ຟີລິບປິນກ່າວຫາຈີນວ່າ ກໍາລັງສົ່ງພວກກໍາປັ່ນລັດຖະບານແລະເຮືອປະມົງໃນຈໍານວນ
ຫຼາຍຂຶ້ນໄປຍັງໝູ່ເກາະທີ່ເປັນບັນຫາໂຕ້ແຍ່ງກັນໃນທະເລຈີນໃຕ້ໃນການເຄື່ອນໄຫວທີ່
ກຸງມານີລາກ່າວວ່າ ກໍາລັງເຮັດໃຫ້ການປະເຊີນໜ້າກັນມາເປັນເວລາ 2 ເດືອນແລ້ວນັ້ນ
ເພີ່ມທະວີຄວາມຮ້າຍແຮງຂຶ້ນ.
ທ່ານ Raul Hernandez ໂຄສົກປະຈໍາກະຊວງການຕ່າງປະເທດຟີລິບປິນກ່າວໃນ
ວັນພຸດມື້ນີ້ວ່າ ມີເຮືອຈີນເກືອບ 100 ລໍາຢູ່ໃນເຂດໝູ່ເກາະ Scarborough. ໂຄສົກ
ກ່າວຕໍ່ໄປວ່າ ມີການສັງເກດເຫັນວ່າ ພວກເຮືອບາງລໍາກໍາລັງທໍາການຫາປາເຖິງແມ່ນ
ທັງສອງປະເທດໄດ້ປະກາດຫວ່າງໄວໆມານີ້ ຫ້າມທໍາການຫາປາໃນຂົງເຂດດັ່ງກ່າວ
ນັ້ນກໍຕາມ.
ທ່ານ Hernandez ຮຽກຮ້ອງໃຫ້ຈີນຖອນເຮືອເຫຼົ່ານີ້ ອອກໄປຈາກຂົງເຂດດັ່ງກ່າວ
ໃນທັນທີ ໂດຍກ່າວວ່າ ກຸງມານີລາໄດ້ທໍາການປະທ້ວງຢ່າງເປັນທາງການກັບສະຖານ
ທູດຈີນແລ້ວ ກ່ຽວກັບການເພີ່ມທະວີການເຄື່ອນໄຫວທີ່ວ່ານີ້ ແລະກ່າວຕື່ມວ່າເວລານີ້
ກໍາລັງມີການໂອ້ລົມສົນທະນາກັນ ເພື່ອແກ້ໄຂບັນຫາຂັດແຍ່ງກັນນີ້.
ທັງຈີນແລະຟີລິບປິນຕ່າງຝ່າຍຕ່າງກໍໄດ້ ອອກຂໍ້ຫ້າມທໍາການຫາປາຢູ່ໃນເຂດດັ່ງກ່າວ
ເມື່ອນຶ່ງສັບປະດາຜ່ານມາ ໃນຄວາມພະຍາຍາມເພື່ອຜ່ອນຄາຍຄວາມເຄ່ງຕຶງລົງກ່ຽວ
ກັບໝູ່ເກາະດັ່ງກ່າວ ຊຶ່ງທັງສອງປະເທດຕ່າງກໍອ້າງວ່າເປັນດິນແດນໃນອະທິປະໄຕ
ຂອງຕົນນັ້ນ.