ທ່ານ ລີ ຈຽງ (Li Qiang) ຂອງຈີນ ຈະເດີນທາງໄປເຖິງອອສເຕຣເລຍ ໃນວັນເສົານີ້ ຊຶ່ງເປັນການຢ້ຽມຢາມຄັ້ງທຳອິດ ຂອງນາຍົກລັດຖະມົນຕີຈີນ ນັບຕັ້ງແຕ່ປີ 2017, ເພື່ອເປັນສັນຍານຂອງສາຍພົວພັນທີ່ດີຂຶ້ນ, ນາຍົກ ລັດຖະມົນຕີ ອອສເຕຣເລຍ ທ່ານ ແອນໂທນີ ອາລບານີສ (Anthony Albanese) ກ່າວໃນວັນອັງຄານມື້ນີ້, ອີງຕາມອົງການຂ່າວ Reuters.
ໃນລະຫວ່າງການຢ້ຽມຢາມເປັນເວລາ 4 ວັນ, ທ່ານ ລີ (Li) ຈະໄປຢ້ຽມຢາມນະຄອນ ອາເດິເລດ (Adelaide) ຂອງລັດ ຊ້າວ ອອສເຕຣເລຍ, ນະຄອນຫຼວງ ແຄນເບີຣາ (Canberra), ແລະລັດບໍ່ແຮ່ ເວັສເຕີນອອສເຕຣເລຍ ຂອງອອສເຕຣເລຍ.
ທ່ານ ອາລບານີສ (Albanese) ກ່າວໃນກອງປະຊຸມສະຫຼູບກັບສື່ມວນຊົນໃນນະຄອນຫຼວງ ແຄນເບີຣາ (Canberra) ວ່າ ຜູ້ນຳທັງສອງ ຈະພົບປະກັບບັນດາຜູ້ນໍາທາງທຸລະກິດຂອງອອສເຕຣເລຍ ແລະຈີນ ທີ່ກອງປະຊຸມໂຕະມົນ ໃນລັດເວັສເຕີນອອສເຕຣເລຍ.
ຈີນແມ່ນຄູ່ຄ້າລາຍໃຫຍ່ທີ່ສຸດຂອງອອສເຕຣເລຍ, ໂດຍມີແຫຼ່ງຊັບພະຍາກອນ ແລະ ການສົ່ງອອກດ້ານພະລັງງານຂອງອອສເຕຣເລຍ ຄອບງຳກະແສການຄ້າ.
ອອສເຕຣເລຍ ເປັນຜູ້ສະໜອງແຮ່ເຫຼັກທີ່ໃຫຍ່ທີ່ສຸດໃຫ້ແກ່ຈີນ ແລະຈີນໄດ້ເປັນ ຜູ້ລົງທຶນໃນໂຄງການຂຸດຄົ້ນບໍ່ແຮ່ຂອງອອສເຕຣເລຍ, ເຖິງແມ່ນວ່າການລົງທຶນ ໃນບໍ່ແຮ່ທີ່ສຳຄັນຂອງຈີນ ໃນໄວໆນີ້ບາງສ່ວນ ຈະຖືກກີດກັ້ນໂດຍ ອອສເຕຣເລຍ ເນື່ອງຈາກຜົນປະໂຫຍດແຫ່ງຊາດກໍຕາມ.
ທ່ານ ອາລບານີສ (Albanese) ກ່າວວ່າການລົງທຶນຂອງຕ່າງປະເທດ ມີບົດບາດໃນອອສເຕຣເລຍ ແລະຖືກພິຈາລະນາເປັນກໍລະນີໄປ.
ທ່ານກ່າວວ່າ ການຮ່ວມມືຂອງຈີນ ລວມທັງໃນຂະແໜງຊັບພະຍາກອນ ແມ່ນມີຄວາມສຳຄັນຕໍ່ການເຕີບໂຕ.
ຈີນໄດ້ວາງຂໍ້ຈຳກັດທາງດ້ານການຄ້າຕໍ່ຜະລິດຕະພັນກະສິກຳ ແລະບໍ່ແຮ່ຂອງອອສເຕຣເລຍ ໃນລະຫວ່າງການຂັດແຍ້ງທາງດ້ານການທູດໃນປີ 2020, ເຊິ່ງໃນປັດຈຸບັນນີ້ ໄດ້ຜ່ອນຄາຍລົງເປັນສ່ວນໃຫຍ່.
ທ່ານ ອາລບານີສ (Albanese) ກ່າວວ່າ ທ່ານຢາກເຫັນສິ່ງກີດຂວາງທາງ ດ້ານການຄ້າ ທີ່ຍັງເຫຼືອຢູ່ຂອງຈີນ ກ່ຽວກັບກຸ້ງມັງກອນ ຫຼື ກຸ້ງລັອບສເຕີ ແລະອາຫານທະເລ ຖືກຍົກເລີກອອກໄປ.
ຟໍຣັມສະແດງຄວາມຄິດເຫັນ