ປະທານປະເທດຈີນໃຫ້ຄຳໝັ້ນສັນຍາວ່າ ຈະໃຫ້ການຊ່ອຍເຫຼືອແບບບໍ່ເຫັນແກ່ຕົວ ແກ່ອັຟການິສຖານ ໃນວັນສຸກມື້ນີ້ ໃນຂະນະທີ່ຜູ້ນໍາຂອງປະເທດທັງສອງ ໄດ້ຕົກລົງທີ່ຈະຍົກລະດັບການຄ້າ ການຊ່ວຍເຫລືອ ການລົງທືນ ແລະຄວາມສໍາພັນດ້ານຄວາມໝັ້ນຄົງ.
ຢູ່ໃນການພົບປະທີ່ສາລາປະຊາຊົນໃນກຸງປັກກິ່ງ ປະທານປະເທດ Hu Jintao ໄດ້ ແຈ້ງໃຫ້ປະທານາທິບໍດີອັຟການິສຖານ ທ່ານ Hamid Karzai ວ່າ ຈີນຈະສືບຕໍ່ໃຫ້ການຊ່ວຍເຫລືອແກ່ອັຟການິສຖານ ໃນຂະນະທີ່ປະເທດດັ່ງກ່າວກໍາລັງກ້າວ ເຂົ້າສູ່ໄລຍະການປ່ຽນແປງທີ່ຫຼໍ່ແຫຼມສຳຄັນ.
ຈີນ ກໍາລັງວາງທ່າທີເພື່ອເອົາບົດບາດທີ່ໃຫ່ຍຂຶ້ນຢູ່ໃນອັຟການິສຖານ ລຸນຫຼັງ ການຖອນທະຫານສ່ວນໃຫຍ່ຂອງສະຫະລັດ ແລະກໍາລັງທະຫານນາໆຊາດອຶ່ນໆ ພາຍໃນທ້າຍປີ 2014.
ຜູ້ນໍາທັງສອງໄດ້ລົງນາມໃນຂໍ້ຕົກລົງການເປັນພາຄີຍຸດທະສາດ ຊຶ່ງພາຍໃຕ້ຂໍ້ ຕົກລົງນີ້ຈີນກ່າວວ່າ ຈະຊຸກຍູ້ໃຫ້ມີການລົງທຶນຂອງຈີນເພີ່ມຂຶ້ນ ຊ່ວຍສ້າງໂຄງ ລ່າງພື້ນຖານ ໃຫ້ທຶນການສຶກສາແກ່ບັນດານັກຮຽນອັຟການິສຖານ ແລະໃຫ້ ການຊ່ວຍເຫລືອ 24 ລ້ານໂດລາ ໃນປີນີ້. ແລະປະທານາທິບໍດີ Karzai ໄດ້ ກ່າວຂອບອົກຂອບໃຈປະທານຫູ ກ່ຽວກັບການໃຫ້ການຕ້ອນຮັບແບບອົບອຸ່ນ ຂອງທ່ານ.
ໃນຖະແຫລງການຮ່ວມທີ່ນຳອອກເຜີຍແຜ່ຫລັງຈາກພົບປະກັນແລ້ວນັ້ນ ທັງສອງຝ່າຍພາກັນປະນາມ ພວກກໍ່ການຮ້າຍ ພວກຫົວຮຸນແຮງຈັດ ພວກແບ່ງແຍກດິນແດນ ແລະກຸ່ມຈັດຕັ້ງອາຊະຍາກຳ.