ນາຍົກລັດຖະມົນຕີ ຈີນ ທ່ານ ຫຼີ ເກີ້ຈຽງ ກຳລັງມ້ວນທ້າຍ
ການຢ້ຽມຢາມ ທະວີບຢູໂຣບ ບ່ອນທີ່ທ່ານ ໄດ້ລົງນາມ ໃນ
ຂໍ້ຕົກລົງ ດ້ານເສດຖະກິດ ຫຼາຍຊຸດ ແລະ ຂໍ້ຕົກລົງດ້ານ
ການຄ້າຕ່າງໆ.
ບັນດາປະເທດໃນທະວີບຢູໂຣບ ຈຳນວນນຶ່ງ ໄດ້ລົງຊື່ ເປັນ
ສະມາຊິກ ຂອງທະນາຄານລົງທຶນດ້ານພື້ນຖານໂຄງລ່າງ
ເອເຊຍໃໝ່ ທີ່ບາງຄົນມອງເຫັນວ່າ ເປັນຄູ່ແຂ່ງຂອງ
ທະນະຄານໂລກ ທີ່ມີສຳນັກງານໃຫຍ່ ຕັ້ງຢູ່ໃນສະຫະລັດນັ້ນ.
ຜູ້ສື່ຂ່າວວີໂອເອ Henry Ridgwell ມີລາຍງານຈາກ ນະຄອນ
ຫຼວງລອນດອນ ປະເທດອັງກິດ ຊຶ່ງໄຊຈະເລີນສຸກ ຈະນຳມາ
ສະເໜີທ່ານ ໃນອັນດັບຕໍ່ໄປ.
ເມື່ອອາທິດແລ້ວນີ້ ພົມສີແດງໄດ້ຖືກປູລົງ ໃນທົ່ວຫົວເມືອງຕ່າງໆ ຂອງປະເທດໃນເຂດທະວີບຢູໂຣບ ເພື່ອເປັນການຕ້ອນຮັບການຢ້ຽມຢາມ ຂອງນາຍົກລັດຖະມົນຕີ ຈີນ ທ່ານ ຫຼີ ເກີ້ຈຽງ. ສະພາບການປ່ຽນແປງຂອງດິນຟ້າອາກາດ ແມ່ນເລື້ອງນຶ່ງທີ່ມີຄວາມສຳຄັນສູງ
ຢູ່ໃນລາຍການກອງປະຊຸມ ແຕ່ເລື້ອງຂອງເສດຖະກິດ ແລະ ການຄ້າ ໄດ້ຄອບງຳການຢ້ຽມ
ຢາມໃນຄັ້ງນີ້.
ທ່ານ ຫຼີ ເວົ້າວ່າ “ພວກເຮົາ ຄວນຈະຂະຫຍາຍ ການລົງທຶນເຊິ່ງກັນແລະກັນ ແລະ
ແມ່ນກະທັງ ໃຫ້ມີການຮ່ວມມືກັນລົງທຶນ.”
ຈີນໄດ້ສ້າງພາຫະນະ ສຳຫລັບ ການຮ່ວມກັນລົງທຶນ ໃນດ້ານຂອງ ທະນາຄານລົງທຶນ
ດ້ານພື້ນຖານໂຄງລ່າງເອເຊຍ ຫຼື AIIB ທີ່ມີ 50 ສະມາຊິກ ຜູ້ສ້າງຕັ້ງທະນາຄານນັ້ນ
ລວມທັງ ອັງກິດ ຝຣັ່ງ ແລະ ເຢຍຣະມັນ. ວໍຊິງຕັນ ໄດ້ຊຸກຍູ້ໃຫ້ບັນດາພັນທະມິດ ຂອງ
ຕົນ ໃນເຂດທະວີບຢູໂຣບ ບໍ່ໃຫ້ລົງຊື່ເປັນສະມາຊິກກັບທະນາຄານດັ່ງກ່າວ.
ທະນາຄານ AIIB ມີເງິນທຶນຂັ້ນຕົ້ນຢູ່ແລ້ວ ມູນຄ່າ 100 ຕື້ໂດລາ.
ທ່ານ Raffaello Pantucci ຈາກສະຖາບັນ ບໍລິການ Royal United ເວົ້າວ່າ “ນັ້ນ
ແມ່ນຈຳນວນພື້ນຖານໂຄງລ່າງ ຢ່າງຫລວງຫຼາຍ ທີ່ຈະຕ້ອງໄດ້ພັດທະນາ ຢູ່
ເອເຊຍ ໃນພາກພື້ນນັ້ນຂອງໂລກ ທີ່ມີຄວາມຕ້ອງການຢ່າງແທ້ຈິງ. ສະນັ້ນ ໃນ
ຖານະ ຄະນະກຳມະການຂັ້ນເລີ້ມແລກ ໃນການຊ່ວຍກຳນົດທິດທາງ ທີ່ຈະກ້າວ
ໄປ, ຂ້າພະເຈົ້າຈຶ່ງຄິດວ່າ ມັນເປັນເລື້ອງທີ່ສຳຄັນແທ້ໆ.”
ບັນດານັກວິເຄາະ ກ່າວວ່າ ຈີນເລັງເຫັນວ່າ ທະນະຄານ AIIB ເປັນແນວທາງການຕອບໂຕ້ ອັນທີ່ປັກກິ່ງ ມອງເຫັນວ່າ ເປັນໂລກທີ່ອ່ຽງໄປທາງຂ້າງດຽວ ທີ່ໄດ້ຖືກຄອບງຳມາໂດຍ
ສະຫະລັດ. ນັກວິເຄາະທ່ານໜຶ່ງ ໄດ້ສົນທະນາກັບວີໂອເອ ຜ່ານທາງ Skype.
ທ່ານນາງ Olivia Gippner ຈາກສະຖາບັນເສດຖະສາດ ລອນດອນ ເວົ້າວ່າ “ສະຫະລັດ ມີສິດອອກສຽງຍັບຍັ້ງ ຢູ່ໃນອົງການກອງທຶນສາກົນ ຫຼື IMF ທັງມີສິດລົງຄະແນນ
ສຽງ ຍັບຍັ້ງ ຢູ່ໃນທະຄານໂລກເຊັ່ນກັນ. ການປະຕິຮູບໃນ IMF ຊຶ່ງໄດ້ຕົກລົງກັນ
ໃນປີ 2010 ຜ່ານມາ ໂດຍຄວາມເປັນຈິງແລ້ວ ບັນດາປະເທດທີ່ກຳລັງພັດທະນາ
ແມ່ນ ຄວນຈະໄດ້ຮັບສິດລະດັບສູງ ໃນການລົງຄະແນນສຽງ ແຕ່ແລ້ວ ຊ້ຳຖືກ
ສະກັດກັ້ນ ໂດຍສະຫະລັດ.”
ທ່ານ Pantucci ກ່າວວ່າ ວໍຊິງຕັນ ໄດ້ກ່າວສະແດງຄວາມເປັນຫ່ວງ ທີ່ທະນາຄານ AIIB
ອາດຈະນຳໃຊ້ເງິນທຶນ ເພື່ອເປົ້າໝາຍໃນທາງດ້ານຍຸດທະສາດ ແທນທີ່ຈະເປັນໄປໃນທາງ
ດ້ານເສດຖະກິດ. ທ່ານເວົ້າຕື່ມວ່າ ຫຼັກການທາງດ້ານການເງິນ ແມ່ນມັກຈະແຕກຕ່າງໄປ
ຈາກທະນາຄານໂລກ ຫຼື IMF.
ທ່ານ Pantucci ເວົ້າວ່າ “ໃນບາງບັນດາປະເທດ ຢູ່ໃນພາກພື້ນ ຂອງເອເຊຍກາງ
ຫຼື ເອເຊຍໃຕ້ ຊຶ່ງມີຄວາມຫຍຸ້ງຍາກ ໃນການຮັບມືກັບບາງສ່ວນຂອງຫຼັກການ
ທີ່ວາງໄວ້ ໂດຍທະນາຄານສາກົນຕ່າງໆ ຊຶ່ງທະນາຄານ AIIB ອາດສາມາດຊ່ວຍ
ເຫຼືອ ໃນບໍລິເວນດັ່ງກ່າວນັ້ນ ແທນໄດ້.”
ຈີນ ໄດ້ລົງນາມ ໃນຂໍ້ຕົກລົງດ້ານການຄ້າ ຫຼາຍໆຊຸດ ລວມທັງ ການນຳຊື້ ເຮືອບິນ
ໂດຍສານ Airbus ທີ່ຜະລິດໂດຍຢູໂຣບ ຈຳນວນ 45 ລຳ ໃນມູນຄ່າ 11 ຕື້ໂດລາ ແລະ
ການເປີດໂຮງງານ Airbus ຢູ່ໃນຈີນອີກດ້ວຍ.
ໃນຂະນະດຽວກັນ ປະທານາທິບໍດີ ສະຫະລັດ ທ່ານບາຣັກ ໂອບາມາ ກໍໄດ້ລົງນາມ ໃນ
ຮ່າງກົດໝາຍສະບັບໜຶ່ງ ເພື່ອເຮັດໃຫ້ເປັນກົດໝາຍ ທີ່ອະນຸມັດໃຫ້ທ່ານເອງ ຕິດຕາມໄດ້
ຢ່າງວ່ອງໄວ ກ່ຽວກັບການເຈລະຈາຂໍ້ຕົກລົງດ້ານການຄ້າຕ່າງໆ. ສະຫະລັດ ພວມນຳພາ
ພາຄີຂ້າມມະຫາສະມຸດປາຊີຟິກ ຫຼື TTP ທີ່ລວມມີ 12 ປະເທດ ຊຶ່ງຈະເຮັດໃຫ້ກາຍເປັນ
ການຄ້າ ກວມເອົາມູນຄ່າ 40 ເປີເຊັນຂອງໂລກນັ້ນ. ສ່ວນຈີນແມ່ນບໍ່ມີສ່ວນຮ່ວມ ຢູ່ໃນຂໍ້
ຕົກລົງດັ່ງກ່າວ.
