ຈີນໄດ້ຮ່ວມກັບປະເທດອື່ນໆຫລາຍໆປະເທດສະແດງຄວາມຍິນດີນໍາການເສຍຊີວິດຂອງນາຍໂອຊາມາບິນລາເດັນ ວ່າເປັນການເຄື່ອນໄຫວໃນທາງບວກອັນນຶ່ງ.
ຜ່ານມາ ກຸງປັກກິງໄດ້ກ່າວຕໍາໜິຕິຕຽນເລື້ອຍໆຕໍ່ການລິເລີ້ມຕ່າງໆໃນດ້ານນະໂຍບາຍຕ່າງປະເທດຂອງສະຫະລັດ ໂດຍສະເພາະໃນເອເຊຍນັ້ນ. ແຕ່ທ່ານນາງ Jiang Yu ໂຄສົກປະຈໍາກະຊວງການຕ່າງປະເທດຈີນ ໄດ້ກ່າວເນ້ນຢູ່ໃນຖະແຫລງການສະບັບນຶ່ງໃນແລງວັນຈັນວານນີ້ວ່າ ຈີນກໍເປັນປະເທດນຶ່ງທີ່ໄດ້ຮັບຄວາມເສຍຫາຍຈາກການກໍ່ການຮ້າຍນັ້ນເຊ່ນກັນ.
ທ່ານນາງ Jiang ກ່າວວ່າ ຈີນເຊື່ອວ່າຄໍາປະກາດການເສຍຊີວິດຂອງ ນາຍບິນລາເດັນນີ້ ເປັນເຫດການສໍາຄັນແລະເປັນການເຄື່ອນໄຫວໃນທາງບວກອັນນຶ່ງໃນການຕໍ່ສູ້ຂອງສາກົນຕໍ່ຕ້ານການກໍ່ການຮ້າຍນັ້ນ.
ທ່ານນາງ Jiang ກ່າວຕື່ມວ່າ ພວກປະເທດຕ່າງໆຄວນຈະດໍາເນີນງານຮ່ວມກັນເພື່ອຕໍ່ສູ້ກັບ
ພວກກໍ່ການຮ້າຍໃນຂະນະດຽວກັນກໍພະຍາຍາມຫາທາງຖອນຮາກພວກສາເຫດຕົ້ນຕໍຕ່າງໆ
ທີ່ຫລໍ່ລ້ຽງລັດທິກໍ່ການຮ້າຍນັ້ນ.
