ພວກເຈົ້າໜ້າທີ່ຄຸ້ມຄອງຊັບສິນຂອງຈີນ ຈະຫ້າມປະທານຂອງບໍລິສັດຊັບສິນຍັກໃຫຍ່ເອເວີແກຣນ (Evergrande) ຈາກຕະຫຼາດຫຼັກຊັບ ເປັນເວລາຕະຫຼອດຊີວິດ, ເຊິ່ງບໍລິສັດນີ້ໄດ້ປະສົບກັບບັນຫາ ຈະຕ້ອງໄດ້ຮັບການປັບໃໝຢ່າງໜັກໜ່ວງ, ອີງຕາມບໍລິສັດຍ່ອຍ ທີ່ໄດ້ກ່າວໃນວັນຈັນວານນີ້, ອີງຕາມລາຍງານຂອງອົງການຂ່າວ AFP.
ຄະນະກຳມະການຄຸ້ມຄອງຫຼັກຊັບຂອງຈີນ ຫຼື CSRC “ວາງແຜນຈະຕັດສິນເຫັນພ້ອມນຳການສັ່ງຫ້າມ ທ່ານສູ ເຈຍຢິນ (Xu Jiayin) ບໍ່ໃຫ້ເຂົ້າມາດໍາເນີນງານຢູ່ຕະຫຼາດຫຼັກຊັບອີກຕະຫຼອດຊີວິດ,” ອີງຕາມໜ່ວຍງານໃຫຍ່ ເຮັງດາ ຣຽວ ເອສເຕດ (Hengda Real Estate) ຂອງບໍລິສັດ ຕາມທີ່ກ່າວໃນເອກະສານທີ່ຍື່ນເຖິງຕະຫຼາດຫຼັກຊັບ ເຊັນເຊັນ (Shenzhen).
ແອບເວີແກຣນ "ໄດ້ຮັບແຈ້ງການລ່ວງໜ້າຈາກ CSRC ກ່ຽວກັບການລົງໂທດດ້ານການບໍລິຫານ ແລະການຫ້າມຂອງຕະຫຼາດທີ່ແນເປົ້າໝາຍໃສ່ພຶດຕິກໍາທີ່ຜິດກົດຫມາຍ ແລະບໍ່ໄດ້ຮັບອະນຸຍາດ," ອີງຕາມການກ່າວຂອງສຳເນົາເອກະສານ.
ບໍລິສັດເອງ ຈະ "ຖືກສັ່ງໃຫ້ແກ້ໄຂ ແລະອອກຄຳເຕືອນ ພ້ອມທັງປັບໃໝເປັນຈໍານວນເງິນ 4.175 ຕື້ຢວນ ຫຼື 580 ລ້ານໂດລາ."
ການຕັດສິນດັ່ງກ່າວ ຈະສະຫຼຸບວ່າ ທ່ານ ສູ "ໄດ້ທໍາການຕັດສິນໃຈ ແລະດໍາເນີນການສໍ້ໂກງທາງດ້ານການເງິນດ້ວຍການໃຊ້ວິທີການທີ່ຊົ່ວຮ້າຍ ແລະຢູ່ພາຍໃຕ້ສະຖານະການທີ່ຮ້າຍແຮງທີ່ສະເພາະເຈາະຈົງ", ອີງຕາມສຳເນົາເອກະສານ.
ທ່ານຍັງຈະ "ຖືກອອກຄຳເຕືອນ ແລະປັບໃໝໃນຈໍານວນເງິນ 47 ລ້ານຢວນ."
ຫນີ້ສິນມະຫາສານຂອງແອບເວີແກຣນ ໄດ້ກາຍມາເປັນສັນຍາລັກອັນສໍາຄັນກ່ຽວກັບວິກິດການຕະຫຼາດຊັບສິນຂອງຈີນ ມາເປັນເວລາຫຼາຍປີ, ໂດຍມີຜົນສະທ້ອນຕໍ່ລະບົບເສດຖະກິດຂະໜາດໃຫຍ່ອັນດັບສອງຂອງໂລກ.
ໃນເດືອນມັງກອນ, ສານຂອງຮົງກົງ ໄດ້ອອກຄໍາສັ່ງໃຫ້ຍຸຕິການປະຕິບັດງານສໍາລັບ ແອບເວີແກຣນ, ເຖິງແມ່ນບໍລິສັດກ່າວວ່າ ການດໍາເນີນງານຂອງຕົນຢູ່ໃນແຜ່ນດິນໃຫຍ່ ຈະບໍ່ໄດ້ຮັບຜົນກະທົບໃດໆຈາກການຕັດສິນກໍຕາມ.
ຟໍຣັມສະແດງຄວາມຄິດເຫັນ