ທະນາຍຄວາມດ້ານສິດທິຄົນນຶ່ງ ກ່າວວ່າ ອ້າຍຂອງນາຍ Chen Guangcheng ນັກເຄື່ອນໄຫວຕາບອດ ໄດ້ກັບຄືນໄປບ້ານຂອງລາວ ຢູ່ໃນພາກເໜືອຂອງຈີນແລ້ວ ຫຼັງຈາກໄດ້ເອົາຕົວຫຼົບໜີຈາກພວກຄົນຍາມ ເມື່ອ ວັນອັງຄານ ແລ້ວເດີນທາງໄປຍັງປັກກິ່ງນັ້ນ.
ທະນາຍຄວາມ Ding Xikui ກ່າວໃນວັນອາທິດມື້ນີ້ວ່າ ໝູ່ຄົນນຶ່ງໄດ້ບອກລາວວ່າ ນາຍ Chen Guangfu ໄດ້ກັບຄືນໄປໝູ່ບ້ານ Dongshigu ແລ້ວ ຫຼັງຈາກໄດ້ໄປຂໍຄໍາປຶກສາດ້ານກົດໝາຍທີ່ປັກກິ່ງ ກ່ຽວກັບການພິທັກປົກປ້ອງລູກຊາຍຂອງລາວ ຈາກອັນທີ່ລາວກ່າວວ່າ ຂໍ້ຫາທາງອາຍາ ທີ່ເປັນການແກ້ແຄ້ນ ນັ້ນ.
ນາຍ Chen Kegui ລູກຊາຍຂອງນາຍ Chen Guangfu ຖືກຂໍ້ຫາພະຍາຍາມຂ້າຄົນ ຫຼັງຈາກເກີດປະທະກັບພວກເຈົ້າໜ້າທີ່ ທີ່ໄດ້ບຸກເຂົ້າໄປໃນເຮືອນຂອງລາວ ຫຼັງຈາກຮູ້ວ່າອາວຂອງລາວໄດ້ຫຼົບໜີໄປ
ນາຍ Chen Guangcheng ໄດ້ຫຼົບໜີຈາກການຖືກກັກບໍລິເວນໃນເດືອນເມສາ ແລະໄປຂໍຄວາມຄຸ້ມກັນຈາກສະຖານທູດສະຫະລັດທີ່ກຸງປັກກິ່ງ ຍັງຜົນໃຫ້ເກີດການປະເຊີນໜ້າກັນ ທາງດ້ານການທູດ ລະຫວ່າງສະຫະລັດແລະຈີນ ຊຶ່ງໃນທີ່ສຸດກໍໄດ້ຖືກແກ້ໄຂຕົກລົງກັນໄດ້ ເວລາປັກກິ່ງອະນຸຍາດໃຫ້ນາຍ Chen ເດີນທາງ ໄປສະຫະລັດເພື່ອສຶກສາ.
ບັນດານັກເຄຶ່ອນໄຫວດ້ານສິດທິມະນຸດກ່າວວ່າ ພວກເຈົ້າໜ້າທີ່ຈີນໄດ້ເພີ່ມ ທະວີການປາບປາມ ຄອບຄົວຂອງນາຍ Chen Guangcheng ທີ່ໄດ້ຖືກກັກບໍລິເວນຢູ່ທີ່ບ້ານ Dongshigu ນັ້ນ.