ວໍຊິງຕັນໄດ້ສົ່ງເຈົ້າໜ້າທີ່ທູດອະວຸໂສທ່ານນຶ່ງໄປຍັງປັກກິ່ງ ໃນຂະນະທີ່ ສະຫະລັດ
ພະຍາຍາມຈະລະງັບວິກິດການທາງການທູດ ກ່ຽວກັບ ການຫລົບໜີ ອອກຈາກ
ການກັກບໍລິເວນ ຂອງນາຍ Chen Guangchen ຊາວຈີນຕາບອດ ທີ່ຄັດຄ້ານລັດ
ຖະບານ ຊຶ່ງເວລານີ້ ບໍ່ຮູ້ຄັກແນ່ວ່າ ຢູ່ໃນຄວາມຄຸ້ມຄອງຂອງ ສະຫະລັດຫຼືບໍ່.
ທ່ານ Kurt Campbell ລັດຖະມົນຕີຊ່ອຍກະຊວງການຕ່າງປະເທດສະຫະລັດໄດ້ໄປ
ຮອດກຸງປັກກິງ ໃນເຊົ້າຂອງວັນອາທິດວານນີ້ ຊຶ່ງຄາດວ່າ ທ່ານຈະທໍາການໂອ້ລົມກັບ
ທາງການຈີນ ກ່ຽວກັບເລື່ອງນາຍ Chen ນີ້.
ທາງສະຫະລັດນັ້ນໄດ້ສະແດງຄວາມເປັນຫວ່ງເປັນໄຍ ນໍາຊະຕາກໍາຂອງນາຍ Chen
ແຕ່ກໍໄດ້ປະຕິເສດທີ່ຈະອອກຄໍາເຫັນ ກ່ຽວກັບວ່າຜູ້ກ່ຽວຢູ່ໃສທ່າມກາງທີ່ມີລາຍງານ
ຂ່າວ ທີ່ຢືນຢັນບໍ່ໄດ້ວ່າ ລາວໄດ້ໂຕນໜີເຂົ້າໄປຍັງສະຖານທູດອາເມຣິກາ
ໃນກຸງ ປັກກິງ.
ກຸ່ມອົງການເພື່ອສິດທິມະນຸດຈີນ ທີ່ມີສໍານັກງານຢູ່ທີ່ສະຫະລັດ ກ່າວວ່າ ເວລານີ້
ນາຍ Chen ແມ່ນຢູ່ພາຍໃຕ້ການຄຸ້ມຄອງຂອງສະຫະລັດ ແລະວ່າ ກໍາລັງມີການໂອ້ລົມ
ສົນທະນາ ລະຫວ່າງສະຫະລັດກັບຈີນ ກ່ຽວກັບເລື້ອງນີ້.
ປະທານຂອງອົງການ ChinaAid ທ່ານ Bob Fu ໄດ້ກ່າວກັບ VOA ໃນແລງວັນອາທິດ
ວານນີ້ວ່າ ເຖິງແມ່ນວ່ານາຍ Chen ປອດໄພດີ ແລະລີ້ຊ່ອນໂຕຢູ່ໃນບ່ອນທີ່ຫ່າງໄກຈາກ
ເຮືອນຂອງລາວກໍຕາມ ແຕ່ທາງອອກທາງດຽວທີ່ຍັງເຫລືອຢູ່ ສໍາລັບຜູ້ກ່ຽວ ກໍອາດ
ແມ່ນການໜີໄປຢູ່ສະຫະລັດ.
ອີງຕາມຂໍ້ມູນຈາກຄົນໃກ້ຊິດກັບນາຍ Chen ນັ້ນ ທ່ານ Fu ກ່າວວ່າ ໄດ້ມີຕໍາຫຼວດ
20 ກວ່າຄົນ ເຂົ້າໄປຈັບກຸມອ້າຍແລະຫຼານຊາຍຂອງນາຍ Chen ໃນເຊົ້າວັນສຸກ
ຜ່ານມາ ວັນດຽວກັນກັບທີ່ກ່າວກັນວ່າ ນາຍ Chen ໄດ້ໜີເຂົ້າໄປຂໍການຄຸ້ມກັນ
ຈາກສະຫະລັດນັ້ນ. ແຫຼ່ງຂ່າວດັ່ງກ່າວ ຍັງເວົ້າອີກວ່າ ພັນລະຍາ ລູກສາວແລະແມ່
ຂອງນາຍ Chen ຍັງຖືກກັກບໍລິເວນຢູ່ໃນບ້ານພັກຢ່າງໜາແໜ້ນຢູ່.
