ຈີນເລີ້ມນຳໃຊ້ຫໍປະພາຄານ ຢູ່ໃນເກາະທຽມເກາະນຶ່ງຂອງທີ່ສ້າງຂຶ້ນຢູ່ໃນທະເລຈີນໃຕ້ ອັນເປັນການເຄື່ອນໄຫວທີ່ມີທ່າທາງວ່າຈະສ້າງຄວາມເຄັ່ງຕຶງເພີ້ມຂຶ້ນລະຫວ່າງຈີນແລະບັນດາປະເທດເພື່ອນບ້ານຢູ່ໃນຂົງເຂດດັ່ງກ່າວ.
ອົງການຂ່າວຊິນຫົວຂອງທາງການຈີນ ລາຍງານວ່າ ຫໍປະພາຄານ ທີ່ສູງ 55 ແມັດ ຢູ່ທີ່ເກາະ Subi ໄດ້ເປີດໃຊ້ ໃນວັນອັງຄານແລ້ວນີ້ ໃນພິທີທີ່ຈັດຂຶ້ນ ໂດຍການນຳພາຂອງເຈົ້າໜ້າທີ່ກະຊວງຂົນສົ່ງຂອງຈີນ. ເກາະ Subi ຊຶ່ງເປັນສ່ວນນຶ່ງຂອງໝູ່ເກາະ Spratly ນັ້ນເປັນນຶ່ງໃນຫຼາຍໆເກາະຫີນທີ່ເຄີຍຈົມຢູ່ພື້ນນ້ຳ ແຕ່ຈີນໄດ້ຫັນປ່ຽນໃຫ້ກາຍເປັນເກາະທີ່ມີທາງແລ່ນຂອງເຮືອບິນ ແລະສະຖານທີ່ອຳນວຍຄວາມສະດວກອື່ນໆ. ຈີນບໍ່ໄດ້ເອົາຫົວຊາຕໍ່ການອ້າງກຳມະສິດກວມກັນ ເອົາເກາະດັ່ງກ່າວຂອງຟີລິບປິນ ຫວຽດນາມ ໄຕ້ຫວັນ ແລະ ປະເທດອື່ນໆອີກ. ເຮືອບິນພົນລະເຮືອນຂອງຈີນໄດ້ທົດສອບເບິ່ງທາງແລ່ນໂດຍນຳເອົາເຮືອບິນ ລົງຈອດຢູ່ທີ່ເກາະ Fiery Cross ຊຶ່ງເປັນສ່ວນນຶ່ງ ຂອງໝູ່ເກາະ Spratly ໃນເດືອນມັງກອນປີນີ້.
ຈີນກ່າວອ້າງວ່າ ຫໍປະພາຄານທີ່ເກາະ Subi ແມ່ນອອກແບບ ແນໃສ່ເພື່ອໃຫ້ການຊ່ອຍເຫລືອໃນການຄຸ້ມຄອງຄວາມປອດໄພທາງທະເລ ແລະການປະຕິບັດງານຊອກຄົ້ນຫາຕ່າງໆ. ນອກນັ້ນ ຈີນຍັງກຳລັງສ້າງຫໍປະພາຄານ ໃສ່ອີກສອງເກາະດອນ ຢູ່ໃນເຂດໝູ່ເກາະ Spratly.
