ຈີນປະກາດວ່າ ຕົນໄດ້ປະສົບຜົນສຳເລັດໃນການປ່ອຍດາວທຽມດວງນຶ່ງ ສຳລັບຖ່າຍທອດຂ່າວທີວີ ແລະວິທະຍຸ.
ອົງການຂ່າວຊິນຫົວຂອງທາງການຈີນເວົ້າວ່າ ດາວທຽມຊື່ SinoSat-6 ໄດ້ຖືກສົ່ງຂື້ນ ສູ່ອະວະກາດ ໃນຕອນເຊົ້າໆຂອງວັນອາທິດມື້ນີ້ ຈາກຖານປ່ອຍດາວທຽມທີ່ຕັ້ງຢູ່ທາງ ພາກຕາເວັນຕົກສຽງໃຕ້ຂອງແຂວງ Sichuan ນັ້ນ. ຊີນຫົວກ່າວອີກວ່າ ດາວທຽມດວງ ນີ້ຈະມີອາຍຸໃຊ້ໄດ້ 15 ປີ ແລະຈະໂຄຈອນ ໃນໄລຍະທາງຫລາຍກວ່າ 35,000 ກິໂລແມັດ ຢູ່ເໜືອເສັ້ນສູນສູດຂອງໂລກ.
ບໍລິສັດສື່ສານດາວທຽມຂອງຈີນ ຊຶ່ງເປັນຜູ້ບັງຄັບຄວບຄຸມດາວທຽມດວງນີ້ ກ່າວວ່າ ສ່ວນ ໃຫຍ່ແລ້ວ ດາວທຽມດວງນີ້ຈະເປັນຕົວຮັບສົ່ງສັນຍານການຖ່າຍທອດສົດ ທາງທີວີແລະ ວິທະຍຸ. ທາງບໍລິສັດກ່າວອີກວ່າ ດາວທຽມດວງນີ້ຈະປັບປຸງຊີວິດຄວາມເປັນຢູ່ທາງວັດທະ ນະທໍາໃຫ້ດີຂຶ້ນຢ່າງຫລວງຫລາຍ ສຳລັບພວກປະຊາຊົນທີ່ອາໃສຢູ່ ໃນເຂດສອກຫລີກ ແລະເຂດພູຜາໃນຈີນ.
ຈີນໄດ້ສົ່ງດາວທຽມ ລຸ້ນ SinoSat ດວງທຳອິດຂຶ້ນ ໃນປີ 1998.
