ານພາສີ ທີ່ເມືອງ Zhili ທາງ ພາກຕາເວັນ
ອອກຂອງຈີນ ແລະຈົນກາຍເປັນເຫດກໍ່ຈະລາຈົນຂຶ້ນ.
ພວກນັກວິເຄາະການເມືອງກ່າວວ່າ ຖ້າຫາກວ່າພວກເຈົ້າໜ້າທີ່ທີ່ກ່ຽວຂ້ອງ ບໍ່ປະຕິບັດການ
ເພີ່ມຕື່ມເພື່ອແກ້ໄຂບັນຫາຄວາມບໍ່ພໍໃຈຂອງມະຫາຊົນ ທີ່ກໍາລັງເພີ່ມຂຶ້ນນັບມື້ນັ້ນ ເຫດການ
ກໍ່ຄວາມບໍ່ສະຫງົບກໍຈະຮ້າຍແຮງຕື່ມຂຶ້ນໄປອີກ.
ທ່ານ Hu Xingdou ອາຈານຄົນນຶ່ງປະຈໍາສະຖາບັນເທກໂນໂລຈີ່ ທີ່ກຸງປັກກິ່ງຫລື Beijing Institute of Technology ກ່າວວ່າ:
“ເວລານີ້ຈີນແມ່ນພວມກ້າວເຂົ້າສູ່ຍຸກທີ່ວ່າສ່ຽງທີ່ສຸດບັ້ນນຶ່ງ ບໍ່ແມ່ນນຶ່ງໃນຍຸກທີ່ມີຄວາມ
ສ່ຽງໂດຍສະເລ່ຍທົ່ວໄປ ຊຶ່ງຂ້າພະເຈົ້າຢ້ານວ່າ ຖ້າຫາກລັດຖະບານກາງຂອງຈີນ ບໍ່ນໍາ
ໃຊ້ມາດຕະການຢ່າງໃດຢ່າງນຶ່ງໃນໄລຍະຫ້າປີຕໍ່ໜ້າຫລືປະມານນັ້ນແລ້ວ ປະເທດຈີນ
ທັງໝົດກໍຈະວຸ້ນວາຍທີ່ບໍ່ສາມາດຄວບຄຸມໄດ້.”
ທ່ານ ຫລູ ສ້ຽວເຜັງ ນັກເສດຖະສາດຈີນ ກ່າວວ່າ ປະທານ ຫູ ຈິນເຖົາ ບໍ່ໄດ້ດຳເນີນການ
ຫຍັງຫຼາຍເພື່ອຄວບຄຸມພວກເຈົ້າໜ້າທີ່ທ້ອງຖິ່ນໃນໄລຍະສິບປີຜ່ານມາ ແລະນັ້ນຈະເປັນ
ສິ່ງທ້າທາຍທີ່ສໍາຄັນ ສໍາລັບຮອງປະທານ ສີ ຈິນ ຜິງ ເວລາທ່ານກ້າວຂຶ້ນມາສືບຕໍາແໜ່ງ
ແທນປະທານຫູ ໃນປີໜ້ານີ້
“ບັນຫາສະພາບແວດລ້ອມ ບັນຫາການສຶກສາ ບັນຫາລັດຖະກອນທັງໝົດເຫລົ່ານີ້
ແມ່ນໄດ້ສະສົມພອກພູນມາໄດ້ຫລາຍກວ່າສິບປີແລ້ວ ບໍ່ແມ່ນຫາກໍ່ເກີດຂຶ້ນມາດຽວນີ້
ແຕ່ຂ້າພະເຈົ້າຄິດວ່າທຸກໆຄົນພໍຈະຮູ້ໄດ້ວ່າຈະເກີດ ວິກິດການຂຶ້ນໃນບໍ່ຊ້ານີ້ ແລະພວກ
ຜູ້ນໍາໝ້າໃໝ່ທັງຫລາຍຈະຕ້ອງຫາທາງ ແກ້ໄຂໃນເລຶ່ອງນີ້ໃຫ້ໄດ້.”
ທ່ານນາງ Bonnie Glaser ນັກວິເຄາະກ່ຽວກັບຈີນປະຈໍາສູນກາງການສຶກສາຍຸດທະສາດ
ແລະນາໆຊາດ ທີ່ນະຄອນຫລວງວໍຊິງຕັນດີຊີ ກ່າວວ່າ ຄວາມເປັນຫ່ວງຂອງການເຕີບໂຕ
ທາງເສດຖະກິດຢູ່ຈີນຈະຊັກຊ້າລົງໃນປີໜ້ານີ້ ອາດເຮັດໃຫ້ສະຖານະການຮ້າຍແຮງຂຶ້ນຕື່ມ.
“ເວົ້າເຖິງຄະນະນຳພາຂອງຈີນໃນເວລານີ້ແລ້ວ ຂ້າພະເຈົ້າຄິດວ່າ ມັນບໍ່ໝັ້ນຄົງ ແລະມີ
ຄວາມເປັນຫ່ວງຫລາຍກ່ຽວກັບສະຖານະການພາຍໃນປະເທດ ການເຕີບໂຕເສດຖະກິດ
ຊັກຊ້າລົງ ແລະຮ່ອງຮອຍແຫ່ງ ຄວາມບໍ່ສະຫງົບ ແລະຄວາມເປັນທຸກເປັນຮ້ອນທີ່ເຕີບໂຕ
ສູງຂຶ້ນນັບມື້ນັ້ນ.”
ໃນຂະນະທີ່ເສດຖະກິດຂອງຈີນເຕີບໃຫຍ່ຂະຫຍາຍໂຕນັ້ນ ພ້ອມດຽວກັນ ກໍເກີດມີຊົນຊັ້ນ
ກາງເພີ່ມຫລາຍຂຶ້ນ ແລະກໍແມ່ນພວກຊົນຊັ້ນກາງນີ້ຫລະ ທີ່ພາກັນອອກປາກອອກສຽງ
ທວງນັ້ນທວງນີ້ຈາກລັດຖະບານຫລາຍຂຶ້ນ.
ເບິ່ງສະໄລ໌ຂອງເຫດການທີ່ກ່ຽວຂອ້ງ
ໃນເດືອນສິງຫາຜ່ານມານີ້ ປະຊາຊົນຫລາຍພັນຄົນຫລັ່ງໄຫລລົງສູ່ຖະນົນຫົນທາງ ທີ່ເມືອງ
ດາລຽນ ທາງພາກຕາເວັນອອກສຽງເໜືອຂອງຈີນ ແລະປະເຊີນກັບພວກເຈົ້າໜ້າທີ່ ໂດຍ
ທວງໃຫ້ປິດໂຮງງານເຄມີແຫ່ງນຶ່ງນັ້ນ ຊຶ່ງການປະທ້ວງຄັ້ງນັ້ນແມ່ນມີການເບິ່ງກັນຢ່າງກວ້າງ
ຂວາງວ່າ ເປັນການໂຮມຊຸມນຸມຂອງພວກຊົນຊັ້ນກາງ.
ທ່ານ Barry Naughton ນັກເສດຖະສາດປະຈໍາມະຫາວິທະຍາໄລ California ທີ່ນະຄອນ
San Diego ກ່າວວ່າ ເວລານີ້ລັດຖະບານຈີນແມ່ນເປັນຫ່ວງນໍາພວກຊົນຊັ້ນກາງນັ້ນຫລາຍ ທີ່ສຸດ.
“ພວກຊົນຊັ້ນກາງບໍ່ໄດ້ລົງສູ່ຖະນົນຫົນທາງ ແກວ່ງກ້ອນຫິນໃສ່ປ່ອງຢ້ຽມ ແຕ່ຂ້າພະເຈົ້າ
ຄິດວ່າ ມັນມີຄວາມຮູ້ສຶກແຫ່ງຄວາມບໍ່ສະຫງົບທີ່ວ່າສໍາຄັນທີ່ສຸດ ເນຶ່ອງຈາກວ່າຄົນພວກນີ້
ມີການສຶກສາດີ ທີ່ສ່ວນໃຫຍ່ອາໃສຢູ່ໃນຫົວເມືອງຕ່າງໆ ພວກເຂົາເຈົ້າມີຄວາມຊໍານິຊໍານານ
ແລະຄວາມສາມາດຫລາຍຢ່າງ.”
ແລະທີ່ເມືອງດາລຽນ ຊຶ່ງໃນທີ່ສຸດກໍໄດ້ຮັບຄວາມເອົາໃຈໃສ່ຂອງພວກເຈົ້າໜ້າທີ່ ຄືລຸນຫລັງ
ຈາກການປະທ້ວງຢູ່ທີ່ນັ້ນແລ້ວ ພວກເຈົ້າໜ້າທີ່ກໍຕົກລົງປິດໂຮງງານເຄມີແລະຍ້າຍໄປຕັ້ງ
ຢູ່ບ່ອນອື່ນ.
ເບິ່ງວີດີໂອລາຍງານຂ່າວພາສາອັງກິດ:
