ຈີນ ໄດ້ອອກຄຳສັ່ງໃຫ້ປິດເມືອງເບສີ (Baise) ຢູ່ທາງພາກຕາເວັນຕົກສຽງໃຕ້ປະເທດ ຫຼັງຈາກໄດ້ພົບເຫັນຫຼາຍກວ່າ 70 ກໍລະນີ ໃນໄລຍະສາມມື້ທີ່ຜ່ານມາ
ພວກເຈົ້າໜ້າທີ່ ໄດ້ສັ່ງໃຫ້ປະຊາຊົນທີ່ຢູ່ໃນເມືອງໃກ້ກັບຊາຍແດນຫວຽດນາມດັ່ງກ່າວ ໃຫ້ພາກັນຢູ່ບ້ານເຮືອນໃນວັນຈັນວານນີ້ ອະນຸຍາດໃຫ້ອອກຈາກບ້ານເຮືອນແຕ່ໄປຊື້ສິ່ງຂອງທີ່ຈຳເປັນໄດ້ ຫຼືໄປໂຄວິດ-19. ພວກເຈົ້າໜ້າທີ່ທ້ອງຖິ່ນໄດ້ຊັກຊວນໃຫ້ປະຊາຊົນໃຊ້ການບໍລິການນຳສົ່ງ ແທນທີ່ຈະເດີນທາງໄປຮ້ານຄ້າໃນເວລາໃດທີ່ເປັນໄປໄດ້. ເມືອງເບສີ ມີປະຊາຊົນຢູ່ປະມານ 3 ລ້ານ 6 ແສນຄົນ.
ການປິດເມືອງມີຂຶ້ນໃນຂະນະທີ່ຈີນ ເປັນເຈົ້າພາບ ຈັດການແຂ່ງຂັນກິລາໂອລິມປິກລະດູໜາວປີ 2022 ໃນນະ ຄອນຫຼວງປັກກິ່ງ ທີ່ຢູ່ພາຍໃຕ້ການຄວບຄຸມຢ່າງເຄັ່ງຄັດ ເພື່ອປ້ອງກັນການແຜ່ລະບາດຂອງໄວຣັສໂຄໂຣນາ ທີ່ພາໃຫ້ເປັນໂຄວິດ-19 ນັ້ນ.
ນັກຫຼິ້ນກິລາແລ່ນສະເກັດນໍ້າກ້ອນອາເມຣິກັນທ້າວວິນສັນ ຊູ (Vincent Zhou) ໄດ້ກ່າວໃນວັນຈັນວານນີ້ວ່າ ລາວໄດ້ຖອນອອກຈາກການແຂ່ງຂັນຫຼັງຈາກກວດ ພົບຕິດເຊື້ອໂຄວິດ-19. ທ້າວຊູໄດ້ແຈ້ງຂ່າວດັ່ງກ່າວ ໂດຍວີດີໂອ ທີ່ອອກໃນ ອິນສຕາແກຣມ ດ້ວຍນໍ້າຕາ.
ໃນຂະນະດຽວກັນ ອອສເຕຣເລຍໄດ້ກ່າວໃນວັນຈັນວານນີ້ວ່າ ຕົນໄດ້ເປີດຊາຍແດນ ແລະພ້ອມແລ້ວທີ່ຈະຕ້ອນຮັບບັນດາຜູ້ເດີນທາງທີ່ໄດ້ສັກຢາວັກຊີນມາຈາກທົ່ວໂລກ ເລີ້ມແຕ່ວັນທີ 21 ກຸມພານີ້ເປັນຕົ້ນໄປ.
ນາຍົກລັດຖະມົນຕີສະກັອດ ມໍຣຣິສັນ (Scott Morrison) ກ່າວວ່າ “ຖ້າຫາກ ທ່ານໄດ້ສັກຢາວັກຊີນສອງເທື່ອ ພວກເຮົາຍິນດີທີ່ຈະຕ້ອນຮັບທ່ານກັບຄືນມາ ອອສເຕຣເລຍ.” ນະໂຍບາຍການປິດປະເທດໄດ້ເຮັດໃຫ້ອຸດສາຫະ ກຳທ່ອງທ່ຽວຂອງປະເທດຕົກຢູ່ໃນຖານະລຳບາກ.
ຢູ່ທີ່ນະຄອນອົດຕາວາ (Ottawa) ນະຄອນຫຼວງການາດາ ໃນວັນຈັນວານນີ້ ຕຳຫຼວດໄດ້ຍຶດນໍ້າມັນຫຼາຍພັນລິດ ອັນເປັນພາກສ່ວນນຶ່ງໃນການທັບມ້າງເພື່ອໃຫ້ຢຸດເຊົາການປະທ້ວງ ໂດຍພວກຂັບລົດບັນທຸກທີ່ຄັດຄ້ານຕໍ່ຂໍ້ຈຳກັດໂຄວິດ-19. ເຈົ້າຄອງນະຄອນ ທ່ານຈິມ ວັດສັນ (Jim Watson) ໄດ້ປະກາດພາວະສຸກເສີນຢູ່ທີ່ນະຄອນດັ່ງກ່າວໃນວັນອາທິດທີ່ຜ່ານມາ ຫຼັງຈາກການເດີນຂະບວນປະທ້ວງກ້າວເຂົ້າສູ່ອາທິດທີສອງ.
