ນັກຄົ້ນຄ້ວາກ່າວໃນບົດລາຍງານທີ່ພິມເຜີຍແຜ່ ໃນວັນພະຫັດມື້ນີ້ວ່າ ຈີນ ໄດ້ເລີ້ມກໍ່ສ້າງໂຮງງານໄຟຟ້າຖ່ານຫີນຂະໜາດ 94.5 ກິກາວັດ (gigawatts) ໃນປີ 2024, ເຊິ່ງເປັນປະລິມານການກໍ່ສ້າງໃໝ່ທີ່ສູງທີ່ສຸດ ນັບຕັ້ງແຕ່ປີ 2015 ເປັນຕົ້ນມາ, ໂດຍຂັດຂວາງການຫັນປ່ຽນອອກຈາກເຊື້ອໄຟຊາກສັດ ແລະພືດດຶກດໍາບັນຂອງປະເທດ.
ຜູ້ທີ່ນໍາໃຊ້ຖ່ານຫີນຫຼາຍທີ່ສຸດຂອງໂລກ ແລະເປັນຜູ້ປ່ອຍອາຍແກັສເຮືອນແກ້ວ ທີ່ເຮັດໃຫ້ເກີດຄວາມຮ້ອນໃນສະພາບອາກາດຫຼາຍທີ່ສຸດ ແລະໄດ້ໃຫ້ສັນຍາວ່າ ຈະ “ຄວບຄຸມຢ່າງເຂັ້ມງວດ” ໃນການນໍາໃຊ້ພະລັງງານຖ່ານຫີນ ລະຫວ່າງປີ 2021-2025, ແຕ່ຄວາມກັງວົນກ່ຽວກັບການຂາດແຄນພະລັງງານ ສົ່ງຜົນເຮັດໃຫ້ມີໂຄງການໃໝ່ໆເພີ້ມຂຶ້ນ ນັບຕັ້ງແຕ່ປີ 2023 ເປັນຕົ້ນມາ.
ທ່ານ ຈີ ຈິນ (Qi Qin), ນັກຄົ້ນຄວ້າຢູ່ສູນຄົ້ນຄວ້າກ່ຽວກັບພະລັງງານ ແລະ ອາກາດທີ່ສະອາດ ຫຼື CREA ກ່າວວ່າ “ຖ້າຖ່ານຫີນຍັງຄົງມີການນໍາໃຊ້ສູງໃນລະບົບພະລັງງານຂອງຈີນເປັນເວລາດົນນານເກີນໄປ, ມັນຈະເຮັດໃຫ້ເປົ້າໝາຍໃນການຫຼຸດການປ່ອຍອາຍແກັສລົງຢ່າງໄວວານັ້ນ ຍາກຂຶ້ນກວ່າເກົ່າ.”
ທ່ານ ຈີ, ເຊິ່ງເປັນຫົວໜ້າຜູ້ຂຽນບົດລາຍງານກ່າວວ່າ “ໃນທາງກົງກັນຂ້າມ, ນີ້ ອາດເຮັດໃຫ້ເກີດຄວາມທ້າທາຍສໍາລັບຄວາມພະຍາຍາມດ້ານສະພາບອາກາດຢູ່ໃນທົ່ວໂລກ, ໂດຍສະເພາະ ໃນເວລາທີ່ຫຼາຍໆປະເທດຄາດວ່າ ຈະເພີ້ມຄວາມທະເຍີທະຍານເພື່ອເປົ້າໝາຍຂອງພວກເຂົາເຈົ້າໃນປີ 2035.”
ການເພີ້ມຂຶ້ນຂອງພະລັງງານດັ່ງກ່າວ ເກີດຂື້ນເຖິງແມ່ນຄວາມສາມາດໃນການຜະລິດພະລັງງານໝູນວຽນຈະເພີ້ມຂຶ້ນເປັນປະຫວັດການໃນປີແລ້ວນີ້ ແລະອາດເຮັດມີຄວາມຫຍຸ້ງຍາກທີ່ຈະເຊື່ອມຕໍ່ພະລັງງານສະອາດເຂົ້າກັບຕາຂ່າຍໄຟຟ້າ, ອີງຕາມການເປີດເຜີຍຂອງບົດລາຍງານ, ທີ່ພີມເຜີຍແຜ່ໂດຍ CREA ແລະ ກຸ່ມຄົ້ນຄວ້າ Global Energy Monitor ຫຼື GEM.
ຈີນ, ຢຸດການນໍາໃຊ້ພະລັງງານຖ່ານຫີນທີ່ລ້າສະໄໝຫຼາຍກວ່າ 100 ກິໂລວັດ ໃນທົດສະວັດທີ່ຜ່ານມາ, ອີງຕາມອົງການຄຸ້ມຄອງພະລັງງານຂອງພວກເຂົາ, ແລະບັນດາໂຄງການໃໝ່ໆ ສາມາດສ້າງພະລັງງານທົດແທນ ເພື່ອສະໜອງການຮອງຮັບຂັ້ນພື້ນຖານເທົ່ານັ້ນ.
ໃນປີແລ້ວນີ້, ຈີນ ໄດ້ເລີ້ມການຜະລິດພະລັງງານລົມ ແລະພະລັງງານແສງຕາເວັນ 356 ກິໂລວັດ, ເຊິ່ງບັນລຸເປົ້າໝາຍຂອງປີ 2030 ທີ່ຕັ້ງເປົ້າການຜະລິດພະລັງງານໝູນວຽນໄວ້ 1,200 ກິໂລວັດ, ໂດຍໄວກວ່າກຳນົດເວລາ 6 ປີ.
ແນວໃດກໍ່ຕາມ, ພະລັງງານໝູນວຽນ ກໍາລັງພະຍາຍາມແຂ່ງຂັນ ສໍາລັບພື້ນທີ່ຢູ່ໃນໂຄງຂ່າຍໄຟຟ້າຂອງຈີນ, ໂດຍອັດຕາການນໍາໃຊ້ຫຼຸດລົງຢ່າງຫຼວງຫຼາຍ ກ່ອນປາຍປີທີ່ຜ່ານມາ, ອີງຕາມລາຍງານຂອງວັນພະຫັດມື້ນີ້.
