ກໍາປັ່ນລົບລຳນຶ່ງຂອງຈີນທີ່ແລ່ນໄປຄາຫາດ ຢູ່ໃນເຂດນ່ານນໍ້າທີ່ມີການຂັດແຍ່ງກັນ ຢູ່ ໃກ້ກັບຟີລິບປິນໃນວັນພຸດທີ່ຜ່ານມານັ້ນສາມາດແລ່ນອອກໄປຈາກບໍລິເວນດັ່ງກ່າວໄດ້ແລ້ວໃນວັນອາທິດມື້ນີ້ແລະພວມເດີນທາງມຸ້ງໜ້າກັບຄືນປະເທດ. ຖະແຫລງການຂອງ ກະຊວງປ້ອງກັນປະເທດຈີນເວົ້າວ່າ ພະນັກງານຂອງຕົນປອດໄພ ແລະກໍ່າປັ່ນດັ່ງກ່າວ
ແມ່ນໄດ້ຮັບຄວາມເສຍຫາຍໜ້ອຍນຶ່ງ.
ກໍາປັ່ນຂອງຈີນລຳນີ້ພວມຢູ່ໃນທະເລຈີນໃຕ້ ເວລາມັນແລ່ນໄປຄາຫາດທີ່ເປັນຮູບພະຈັນ
ເຄິ່ງດວງ ໃນບໍລິເວນໝູ່ເກາະ Spratly ປະມານ 110 ກິໂລແມັດ ຫ່າງຈາກແຄມຝັ່ງທະ
ເລ ເກາະປາລາວານຂອງຟີລິບປິນຢູ່ທາງຕາເວັນຕົກຂອງປະເທດນັ້ນ. ຫາດດັ່ງກ່າວນີ້ ແມ່ນຢູ່ພາຍໃນເຂດເສດຖະກິດພິເສດຂອງຟີລິບປິນໂດຍ ຊຶ່ງຕັ້ງຢູ່ໃນລັດສະໝີ 370 ກິ
ໂລແມັດ ແລະຢູ່ໃນເຂດທີ່ເຊື່ອກັນວ່າ ມີຄວາມອຸດົມສົມບູນໄປດ້ວຍແຮ່ທາດຕ່າງໆນັ້ນ.
ຟີລິບປິນ, ຈີນ, ໄຕ້ຫວັນ, ບຣູໄນ, ມາເລເຊຍ ແລະຫວຽດນາມຕ່າງກໍໄດ້ອ້າງເອົາກໍາມະ
ສິດທັງໝົດ ຫລືບໍ່ກໍສ່ວນໃດສ່ວນນຶ່ງຂອງໝູ່ເກາະ Spratly. ບັນຫາ ຂັດແຍ້ງດັ່ງກ່າວໄດ້ທໍາລາຍບັນຍາກາດຂອງກອງປະຊຸມປະຈໍາປີຂອງລັດຖະມົນ ຕີກະຊວງການຕ່າງ
ປະເທດ ຂອງສະມາຄົມບັນດາປະຊາຊາດໃນເຂດເອເຊຍຕາເວັນອອກສຽງໃຕ້ ຫຼືອາ
ຊ່ຽນ ທີ່ຈັດຂຶ້ນໃນອາທິດແລ້ວນີ້ ໃນກໍາປູເຈຍຊຶ່ງລັດຖະມົນຕີກະຊວງການຕ່າງປະເທດ
ຟີລິບປິນໄດ້ກ່າວຫາຈີນວ່າ ການບໍ່ຊື່ກົງຫຼອກລວງແລະ ໃຊ້ການນາບຂູ່.
ກະຊວງການຕ່າງປະເທດຂອງຟີລິບປິນເວົ້າວ່າ ຕົນກໍາລັງຕິດຕາມແລະສືບສວນສອບ
ສວນເບິ່ງສະພາບ ທີ່ພາໃຫ້ກໍ່າປັ່ນຂອງຈີນແລ່ນໄປຄາຫາດດັ່ງກ່າວນັ້ນ.