ຜູ້ນໍາຂອງຣັດເຊຍແລະຈີນໄດ້ປະກອບສ່ວນ ໃນພິທີຂີດ ໝາຍການໄຂພາກສ່ວນຂອງຈີນ ຂອງທໍ່ລໍາລຽງນໍ້າມັນອັນ ທໍາອິດລະຫວ່າງປະເທດທັງສອງ.
ໃນວັນຈັນມື້ນີ້ ປະທານາທິບໍດີຣັດເຊຍ ທ່ານ Dmitry
Medvedev ແລະປະທານປະເທດຈີນ ທ່ານ Hu Jintao
ໄດ້ເຂົ້າຮ່ວມໃນພິທີທີ່ນະຄອນຫລວງປັກກິ່ງ ເປີດພາກສ່ວນ
ຢູ່ໃນຈີນຂອງທໍ່ນ້ຳມັນ Siberia ຕາເວັນອອກ-Pacific
ຂອງຣັດເຊຍ ຊຶ່ງມີກໍານົດຈະເປີດໃຊ້ໂດຍເຕັມ ໃນເດືອນ ພະຈິກຈະມາເຖິງນີ້.
ນອກນີ້ ຜູ້ນຳທັງສອງຍັງໄດ້ລົງນາມໃນຂໍ້ຕົກລົງທີ່ຈະຮ່ວມກັນຕໍ່ສູ້ກັບລັດທິແບ່ງແຍກດິນແດນ ແລະລັດທິໃຊ້ຄວາມຮຸນແຮງ ແລະລົງນາມໃນສັນຍາຮ່ວມມືກັນໃນດ້ານພະລັງງານ, ການຄ້າສອງຝ່າຍ ແລະການລົງທຶນນຳອີກ.
ຮອງນາຍົກລັດຖະມົນຕີຣັດເຊຍ ທ່ານ Igor Sechin ກ່າວໃນວັນຈັນມື້ນີ້ວ່າ ທ່ານຄາດ
ໝາຍວ່າ ປະເທດທັງສອງຈະໄດ້ຕົກລົງກັນໄດ້ ພາຍໃນປີໜ້າກ່ຽວກັບເງື່ອນໄຂໃນຂໍ້ຕົກລົງ ສົ່ງແກ໊ສທໍາມະຊາດຈາກຣັດເຊຍສູ່ຈີນ ຊຶ່ງທ່ານ Sechin ເວົ້າວ່າແຜນການສົ່ງອອກນັ້ນ
ຄາດວ່າຈະເລີ່ມໃນປີ 2015.
ທ່ານ Medvedev ກໍາລັງຢູ່ໃນລະຫວ່າງການເຄື່ອນໄຫວຢ້ຽມຢາມຈີນເປັນເວລາ 3 ມື້
ຊຶ່ງໄດ້ເລີ່ມຂື້ນໃນວັນອາທິດວານນີ້.
