ຊາວຈີນທົ່ວປະເທດພາກັນສະຫລອງປີໃໝ່ປີເຖາະດ້ວຍການ
ຈູດກະໂພກແລະບັ້ງໄຟດອກ ຢ່າງຟົດຟື້ນນອງນັນ ແລະມີ
ສີສັນຫລາກຫລາຍ ຊຶ່ງເປັນປະເພນີທີ່ມີມາແຕ່ດຶກດໍາບັນ
ເພື່ອຂັບໄລ່ຜີສາງ ແລະເພື່ອໃຫ້ນໍາໂຊກລາບມາໃຫ້.
ພວກພີ່ນ້ອງໄດ້ມາເຕົ້າໂຮມກັນຢູ່ນອກບ້ານ ໃນຕອນທ່ຽງ
ຄືນຂອງວັນພຸດວານນີ້ ເພື່ອຈູດແລະຊົມການຈູດກະໂພກ
ແລະບັ້ງໄຟດອກ ຕ້ອນຮັບການມາເຖິງຂອງປີໃໝ່ ແລະສະ
ແດງຄວາມຫວັງ ແລະຄວາມຢ້ານກົວຕ່າງໆ ຂອງພວກເຂົາ ເຈົ້າ ສໍາລັບໄລຍະ 12 ເດືອນຕໍ່ໜ້ານີ້.
ນາງລີຢັງ ເຮັດວຽກຢູ່ໃນ Forbiden City
ຫລືເຂດພະລາດຊະວັງເກົ່າ ແລະໃຊ້ເວລາ
ໃນຄືນສົ່ງທ້າຍປີເກົ່າ ຕ້ອນຮັບປີໃໝ່ຢູ່ກັບ
ຄອບຄົວຂອງລາວ ເຮັດຂະໜົມກິນກັນ
ຕາມປະເພນີ ກ່ອນຈະພາກັນອອກໄປເບິ່ງ ການຈູດບັ້ງກະໂພກນັ້ນ.
ນາງລີຢັງກ່າວວ່າ ນາງຫວັງວ່າຈະມີການ
ເຕີບໂຕທາງເສດຖະກິດທີ່ລາບລື່ນສໍາລັບ
ຄອບຄົວ ແລະປະເທດຊາດ ຂອງລາວ.
ນາງລີຢັງກ່າວອີກວ່າ ນາງເຊື່ອໃຈໃນລັດຖະບານ ຊຶ່ງນາງເວົ້າວ່າ ມີຄວາມສາມາດຈະນໍາພາ
ປະເທດຊາດກ້າວເດີນໄປຂ້າງໜ້າ ແລະປັບປຸງຊີວິດຄວາມເປັນຢູ່ຂອງປະຊາຊົນຈີນໃຫ້ດີຂື້ນ.
ແຕ່ກໍບໍ່ແມ່ນວ່າທຸກໆຄົນຈະມອງເຫັນສະພາບການໃນແງ່ດີ. ນາຍ ໝາ ຊົ່ງຮົວ ເປັນຄົນຂັບ
ແທ໊ກຊີ້ ທີ່ທໍາງານຂັບແທ໊ກຊີ້ເພື່ອຫາເງິນໃນໄລຍະວັນພັກນີ້.
ນາຍ ໝາ ຊົ່ງຮົ່ວ ກ່າວວ່າ ມັນ
ເປັນການຍາກລໍາບາກຫລາຍຂຶ້ນ
ເລື້ອຍໆທີ່ຈະຫາເງິນມາລ້ຽງປາກ
ລ້ຽງທ້ອງໃຫ້ກຸ້ມໄປຈົນຮອດໝົດ
ເດືອນໄດ້. ລາວຄິດວ່າ ເວລານີ້
ມັນແທບຈະເປັນໄປບໍ່ໄດ້ສໍາລັບ
ລາວເອງ ທີ່ຈະຫາເງິນໄດ້ຢ່າງ
ພຽງພໍ ເພື່ອຊື້ບ້ານຢູ່ອາໃສ
ເນຶ່ອງຈາກລາຄາບ້ານເຮືອນ ແພງເກີນໄປໂພດ.
ແຕ່ຄືກັບຊາວຈີນສ່ວນຫລາຍນັ້ນ
ນາຍໝາ ຊົ່ງຮົ່ວ ກໍຫວັງຢາກ
ເຫັນສັງຄົມແລະປະເທດຊາດ ທີ່ຈະເຣີນຮຸ່ງເຮືອງ.
ປີຂານ ຫລືປີເສືອ ທີ່ຫາກໍສິ້ນສຸດລົງໄປນັ້ນ ເປັນປີທີ່ທັງດີແລະບໍ່ດີ ສໍາລັບປະເທດຈີນ.
ການເຕີບໂຕທາງເສດຖະກິດທີ່ໜ້າປະທັບໃຈ ຍັງດໍາເນີນສືບຕໍ່ມາ ແຕ່ວ່າສະພາວະເງິນເຟີ້
ແລະລາຄາຊັບສິນ ທີ່ກໍາລັງຖີບຕົວສູງຂື້ນນັບມື້ນັ້ນ ໄດ້ ສ້າງຄວາມລໍາບາກຍາກແຄ້ນໃຫ້ແກ່ ຊາວຈີນຫລາຍໆຄົນ.
ນອກນີ້ແລ້ວ ການນັດປະທ້ວງຢຸດງານ ແລະຄ່າແຮງເພີ່ມສູງຂື້ນນັ້ນ ກໍໄດ້ສ້າງຄວາມສັ່ນສະ ເທືອນໃຫ້ແກ່ປະເທດຊາດ.
ຄືກັນກັບພວກຫາເລາະຊື້ເຄຶ່ອງຂອງໃນຕະຫລາດປີໃໝ່ນັ້ນ ລັດຖະບານຈີນກໍມີຄວາມເປັນ
ຫ່ວງເປັນໃຍຄືກັນ. ທ່ານ ເຫວີີນ ເຈ້ຍບ່າວ ນາຍົກລັດຖະມົນຕີຈີນກ່າວໃນສຸນທອນພົດ
ເນຶ່ອງໃນວັນດິຖີປີໃໝ່ນັ້ນວ່າ ລັດຖະບານຈະພະຍາຍາມຄວບຄຸມລາຄາເຄຶ່ອງອຸບປະໂພກ ບໍລິໂພກໃຫ້ທຸ່ນທ່ຽງ.
ແຕ່ທ່ານເຫວິນ ຍັງໄດ້ຕຸກເຕືອນພວກຊາວຈີນທັງຫລາຍວ່າ ພວກເຂົາເຈົ້າ ແມ່ນຈະຕ້ອງ
ໄດ້ຈັດການກັບບັນຫາທີ່ຫຍຸ້ງຍາກຫລາຍສິ່ງຫລາຍປະການ ໃນປີຕໍ່ໜ້າ.
ໃນປະເທດຈີນ ເຖິງແມ່ນຈະມີຄໍາເຕືອນດັ່ງກ່າວນີ້ກໍຕາມ ປະຊາຊົນສ່ວນໃຫຍ່ກໍກໍາລັງ
ສວາຍໂອກາດໃນວັນພັກຍາວສຸດສັບປະດາ ເພື່ອໃຊ້ເວລາ ຢູ່ກັບພວກຄົນທີ່ຮັກແພງຂອງ
ຕົນ ເບິ່ງການຈູດກະໂພກແລະບັ້ງໄຟດອກ ແລະຫວັງໃຫ້ມີ ສັນຕິພາບແລະຄວາມຈະເຣີນ ຮຸ່ງເຮືອງໃນປີເຖາະປີນີ້.
// ສຽງຮ້ອງໂຮວ່າ “ສຸກສັນວັນປີໃໝ່” ຂອງພວກຊາວໜຸ່ມຈີນ //
ນອກຈາກປະເທດຈີນ ເກົາຫລີໃຕ້ ສິງຄະໂປ
ອິນໂດເນເຊຍ ແລະ ຫວຽດນາມ ກໍພາກັນ
ສະເຫລີມສະຫລອງ ຕ້ອນຮັບປີໃໝ່ໃນອາ
ທິດນີ້ເຊັ່ນກັນ. ທຸລະກິດຕ່າງໆໃນປະເທດ
ເຫລົ່ານີ້ ສ່ວນໃຫຍ່ໄດ້ປິດລົງແລະພວກພີ່ໆ
ນ້ອງໆໄດ້ພົບປະຊຸມແຊວກິນເຂົ້າສັງສັນກັນ ຕາມປະເພນີ.