ຈີນ ໃນວັນພຸດມື້ນີ້ ໃຫ້ການຢືນຢັນອີກເທື່ອນຶ່ງ ຕໍ່ການຂົ່ມຂູ່ທີ່ຈະໃຊ້ກຳລັງທະຫານ ເພື່ອນຳເອົາໄຕ້ຫວັນມາຢູ່ພາຍໃຕ້ການຄວບຄຸມຂອງຕົນ ທ່າມກາງການຊ້ອມລົບທາງທະຫານ ທີ່ໄດ້ກໍ່ໃຫ້ເກີດຄວາມເຄັ່ງຕຶງໃນລະດັບສູງສຸດລະຫວ່າງທັງສອງຝ່າຍໃນຮອບຫຼາຍໆປີ ອີງຕາມລາຍງານຂອງອົງການຂ່າວເອພີ.
ມີການອອກຖະແຫຼງການ ໂດຍຫ້ອງການກິດຈະການຂອງລັດຖະບານ ແລະພະແນກຂ່າວຂອງໄຕ້ຫວັນ ເກືອບນຶ່ງອາທິດຫຼັງຈາກມີການຍິງລູກສອນໄຟແລະການແລ່ນລ່ວງລ້ຳເຂົ້າໄປໃນເຂດນ່ານນ້ຳ ແລະເຂດອາກາດຂອງກຳປັ່ນລົບແລະເຮືອບິນຂອງກອງທັບອາກາດຈີນ.
ການຊ້ອມລົບຂອງຈີນໄດ້ລົບກວນຖ້ຽວບິນ ແລະການຂົນສົ່ງຢູ່ໃນຂົງເຂດທີ່ມີຄວາມສຳຄັນຕໍ່ຕ່ອງໂສ້ອຸບປະທານໃນການສະໜອງສິນຄ້າຂອງໂລກ ຊຶ່ງໄດ້ພາໃຫ້ມີການປະນາມຢ່າງແຮງຈາກສະຫະລັດ ຍີ່ປຸ່ນ ແລະປະເທດອື່ນໆອີກ.
ຖະແຫຼງການເປັນພາສາອັງກິດຂອງຈີນ ກ່າວວ່າ ປັກກິ່ງຈະ “ເຮັດວຽກດ້ວຍຄວາມຈິງໃຈເປັນທີ່ສຸດ ແລະທຸ້ມເທຄວາມພະຍາຍາມສູງສຸດ ເພື່ອໃຫ້ມີການບັນລຸການທ້ອນໂຮມປະເທດເຂົ້າເປັນນຶ່ງດຽວຢ່າງສັນຕິ.”
ຖະແຫຼງການກ່າວຕໍ່ໄປຕື່ມວ່າ “ແຕ່ພວກເຮົາຈະບໍ່ປະຕິເສດເຖິງການໃຊ້ກຳລັງ ແລະພວກເຮົາຂໍສະຫງວນທ່າທີກ່ຽວກັບທາງເລືອກເພື່ອຈະນຳໃຊ້ທຸກມາດຕະການທີ່ຈຳເປັນ. ນີ້ແມ່ນເພື່ອຄຸ້ມຄອງຕໍ່ການແຊກແຊງ ຂອງພາຍນອກ ແລະກິດຈະກຳແບ່ງແຍກດິນແດນ.”
ຖະແຫຼງການຍັງເວົ້າວ່າ “ພວກເຮົາແມ່ນກຽມພ້ອມສະເໝີເພື່ອຈະນຳໃຊ້ກຳລັງຫຼືວິທີການທີ່ຈຳເປັນອື່ນໆຕໍ່ການເຂົ້າແຊກແຊງຂອງກຳລັງພາຍນອກຫຼືການເຄື່ອນໄຫວແບບຫົວຮຸນແຮງຂອງພວກແບ່ງແຍກດິນແດນ. ເປົ້າໝາຍຂັ້ນສຸດທ້າຍຂອງພວກເຮົາກໍແມ່ນເພື່ອຄ້ຳປະກັນໂອກາດ ໃນການທ້ອນໂຮມຊາດດ້ວຍສັນຕິວິທີ ແລະຂັ້ນຕອນໃນການສ້າງຄວາມກ້າວໜ້າຂອງຈີນ.”
ຈີນກ່າວວ່າ ການເຄື່ອນໄຫວແບບຂົ່ມຂູ່ມີຂຶ້ນຫຼັງຈາກການເດີນທາງໄປຢ້ຽມຢາມຂອງປະທານສະພາຕ່ຳສະຫະລັດ ທ່ານນາງແນນຊີ ເພໂລຊີ ໃນອາທິດແລ້ວ ແຕ່ໄຕ້ຫວັນກ່າວວ່າ ການຢ້ຽມຢາມໃນທຳນອງນີ້ ແມ່ນມີຂຶ້ນຢູ່ເປັນປະຈຳແລະຈີນໄດ້ນຳໃຊ້ເຫດການດັ່ງກ່າວ ເພື່ອເປັນຂໍ້ແກ້ຕົວ ສຳລັບເພີ້ມທະວີການຂົ່ມຂູ່ຂອງຕົນ.
ນອກເໜືອໄປຈາກການຕອບໂຕ້ຕໍ່ການຢ້ຽມຢາມຂອງທ່ານນາງເພໂລຊີແລ້ວ ຈີນຍັງກ່າວວ່າ ຕົນໄດ້ຢຸດເຊົາການເຈລະຈາ ກ່ຽວກັບຫຼາຍໆບັນຫາ ນັບແຕ່ຄວາມໝັ້ນຄົງທາງທະເລ ໄປຫາການປ່ຽນແປງຂອງດິນຟ້າອາກາດ ກັບສະຫະລັດ ຊຶ່ງເປັນຜູ້ໃຫ້ການສະໜັບສະໜຸນທາງດ້ານທະຫານ ແລະການເມືອງຂອງໄຕ້ຫວັນ.
ລັດຖະມົນຕີການຕ່າງປະເທດຂອງໄຕ້ຫວັນ ໄດ້ເຕືອນໃນວັນອັງຄານວານນີ້ວ່າ ການຊ້ອມລົບທາງທະຫານຂອງຈີນໄດ້ສະທ້ອນໃຫ້ເຫັນເຖິງຄວາມມັກໃຫຍ່ໄຝ່ສູງທີ່ຈະເຂົ້າຄວບຄຸມບໍລິເວນອັນກວ້າງຂວາງໃນເຂດມະຫາສະໝຸດປາຊີຟິກຕາເວັນຕົກ ໃນຂະນະທີ່ໄທເປເອງກໍໄດ້ເລີ້ມທຳການຊ້ອມລົບທາງທະຫານ ເພື່ອສະແດງໃຫ້ເຫັນເຖິງຄວາມພ້ອມ ໃນການປ້ອງກັນໂຕຂອງຕົນ.
ອ່ານຂ່າວນີ້ຕື່ມເປັນພາສາອັງກິດ
