ຜູ້ບໍລິຫານລະດັບສູງຢູ່ບໍລິສັດການລົງທຶນທີ່ໄດ້ຮັບການໜູນຫຼັງໂດຍ ຈີນ ທີ່ສຳຄັນແຫ່ງນຶ່ງແມ່ນກຳລັງຢູ່ພາຍໃຕ້ການສືບສວນສອບສວນສຳລັບການສໍ້ລາດບັງຫຼວງ, ອົງການຕໍ່ຕ້ານການສໍ້ລາດບັງຫຼວງຂອງລັດຖະບານໄດ້ກ່າວໃນວັນອາທິດວານນີ້, ໃນຂະນະທີ່ການປາບປາມຢ່າງບໍ່ລົດລະຕໍ່ການສໍ້ໂກງໄດ້ແຜ່ລາມໃນຂະແໜງການເງິນ.
ທ່ານ ຊູ ໂຊ, ຮອງປະທານກຸ່ມ China Citic ແມ່ນ “ຖືກສົງໄສ ກ່ຽວກັບ ການລະເມີດລະບຽບວິໄນ ແລະ ກົດໝາຍຮ້າຍແຮງ,” ຄະນະກຳມາທິການສູນກາງສຳລັບການກວດກາລະບຽບວິໄນຂອງພັກຄອມມູນິສ ໄດ້ກ່າວໃນຖະແຫຼງການທາງອອນໄລນ໌, ໂດຍບໍ່ໄດ້ໃຫ້ລາຍລະອຽດເພີ່ມເຕີມ.
ກຸ່ມ Citic ແມ່ນກຸ່ມບໍລິສັດການລົງທຶນທີ່ດຳເນີນການໂດຍລັດຖະບານທີ່ໃຫຍ່ ເຊິ່ງມີຊັບສິນທັງໝົດເທົ່າກັບ 1.5 ພັນຕື້ໂດລາໃນປີກາຍນີ້, ອີງຕາມເວັບໄຊ້ທາງການຂອງເຂົາເຈົ້າ.
ທ່ານ ຊູ, ນັກເສດຖະກິດອາວຸໂສທີ່ມີພື້ນຖານ ກ່ຽວກັບ ການເຂົ້າຊື້ກິດຈະການໃນຕ່າງປະເທດ ແລະ ການປັບປຸງໂຄງສ້າງໃໝ່, ແມ່ນໄດ້ເປັນຄະນະກຳມະການບໍລິຫານໃຫຍ່ຂອງບໍລິສັດນັບຕັ້ງແຕ່ປີ 2019.
ປະທານປະເທດ ຈີນ ທ່ານ ສີ ຈິ່ນຜິງ ໄດ້ດຳເນີນການປາບປາມເກືອບວ່າຢ່າງສະໝ່ຳສະເໝີຕໍ່ເຈົ້າໜ້າທີ່ໆສໍ້ລາດບັງຫຼວງ ນັບຕັ້ງແຕ່ໄດ້ເຂົ້າກຳອຳນາດນຶ່ງທົດສະວັດທີ່ຜ່ານມາ.
ຜູ້ສະໜັບສະໜູນເວົ້າວ່າ ການຕໍ່ສູ້ດັ່ກ່າວຈະສະໜັບສະໜູນໃຫ້ມີລັດຖະບານທີ່ສະອາດ, ໃນຂະນະທີ່ນັກວິຈານໂຕ້ຖຽງວ່າມັນຍັງຈະເຮັດໜ້າທີ່ເປັນພາຫະນະສຳລັບທ່ານ ສີ ທີ່ຈະກວາດລ້າງຄູ່ແຂ່ງທາງການເມືອງ.
ຟໍຣັມສະແດງຄວາມຄິດເຫັນ