ພັນລະຍາຂອງນັກເຄື່ອນໄຫວດ້ານສິດທິມະນຸດຈີນທີ່ມີຊື່ສຽງຄົນນຶ່ງກ່າວວ່າ ສາມີຂອງນາງໄດ້ຖືກປ່ອຍໂຕໃນວັນອາທິດມື້ນີ້ຫລັງຈາກຮັບໃຊ້ໂທດໃນຄຸກເປັນເວລາດົນກວ່າ 3 ປີໃນຂໍ້
ຫາຖານຫາທາງໂຄ່ນລົ້ມລັດຖະບານ.ພັນລະຍາຂອງນາຍ Hu Jia ກ່າວຢູ່ໃນຂ່າວ Twitter ທາງ Internet ວ່ານາຍຫູ ປອດໄພແລະມີຄວາມດີອົກດີໃຈຫລາຍທີ່ຖືກປ່ອຍໂຕ.
ການຕັດສິນໂທດຈໍາຄຸກນາຍຫູ ເປັນເວລາ 3 ປີເຄິ່ງກໍານົດຈະໝົດອາຍຸລົງໃນວັນອາທິດມື້ນີ້.
ນາຍຫູຖືກຈໍາຄຸກໃນປີ 2008 ໃນເວລາພຽງບໍ່ເທົ່າໃດເດືອນກ່ອນເວລາການແຂ່ງຂັນກີລາໂອລິມປິກທີ່ກຸງປັກກິງໄຂຂຶ້ນ ຫລັງຈາກນາຍຫູໃຊ້ Internet ແລະໃຫ້ສໍາພາດກັບບັນດານັກຂ່າວເພື່ອເວົ້າເລື້ອງການລະເມີດສິດທິມະນຸດຕ່າງໆໃນຈີນນັ້ນ.
ການປ່ອຍໂຕນາຍຫູ ມີຂຶ້ນໃນເວລາພຽງບໍ່ເທົ່າໃດມື້ຫລັງຈາກນາຍ Ai Weiwei ນັກແຕ້ມຮູບທ່ີມີຊື່ສຽງຄົນນຶ່ງຂອງຈີນໄດ້ຮັບອະນຸຍາດໃຫ້ກັບຄືນບ້ານເຮືອນຂອງກຸ່ຽວໄດ້ຫລັງຈາກຖືກຕໍາຫລວດກັກໂຕຜູ້ກ່ຽວມາໄດ້ເກືອບ 3 ເດືອນ.
ພວກເພື່ອນຝູງຂອງນາຍ Ai Weiwei ກ່າວໃນວັນເສົາວານນີ້ວ່າ ເພື່ອນຮ່ວມງານຂອງ
ນາຍ Weiwei ຕື່ມອີກ 4 ຄົນກໍໄດ້ຖືກປ່ອຍໂຕໃນສັບປະດາຜ່ານມາເຊ່ນກັນ.
ເງື່ອນໄຂໃນການປະກັນໂຕນາຍ Ai Weiwei ອອກຈາກການຄຸມຂັງນັ້ນແມ່ນຫ້າມບໍ່ໃຫ້
ຜູ້ກ່ຽວເດີນທາງອອກຈາກກຸງປັກກິງ ຫລືກ່າວຖ້ອຍຖະແຫລງໃດໆຕໍ່ສື່ມວນຊົນ.
ການຈັບກຸມນາຍ Ai Weiwei ໄດ້ເປັນພາກສ່ວນນຶ່ງຂອງການປາບປາມຢ່າງກວ້າງຂວາງຕໍ່ພວກຕໍາໜິຕິຕຽນລັດຖະບານຈີນ ຊຶ່ງໄດ້ເລີ້ມຂຶ້ນມາໃນກາງເດືອນກຸມພາຜ່ານມາ.
