ລາຍງານໃໝ່ສະບັບນຶ່ງທຳນາຍວ່າການສູບຢາຈະເຮັດໃຫ້
ປະຊາຊົນຈີນເສຍຊີວິດ 3 ລ້ານ 5 ແສນຄົນໃນແຕ່ລະປີ
ພາຍໃນໄລຍະ 2 ທົດສະວັດຕໍ່ໜ້ານີ້.
ບົດລາຍງານດັ່ງກ່າວແມ່ນອິງຕາມການເກັບກໍາຂໍ້ມູນຂອງ
ພວກນັກຊ່ຽວຊານຈີນແລະສາກົນທີ່ຖືກນຳມາເຜີຍແຜ່ໃນ
ວັນພະຫັດມື້ນີ້ ຊຶ່ງເປັນເວລາບໍ່ເທົ່າໃດມື້ກ່ອນຈະຮອດວັນ
ກໍານົດເສັ້ນຕາຍ ຂອງອົງການອະນາໄມໂລກຫລື WHO
ທີ່ໃຫ້ຈີນເກືອດຫ້າມການສູບຢາຢູ່ໃນສະຖານທີ່ສາທະລະ
ນະຕ່າງໆ ອັນເປັນນຶ່ງໃນເງື່ອນໄຂຫຼາຍຂໍ້ ທີ່ຈີນຮັບປາກ
ວ່າຈະປະຕິບັດຕາມ ໃນເວລາທີ່ຈີນຖືກຮັບເຂົ້າເປັນສະມາຊິກ ຂອງອົງການອະນາໄມໂລກ
ເມື່ອ 5 ປີກ່ອນນັ້ນ. ແຕ່ບໍ່ມີທາງທີ່ວ່າຈີນຈະປະຕິບັດການເກືອດຫ້າມທັນກໍານົດເສັ້ນຕາຍ
ຄືວັນອາທິດຈະມານີ້ໄດ້ .
ການທຳນາຍສຳລັບປີ 2030 ແມ່ນເພີ່ມຂຶ້ນຢ່າງຫລວງຫລາຍ ຈາກຈຳນວນຄົນຕາຍຍ້ອນ
ສາເຫດ ກ່ຽວພັນກັບຢາສູບຢູ່ໃນຈີນ ທີ່ມີຢູ່ປະມານ 1 ລ້ານ 2 ແສນຄົນ ໃນປັດຈຸບັນນີ້.
ລາຍງານເວົ້າອີກວ່າໃນປີ 2030 ຈຳນວນຄົນຕາຍຍ້ອນສູບຢາຈະກວມເອົາ 25% ຂອງຈຳ
ນວນຄົນທີ່ເສຍຊີວິດທັງໝົດໃນຈີນສົມທຽບກັບປະມານ 2 ຫາ 3% ຂອງຈຳນວນຄົນຕາຍ
ຍ້ອນໂຣກເອດສ໌.
