ສື່ມວນຊົນຈີນກ່າວວ່າ ວຽກໄດ້ເລີ້ມຂຶ້ນແລ້ວໃນການສ້າງທາງລົດໄຟສາຍເມືອງຄຸນໝິງຫາສິງກະໂປ ຊຶ່ງເປັນລາງລົດໄຟຄວາມໄວສູງ ທີ່ໃນບັ້ນສຸດທ້າຍນັ້ນ ກໍຈະເຮັດໃຫ້ການເດີນທາງລະຫວ່າງສອງຫົວເມືອງດັ່ງກ່າວ ໃຊ້ເວລາພຽງ 10 ຊົ່ວໂມງປາຍເທົ່ານັ້ນ.
ໜັງສືພິມ People’s Daily ທີ່ຄວບຄຸມໂດຍພັກຄອມມີວນິດຈີນກ່າວວ່າ ວຽກງານກ່ຽວກັບການສ້າງທາງລົດໄຟທີ່ລໍຄອຍກັນມາເປັນເວລາດົນນານ ໄດ້ເລີ້ມຂຶ້ນໃນວັນຈັນມື້ນີ້. ໄລຍະຫລືຊ່ວງທໍາອິດຂອງທາງລົດໄຟດັ່ງກ່າວ ຈະແລ່ນຈາກເມືອງຄຸນໝິງໃນພາກຕາເວັນຕົກຂອງຈີນໄປຍັງນະຄອນ ຫລວງວຽງຈັນຂອງ ສປປ ລາວ ແລະຊ່ວງຕໍ່ໆໄປແມ່ນຈະ ແລ່ນຜ່ານປະເທດໄທແລະມາເລເຊຍ ໄປຍັງສິງກະໂປ ຊຶ່ງ ຄາດວ່າການກໍ່ສ້າງຈະສໍາເລັດລົງພາຍໃນປີ 2020.
ທາງລົດໄຟໄລຍະຍາວ 3900 ຫລັກກິໂລແມັດທີ່ວ່ານີ້ ເປັນພາກສ່ວນນຶ່ງຂອງຕານ່າງທາງລົດໄຟຂ້າມເຂດເອເຊຍ ທີ່ຈະເຊື່ອມໂຍງໄປໃສ່ກັບຫວຽດນາມ ກໍາປູເຈຍແລະມຽນມານໍາ. ໜັງສືພິມ People’s Daily ເວົ້າວ່າ ຕານ່າງດັ່ງກ່າວຈະກໍ່ໃຫ້ ມີການຮ່ວມໄມ້ຮ່ວມມືກັນ ທາງການເມືອງແລະເສດຖະກິດທີ່ໃກ້ຊິດຂຶ້ນ ລະຫວ່າງ ຈີນແລະພວກປະເທດໃນເຂດລຸ່ມແມ່ນໍ້າຂອງ.
ຈິນໄດ້ເຈລະຈາເຮັດຂໍ້ຕົກລົງການຄ້າເສລີກັນແລ້ວກັບພວກປະເທດໃນກຸ່ມອາຊ່ຽນ.
