ສານແຫ່ງນຶ່ງຂອງຈີນໄດ້ຕັດສິນລົງໂທດພະສົງທິເບດ 2 ອົງໃຫ້ຈໍາຄຸກ ເປັນເວລາດົນ
ນານໃນວັນອັງຄານວານນີ້ ໃນຄະດີທີ່ຜິດປົກກະຕິອັນນຶ່ງ ທີ່ໄດ້ກະຕຸ້ນໃຫ້ເກີດຄວາມ
ສົນໃຈຈາກນາໆຊາດຢ່າງແຜ່ຫລາຍນັ້ນ.
ສະຫະລັດໄດ້ສະແດງຄວາມເປັນຫ່ວງອອກມາ ກ່ຽວກັບການຕັດສິນໂທດຈໍາຄຸກເປັນເວລາ 11 ປີຕໍ່ພະອົງນຶ່ງອີກໃນວັນຈັນມື້ກ່ອນນີ້. ພວກພະສົງທັງ 3 ອົງຖືກກ່າວຫາວ່າມີສ່ວນພົວພັນກັບການຕາຍຂອງພະ Rigzin Phuntsog (ພຸນໂຊ) ໄວ 16 ປີ ທີ່ໄດ້ເອົາໄຟເຜົາຕົວເອງຕາຍໃນເດືອນມີນາຜ່ານມາໃນວັດ Kirti (ເກຍຕີ)ໃນແຂວງຊີສວນໃນພາກຕາເວັນຕົກສຽງໃຕ້ຂອງຈີນ.
ໃນວັນອັງຄານວານນີ້ ສານໄດ້ຕັດສິນລົງໂທດພະ Tsering Tenzin ໃຫ້ຈໍາຄຸກ 13 ປີ
ແລະພະ Tenchum ທີ່ໃຊ້ນາມສະກຸນດຽວ ໃຫ້ຈໍາຄຸກເປັນເວລາ 10 ປີ. ພະທັງສອງ
ອົງນີ້ຖືກກ່າວຫາ ຖານຍຸຍົງແລະຊ່ອຍໃນການຕາຍຂອງພະ Phuntsog ນັ້ນ.
ອົງການຂ່າວຊິນຫົວທາງການຈີນກ່າວວ່າ ໄດ້ມີການສະເໜີຫລັກຖານຕໍ່ສານທີ່ວ່າພວກ
ພະເຫລົ່ານີ້ໄດ້ສົ່ງຮູບພາບຂອງພະ Phunysog ອອກໄປຕ່າງປະເທດເປັນເວລາຫລາຍ
ມື້ກ່ອນຜູ້ກ່ຽວຂ້າຕົວຕາຍ ຊຶ່ງສະແດງໃຫ້ເຫັນວ່າ ໄດ້ມີການຄິດກັນລ່ວງໜ້າ ແລະເວົ້າ
ຕື່ມວ່າ ພວກພະເຫລົ່ານີ້ໄດ້ຍອມຮັບສາລະພາບຜິດຫຼັງຈາກການດໍາເນີນຄະດີໃນສານແລ້ວ.