ເຖິງແມ່ນໄດ້ມີບັນຫາຂັດແຍ່ງເລື້ອງເຂດນໍ້າແດນດິນກັບຍີ່ປຸ່ນໃນຫວ່າງໄວມານີ້ກໍຕາມ ແຕ່
ນາຍົກລັດຖະມົນຕີ Wen Jiabao ກໍໄດ້ທໍາຄວາມພະຍາຍາມເປັນພິເສດໃນຕອນເສັດສິ້ນ
ການໃຫ້ສໍາພາກຂ່າວເປັນເວລາ 2 ຊົ່ວໂມງ ຂອງທ່ານໃນວັນຈັນທີ່ຜ່ານມານີ້ ທີ່ຈະສະແດງ
ຄວາມເຫັນອອກມາກ່ຽວກັບຄວາມພະຍາຍາມໃນການຟື້ນໂຕຄືນຈາກໄພພິບັດທໍາມະຊາດ
ທີ່ຍີ່ປຸ່ນນັ້ນ ຊຶ່ງທ່ານ Wen ກ່າວວ່າ:
ທ່ານ Wen Jiabao ໄດ້ສະແດງຄວາມເສົ້າເສຍໃຈຂອງປະເທດຈີນຕໍ່ການສູນເສຍຊີວິດ
ຍ້ອນໄພແຜ່ນດິນໄຫວຄັ້ງຮ້າຍແຮງແລະຄື້ນຟອງຍັກຊຶນາມິ ໃນຍີ່ປຸ່ນ ແລະໄດ້ສະແດງ
ຄວາມເຫັນອົກເຫັນໃຈຕໍ່ປະຊາຊົນຊາວຍີ່ປຸ່ນນໍາດ້ວຍ.
ທ່ານເຫວີນ ເຈ້ຍບາວ ກ່າວວ່າ ຈີນມີຄວາມເຫັນອົກເຫັນໃຈ ກໍເພາະວ່າຈີນກໍເປັນປະ
ເທດທີ່ມັກປະເຊີນກັບໄພແຜ່ນດິນໄຫວເຊ່ນກັນ ແລະທ່ານໄດ້ກ່າວເຖິງການຊ່ອຍເຫລືອ
ຂອງຍີ່ປຸ່ນໃຫ້ແກ່ຈີນ ຫລັງຈາກເກີດແຜ່ນດິນໄຫວໃນເຂດເຫວີ້ນຈວນໃນປີ 2008 ນັ້ນ.
ຈີນໄດ້ໃຫ້ການຊ່ອຍເຫລືອດ້ານມະນຸດສະທໍາແກ່ຍີ່ປຸ່ນເປັນມູນຄ່າ 4 ລ້ານ 5 ແສນໂດລາ
ແລະທີມຊ່ອຍກູ້ໄພຂອງຈີນຄະນະນຶ່ງກໍໄດ້ເດີນທາງໄປຮອດຍີ່ປຸ່ນໃນວັນອາທິດຜ່ານມາ
ນີ້. ທ່ານເຫວີນຍັງກ່າວຕື່ມວ່າ ຈີນຕຽມພ້ອມທີ່ຈະໃຫ້ການຊ່ອຍເຫລືອເພີ່ມອີກ ຖ້າຫາກ
ມີຄວາມຕ້ອງການຕື່ມອີກ.
ທ່ານ Wen Jiabao ໄດ້ມີຄວາມເຫັນດັ່ງກ່າວ ໃນຕອນມ້ວນທ້າຍກອງປະຊຸມຖະແຫລງ
ຂ່າວເປັນເວລາຍາວນານ ຊຶ່ງເປັນຂີດໝາຍວາລະອັດກອງປະຊຸມປະຈໍາປີຂອງສະພາປະຊາ
ຊົນແຫ່ງຊາດຈີນ.
ໃນຕອນເຊົ້າວັນຈັນ ກ່ອນໜ້າການຖະແຫລງຂ່າວນັ້ນ ສະມາຊິກສະພານິຕິບັນຍັດເກືອບ
3 ພັນຄົນໄດ້ລົງມະຕິຮັບຮອງເອົາແຜນການພັດທະນາເສດຖະກິດສັງຄົມ 5 ປີ ຊຸດຕໍ່ໄປ ທີ່
ໄດ້ວາງເປົ້າໝາຍຕ່າງໆທັງໝົດຂອງຄະນະນໍາພາຄອມມີວນິດໄວ້ ນັບແຕ່ປີນີ້ ໄປຮອດປີ
2015.
ທ່ານ Wen ກ່າວວ່າ ນຶ່ງໃນຄວາມເປັນຫ່ວງທີ່ສໍາຄັນຂອງລັດຖະບານສໍາລັບປີນີ້ ກໍຄືການ
ຄວບຄຸມສະພາວະເງິນເຟີ້ ຊຶ່ງທ່ານກ່າວວ່າ:
ນາຍົກລັດຖະມົນຕີເຫວິ້ນເຈຍບາວເວົ້າວ່າ “ສະພາວະເງິນເຟີ້ນີ້ ກໍຄືກັບເສືອໂຕນຶ່ງ
ເວລາໃດເຮົາປ່ອຍເສືອອອກໄປ ມັນກໍຈະເປັນການຍາກຫລາຍທີ່ເອົາມັນກັບຄືນ
ມາເຂົ້າຄອກໄດ້.”
ທ່ານກ່າວຕໍ່ໄປວ່າ ມີຫລາຍສາເຫດພາຍນອກສໍາລັບສະພາວະເງິນເຟີ້ນີ້ ໂດຍສະເພາະແລ້ວ
ກໍແມ່ນລາຄານໍ້າມັນແລະພວກອາຫານປະເພດເມັດທີ່ແພງຂຶ້ນຢູ່ໃນຕະຫລາດໂລກ. ທ່ານຍັງ
ຖິ້ມໂທດໃສ່ອັນທີ່ເອີ້ນວ່າ ນະໂຍບາຍປ່ອຍເງິນອອກສູ່ເສດຖະກິດໃນປະເທດຕ່າງໆເຊ່ນ ສະ
ຫະລັດນັ້ນ ວ່າພາໃຫ້ເກີດອັນທີ່ທ່ານບັນລະຍາຍວ່າ ເປັນການລອຍໂຕຂຶ້ນໆລົງໆຢ່າງໃຫຍ່
ໃນອັດຕາແລກປ່ຽນເງິນຕາແລະຄ່າສິນຄ້າຫລັກຕ່າງໆນັ້ນ.
ຊຶ່ງທ່ານເຫວິ້ນເຈຍບາວກ່າວວ່າ “ຄ່າແຮງງານ ແລະຄ່າສິນຄ້າພື້ນຖານທີ່ສູງຂຶ້ນໃນ
ຈີນ ກໍເປັນສາເຫດທີ່ພາໃຫ້ເກີດສະພາວະເງິນເຟີ້ເພີ່ມຂຶ້ນເຊ່ນກັນ.”
ນາຍົກລັດຖະມົນຕີຈີນຍອມຮັບວ່າ ການປະຕິຮູບທາງດ້ານການເມືອງນັ້ນແມ່ນຈໍາເປັນ ຖ້າ
ຈະໃຫ້ປະສົບກັບຄວາມສໍາເລັດສືບຕໍ່ໄປໃນການປັບປຸງເສດຖະກິດໃຫ້ດີຂຶ້ນນັ້ນ. ແຕ່ທ່ານ
ເຫວີນບໍ່ໄດ້ໃຫ້ລາຍລະອຽດຫຍັງຫລາຍ ແລະທ່ານກ່າວວ່າ ການປະຕິຮູບດ້ານການເມືອງ
ໃນຈີນຈະເປັນຂັ້ນຕອນທີ່ຄ່ອຍເປັນຄ່ອຍໄປເທື່ອລະກ້າວ.
ໃນຂະນະດຽວກັນ ທ່ານເຫວິນເຈຍບາວ ກ່າວວ່າ ມັນບໍ່ຖືກຕ້ອງທີ່ຈະສົມທຽບຈີນໃສ່ກັບ
ສະພາວະການເມືອງທີ່ປັ່ນປ່ວນໃນພາກຕາເວັນອອກກາງນັ້ນ ຊຶ່ງທ່ານກ່າວຕໍ່ໄປວ່າ ທາງ
ລັດຖະບານຈີນມີຄວາມຮູ້ສຶກວ່າ ຊີວິດການເປັນຢູ່ຂອງປະຊາຊົນຊາວຈີນທໍາມະດາສາມັນໄດ້
ດີຂຶ້ນເຖິງຂັ້ນທີ່ວ່າ ບັດນີ້ຈີນເປັນເສດຖະກິດທີ່ໃຫຍ່ອັນດັບສອງຂອງໂລກແລ້ວ. ໃນເວລາ
ດຽວກັນ ທ່ານກໍຍອມຮັບວ່າ ມີບັນຫາບົ່ມຊ້ອນຫລາຍຢ່າງ ຮວມທັງຄວາມຈິງທີ່ວ່າ ຈີນ
ເປັນປະເທດພວມພັດທະນາທີ່ມີພົນລະເມືອງເປັນຈໍານວນຫລວງຫລາຍ ແລະອັນທີ່ທ່ານ
ເອີ້ນວ່າ ພື້ນຖານເສດຖະກິດທີ່ອ່ອນແອ ແລະການພັດທະນາທີ່ບໍ່ສະໝໍ່າສະເໝີ.
