ບໍລິສັດນໍາທ່ຽວຈີນຫລາຍໆບໍລິສັດໄດ້ໂຈະການທ່ອງທ່ຽວໄປຍັງປະເທດຟິລິບປິນ ທ່າມກາງການປະເຊີນໜ້າມາເປັນເວລານຶ່ງເດືອນທີ່ເພີ່ມທະວີຂຶ້ນນັບມື້ ໃນເຂດໝູ່ເກາະ Scarborough ທີ່ບໍ່ມີຄົນຢູ່ອາໄສໃນທະເລ
ຈີນໃຕ້ນັ້ນ.
ອົງການຂ່າວຊິນຫົວ ກ່າວເມື່ອວັນພະຫັດມື້ນີ້ວ່າ ບໍລິສັດ Ctrip.com ຊຶ່ງ ເປັນບໍລິສັດນໍາທ່ຽວແລະຈໍາໜ່າຍປີ້ຍົນທາງອິນເທີເນັດໃຫຍ່ທີ່ສຸດຂອງຈີນ ແລະບໍລິສັດອື່ນໆອີກຫລາຍບໍລິສັດ ໄດ້ໂຈະການເດີນທາງໄປທ່ອງທ່ຽວໃນ ຟິລິບປິນ ແລະຈະບໍ່ຮັບການຈອງລ່ວງໜ້າໃດໆໄປຈົນກວ່າສະຖານະການ ຈະດີຂື້ນ.
ການປະເຊີນໜ້າກັນດັ່ງກ່າວ ແມ່ນໄດ້ເລີ່ມຕົ້ນເມື່ອວັນທີ່ 10 ເດືອນເມສາ ເວລາກໍ່າປັ່ນລາດຕະເວນຈີນ ກີດກັນກໍ່າປັ່ນລົບຂອງຟິລິບປິນລໍານຶ່ງ ບໍ່ໃຫ້ ຈັບກຸມຊາວປະມົງຈີນຢູ່ ໃນເຂດນ່ານນໍ້າທີ່ຍັງມີການຖົກຖຽງໂຕ້ແຍ້ງໃກ້ໆ ໝູ່ Scarborough ຊຶ່ງທັງສອງຝ່າຍຕ່າງກໍອ້າງວ່າ ເປັນເຂດນໍ້າແດນດິນທີ່ຢູ່ໃຕ້ອຳນາດອະທິປະໄຕຂອງຕົນນັ້ນ.
ກະຊວງຕ່າງປະເທດຈີນ ກ່າວເມື່ອຕົ້ນອາທິດນີ້ວ່າ ຕົນບໍ່ໄດ້ຄິດໃນແງ່ດີປານໃດກ່ຽວກັບການແກ້ໄຂບັນຫາຂັດແຍ້ງ ດັ່ງກ່າວ ແລະວ່າຕົນພ້ອມແລ້ວທີ່ຈະຕອບໂຕ້ ຕໍ່ການເຮັດໃຫ້ສະຖານະການເພີ່ມທະວີຄວາມຮ້າຍແຮງຂຶ້ນ ໃດໆກໍຕາມ ໂດຍຝ່າຍຟິລິບປິນ.
ເມື່ອວັນພະຫັດມື້ນີ້ ສື່ມວນຊົນຂອງທາງການຈີນ ໄດ້ໃຫ້ຮ່ອງຮອຍວ່າອາດເກີດມີສົງຄາມກັນໄດ້ ຖ້າຫາກວ່າການຂັດແຍ້ງ ກັນບໍ່ໄດ້ຮັບແກ້ໄຂໃນບໍ່ຊ້ານີ້. ບົດບັນນາທິການບົດນຶ່ງ ທີ່ລົງພິມໃນໜັງສືພິມ China Daily ນັ້ນ ເວົ້າວ່າ ປັກກິ່ງຢາກໃຫ້ມີການຕົກລົງກັນຢ່າງສັນຕິວິທີ ແຕ່ກໍຢືນຢັດວ່າ ລັດຖະບານມະນິລາກໍາລັງກົດດັນຈີນ ໃຫ້ຈົນມຸມທີ່ສຸດແລ້ວ ເຖິງຂັ້ນທີ່ວ່າອາດບໍ່ມີທາງເລືອກອື່ນໃດອີກ ນອກຈາກຈະໃຊ້ອາວຸດເທົ່ານັ້ນ.