ລິ້ງ ສຳຫລັບເຂົ້າຫາ

ວັນຈັນ, ໑໕ ກໍລະກົດ ໒໐໒໔

ລາ​ຄາ​ເຮືອນຫຼັງ​ໃໝ່​ໃນ ຈີນ ຕົກ​ລົງ​ໃນ​ລະ​ດັບ​ທີ່​ໄວ​ທີ່​ສຸດ​ໃນ​ຮອບ​ເກືອບ 10 ປີ


​ກຳ​ມະ​ກອນ​ເຮັດ​ວຽກ​ຢູ່​ສະ​ຖານ​ທີ່​ກໍ່​ສ້າງ​ຕຶກ​ອາ​ພາດ​ເມັ້ນ​ໃນ​ນະ​ຄອນຫຼວງ ປັກ​ກິ່ງ, ຈີນ 29, ກໍ​ລະ​ກົດ 2023
​ກຳ​ມະ​ກອນ​ເຮັດ​ວຽກ​ຢູ່​ສະ​ຖານ​ທີ່​ກໍ່​ສ້າງ​ຕຶກ​ອາ​ພາດ​ເມັ້ນ​ໃນ​ນະ​ຄອນຫຼວງ ປັກ​ກິ່ງ, ຈີນ 29, ກໍ​ລະ​ກົດ 2023

ລາ​ຄາ​ເຮືອນຫຼັງ​ໃໝ່​ຂອງ ຈີນ ໄດ້​ຕົກ​ລົງ​ໃນ​ລະ​ດັບ​ທີ່​ໄວທີ່​ສຸດໃນ​ຮອບ​ດົນ​ກວ່າ 9 ປີ​ເຄິ່ງ ​ໃນ​ເດືອນ​ພຶດ​ສະ​ພາ​ທີ່​ຜ່ານ​ມາ, ຂໍ້​ມູນ​ທາງ​ການ​ໄດ້​ສະ​ແດງ​ໃຫ້​ເຫັນ​ໃນ​ວັນ​ຈັນ​ມື້ນີ້, ດ້ວຍ​ຝ່າຍ​ອະ​ສັງ​ຫາ​ລິ​ມະ​ຊັບ​ກຳ​ລັງ​ດີ້ນ​ຮົນ​ທີ່​ຈະ​ຊອກ​ຫາ​ສາເຫດ ເຖິງ​ແມ່ນ​ວ່າ ​ຈະ​ມີຄວາມ​ພະ​ຍາ​ຍາມ​ຂອງ​ລັດ​ຖະ​ບານເພື່ອ​ຊ່ວຍ​ຊະ​ລໍ​ການ​ສະ​ໜອງ​ເກີນ​ຄວາມ​ຕ້ອງ​ການ ແລະ ການ​ສະ​ໜັບ​ສະ​ໜູນໃຫ້​ແກ່ບັນ​ດາ​ຜູ້​ພັດ​ທະ​ນາ​ທີ່​ມີ​ໜີ້​ສິນ​ຖ້ວ​ມ​ລົ້ນກໍ​ຕາມ.

ລາ​ຄາ​ແມ່ນ​ໄດ້ຫຼຸດ​ລົງ 0.7 ເປີ​ເຊັນ​ໃນ​ເດືອນ​ພຶດ​ສະ​ພາ ​ຈາກ​ເດືອນ​ກ່ອນ​ໜ້າ​ນັ້ນ, ເຊິ່ງ​ເປັນ​ຂີດ​ໝາຍ​ການຫຼຸດ​ລົງ​ເດືອນ​ຕໍ່​ເດືອນ​ເປັນ​ຄັ້ງ​ທີ 11 ຕິດ​ຕໍ່​ກັນ ແລະ ເປັນ​ກາກ​ຫຼຸດ​ລົງ​ທີ່ຫຼາຍ​ທີ່​ສຸດ​ນັບ​ຕັ້ງ​ແຕ່​ເດືອນ​ຕຸ​ລາ 2014, ອີງ​ຕາມ​ການ​ຄິດ​ໄລ່​ຂອງ​ອົງ​ການ​ຂ່າວ ຣອຍ​ເຕີ ໂດຍ​ອີງ​ໃສ່​ຂໍ້​ມູນ​ຂອງ​ຫ້ອງ​ການ​ສະ​ຖິ​ຕິ​ແຫ່ງ​ຊາດ.

ໃນ​ໄລ​ຍະ​ນຶ່ງ​ປີ, ລາ​ຄາ​ເຮືອນ​ໃໝ່​ໄດ້ຫຼຸດ​ລົງ 3.9 ເປີ​ເຊັນ​ຈາກ​ນຶ່ງ​ປີ​ກ່ອນ​ໜ້ານີ້, ເມື່ອ​ທຽບ​ໃສ່​ກັບການຫຼຸດ​ລົງ 3.1 ເປີ​ເຊັນ​ໃນ​ເດືອນ​ເມ​ສາ.

ຝ່າຍ​ອະ​ສັງ​ຫາ​ລິ​ມະ​ຊັບ​ທີ່​ເປັນ​ໜີ້​ຂອງ ຈີນ, ເຊິ່ງ​ຄັ້ງ​ນຶ່ງ​ເຄີຍ​ເປັນ​ກົນ​ຈັກ​ທີ່​ສຳ​ຄັນ​ຂອງ​ການ​ເຕີບ​ໂຕ​ດ້ານ​ເສດ​ຖະ​ກິດ​ຂອງ​ປະ​ເທດ​ນັ້ນ, ໄດ້​ຖືກ​ກະ​ທົບ​ໂດຍຫຼາຍ​ວິ​ກິດ​ການ​ນັບ​ຕັ້ງ​ແຕ່​ກາງ​ປີ 2021 ເປັນ​ຕົ້ນ​ມາ, ລວມ​ທັງ​ຜູ້​ພັດ​ທະ​ນາຫຼາຍ​ແຫ່ງບໍ່​ສາ​ມາດ​ທີ່​ຈະ​ຊຳ​ລະ​ໜີ້​ສິນ ແລະ ຢຸດ​ການ​ກໍ່​ສ້າງ​ໃນ​ໂຄງ​ການ​ສ້າງ​ເຮືອນ​ກ່ອນ​ການ​ຂາຍ​ຕ່າງໆ.

ບັນ​ດາ​ເຈົ້າ​ໜ້າ​ທີ່​ໄດ້​ເພີ່ມ​ມາດ​ຕະ​ການ​ທີ່​ຈະຊ່ວຍປະ​ຄັບ​ປະ​ຄອງ​ຝ່າຍ​ອະ​ສັງ​ຫາ​ລິ​ມະ​ຊັບ​ທີ່​ຖືກ​ກະ​ທົບຈາກ​ວິ​ກິດ​ການ ລວມ​ທັງ​ອຳ​ນວຍ​ຄວາມ​ສະ​ດວກ​ເງິນ 200 ຕື້ຢວນ ຫຼື 41.35 ຕື້​ໂດ​ລາ ເພື່ອ​ສະ​ສາງວັດຖຸ​ກໍ່​ສ້າງ​ເຮືອນ​ຂະ​ໜາດ​ໃຫຍ່, ຕັດ​ເງິນ​ດາວ ແລະ ຫຼຸດ​ຜ່ອນ​ກົດ​ລະ​ບຽບ​ການ​ກູ້​ຢືມ​ເງິນ​ເພື່ອ​ຊື້​ເຮືອນ.

ແຕ່​ບັນ​ດາ​ນັກ​ວິ​ເຄາະ​ເຊື່ອ​ວ່າ​ການ​ເຄື່ອນ​ໄຫວ​ພວກນີ້​ຈະ​ບໍ່​ຊ່ວຍ​ຫຍັງຫຼາຍ​ໃນການ​ຮັບ​ພາ​ລະການຄ້າງສາງຂອງທີ່ຢູ່ອາໄສ​ຂະ​ໜາດ​ໃຫຍ່, ແລະ ​ການຍົກ​ເລີກ​ຂໍ້​ຫ້າມກ​ານ​ຊື້​ເຮືອນ​ຕ່າງໆ​ໃນ​ບັນ​ດາ​ເມືອງ​ໃຫຍ່ ອາດ​ເຮັດ​ໃຫ້​ຄວາມ​ຄິດ​ຢາກ​ຊື້​ເຮືອນ​ໃນ​ບັນ​ດາ​ເມືອງ​ທີ່​ນ້ອຍກວ່າຫຼຸດ​ໜ້ອຍ​ລົງໄປ​ຕື່ມ.

ອ່ານ​ຂ່າວນີ້​ຕື່ມ​ເປັນ​ພາ​ສາ​ອັງ​ກິດ

ຟໍຣັມສະແດງຄວາມຄິດເຫັນ

XS
SM
MD
LG