ລິ້ງ ສຳຫລັບເຂົ້າຫາ

ວັນຈັນ, ໑໕ ກໍລະກົດ ໒໐໒໔

ນາຍົກລັດຖະມົນຕີຈີນ ສະແດງຄວາມກັງວົນກ່ຽວກັບການຕອບໂຕ້ຕໍ່ຍານພາຫະນະ EV ແລະ ອຸດສາຫະກໍາສີຂຽວຂອງ ຈີນ


ນາຍົກລັດຖະມົນຕີຈີນ ທ່ານ ລີ ຈຽງ, ກ່າວປາໄສລະຫວ່າງການເປີດກອງປະຊຸມເສດຖະກິດໂລກ "Summer Davos" ໃນນະຄອນດາລຽນ, ຢູ່ແຂວງລຽວນິງ ທີ່ຕັ້ງຢູ່ທາງພາກຕາເວັນອອກສຽງເໜືອຂອງຈີນ, ວັນທີ 25 ມິຖຸນາ 2024.
ນາຍົກລັດຖະມົນຕີຈີນ ທ່ານ ລີ ຈຽງ, ກ່າວປາໄສລະຫວ່າງການເປີດກອງປະຊຸມເສດຖະກິດໂລກ "Summer Davos" ໃນນະຄອນດາລຽນ, ຢູ່ແຂວງລຽວນິງ ທີ່ຕັ້ງຢູ່ທາງພາກຕາເວັນອອກສຽງເໜືອຂອງຈີນ, ວັນທີ 25 ມິຖຸນາ 2024.

ນາຍົກລັດຖະມົນຕີຈີນ ທ່ານ ລີ ຈຽງ ໃນ​ວັນ​ອັງຄານ​ວານ​ນີ້ ໄດ້ຕອບໂຕ້​ຕໍ່​ການ​ປະນາມທີ່​ວ່າ ບັນດາ​ບໍລິສັດ​ຂອງ​ຈີນ​ໄດ້​ຮັບ​ເງິນ​ອຸດ​ໜູນ​ທີ່​ບໍ່​ຍຸຕິ​ທຳ, ​ແລະສະແດງ​ຄວາມ​ເປັນ​ຫ່ວງ​ກ່ຽວ​ກັບສະຖານະພາບຂອງ​ປະເທດທີ່ມີ​ເສດຖະກິດ​ໃຫຍ່​ອັນ​ດັບ​ສອງ​ຂອງ​ໂລກແຫ່ງນີ້.

ໃນການກ່າວ​ຄຳ​ເຫັນຢູ່​ທີ່​ການເປີດກອງ​ປະຊຸມ​ເວທີ​ປາ​ໄສ​ເສດຖະກິດ​ໂລກຂອງ​ລະດູ​ຮ້ອນດາໂວສ ຫຼື Summer Davos World Economic Forum ຢູ່​ນະຄອນດາລຽນ (Dalian) ທີ່ຕັ້ງຢູ່ທາງ​ພາກ​ຕາ​ເວັນ​ອອກ​ສຽງ​ເໜືອ​ຂອງ​ຈີນ, ທ່ານ ລີ ​ໄດ້​ກ່າວ​ເຖິງ​ຄວາມ​ສຳຄັນ​ຂອງ​ຕະຫຼາດແບບ​ເປີດ ​ແລະການພັດທະນາ​ເທັກ​ໂນ​ໂລ​ຈີສີຂຽວ.

ທ່ານ​ກ່າວ​ວ່າ “ພວກ​ເຮົາ​ບໍ່​ສາ​ມາດຫຼຸດຜ່ອນຄວາມໄວຂອງບາດກ້າວຂອງພວກເຮົາໃນ​ການ​ຫັນ​ປ່ຽນສູ່​ສີ​ຂຽວ ເພື່ອແລກປ່ຽນກັບ​ການ​ເຕີບໃຫຍ່ຂອງລະບົບເສດ​ຖະ​ກິດ​ໃນ​ໄລ​ຍະ​ສັ້ນ ຫຼື​ປະ​ຕິ​ບັດຕາມ​ລັດ​ທິ​ປົກ​ປັກ​ຮັກ​ສາ ​ໃນ​ນາມຂອງ​ການ​ພັດ​ທະ​ນາ​ສີ​ຂຽວ ຫຼື ​ການ​ປົກ​ປັກ​ຮັກ​ສາ​ສິ່ງ​ແວດ​ລ້ອມຕ່າງໆທັງຫຼາຍໄດ້.”

ຄຳປາ​ໄສ​ຂອງ ​ທ່ານ ລີ ມີ​ຂຶ້ນ​ໃນ​ຂະນະ​ທີ່ການຕອບໂຕ້ໃນທົ່ວໂລກເພີ້ມຂຶ້ນ​ ຕໍ່​ການ​ສົ່ງ​ອອກຍານພາຫະນະໄຟຟ້າ ຫຼື EV ຂອງ​ຈີນ ແລະ ກັງວົນວ່າ ພວກເຂົາ ກຳລັງໃຊ້ລົດໄຟຟ້າທີ່ມີລາຄາກຖືກກວ່າ ແລະເທັກໂນໂລຈີສີຂຽວອື່ນໆ ​ເພື່ອເຮັດໃຫ້ສິນຄ້າຫຼົ້ນຕະຫຼາດຕ່າງໆ, ນັບຕັ້ງແຕ່ ຢູໂຣບ ຫຼື EU ໄປຈົນເຖິງ ອາເມຣິກາເໜືອ.

ລັດຖະບານ ທ່ານ ໄບເດັນ ໄດ້ປະກາດແຜນການທີ່ຈະຂຶ້ນອັດຕາພາສີນໍາເຂົ້າລົດ EVs ທີ່ຜະລິດຈາກຈີນ ແລະຜະລິດຕະພັນກ່ຽວກັບພະລັງງານສະອາດອື່ນໆ ໃນເດືອນພຶດສະພາທີ່ຜ່ານມາ. ໃນຂະນະທີ່ EU ກໍາລັງດໍາເນີນການ​ກະກຽມທີ່​ຈະ​ເກັບ​ພາ​ສີ​ສຳລັບ​ຍານພາຫະນະ​ໄຟຟ້າ ເຊິ່ງຈະເລີ້ມຕົ້ນຂຶ້ນ​ໃນ​ເດືອນ​ໜ້ານີ້.

ໃນການກ່າວ​ຄຳ​ເຫັນ​ຕໍ່​ຜູ້ເຂົ້າຮ່ວມ​ຟັງ ເຊິ່ງເປັນ​ຊົນຊັ້ນສູງທາງ​ດ້ານ​ການ​ເມືອງ ​ແລະດ້ານທຸລະ​ກິດ, ທ່ານ ລີ ​ໄດ້​ປະນາມຕໍ່​ຄວາມ​ເຄັ່ງ​ຕຶງທາງ​ດ້ານ​ການ​ຄ້າ​ທີ່​ກຳລັງດຳເນີນຢູ່ ​ແລະໃນ​ອັນ​ທີ່​ທ່ານ​ຮ້ອງ​ວ່າ ການແຍກໂຕອອກຈາກກັນ, ​ໃນ​ຂະນະ​ທີ່​ ທ່ານ​ໝັ້ນ​ໃຈ​ວ່າ ​ເສດຖະກິດ​ຂອງ​ ຈີນ ກໍາລັງ​ເຕີບໃຫຍ່ຂຶ້ນ​ຢ່າງໄວວາ ​ແລະກໍາລັງ​ຢູ່​ໃນ​ເສັ້ນທາງ​ທີ່​ຈະ​ບັນລຸ​ເປົ້າ​ໝາຍ​ແຫ່ງການ​ເຕີບໃຫຍ່ຂະຫຍາຍໂຕ 5 ເປີເຊັນ​ຂອງ​ປັກ​ກິ່ງ​ໃນ​ປີ​ນີ້.

ອ່ານຂ່າວນີ້ເປັນພາສາອັງກິດ

ຟໍຣັມສະແດງຄວາມຄິດເຫັນ

XS
SM
MD
LG