ທາງການຈີນໄດ້ປິດລ້ອມຫລາຍພາກສ່ວນຂອງເຂດມອງໂກເລຍທີ່ຢູ່ພາຍໃນຈີນນັ້ນ ຫລັງຈາກຊົນເຜົ່າມອງໂກເລຍທໍາການເດີນຂະບວນປະທ້ວງມາເປັນເວລາຫລາຍມື້ ທີ່ສືບເນື່ອງມາຈາກການເສຍຊີວິດຂອງຄົນລ້ຽງແກະຄົນນຶ່ງທີ່ຖືກຄົນຂັບລົດບັນທຸກຈີນຕໍາຕາຍນັ້ນ.
ເຖິງແມ່ນບໍ່ມີລາຍງານວ່າ ໄດ້ມີການເດີນຂະບວນປະທ້ວງໃນວັນເສົາວານນີ້ກໍຕາມ ພວກປະຊາຊົນໃນທ້ອງຖິ່ນກ່າວວ່າ ຫລາຍພາກສ່ວນຂອງຂົງເຂດໄດ້ຖືກປິດລ້ອມໄວ້. ສູນຂໍ້ມູນວ່າດ້ວຍສິດທິມະນຸດໃນພາກໃຕ້ມອງໂກເລຍ ຊຶ່ງເປັນກຸ່ມສົ່ງເສິມຊາວມອງໂກເລຍທີ່ມີຫ້ອງການຕັ້ງຢູ່ໃນນະຄອນນີວຢອກກ່າວວ່າ ພວກໂຮງຮຽນແລະມະຫາວິທະຍາໄລຕ່າງໆ ຢ່າງນ້ອຍໃນ 2 ຫົວເມືອງ ໄດ້ຕົກຢູ່ພາຍໃຕ້ການຄວບຄຸມຂອງຕໍາຫລວດຢ່າງໜັກ.
ອົງການນິລະໂທດກໍາສາກົນກ່າວວ່າ ຕົນມີຄວາມເປັນຫ່ວງກ່ຽວກັບຄວາມເປັນໄປໄດ້ທີ່ອາດ
ຈະມີການເອົາມາດຕະການຕອບໂຕ້ຢ່າງແຂງແຮງຈາກລັດຖະບານຈີນນັ້ນ. ນອກນີ້ ທາງອົງ
ການດັ່ງກ່າວຍັງຮຽກຮ້ອງໃຫ້ເຈົ້າໜ້າທີ່ຈີນໃຊ້ຄວາມຍັບຍັ້ງ ແລະເຄົາລົບນັບຖືຕໍ່ເສລີພາບໃນ
ການສະແດງອອກຄວາມຄິດຄວາມເຫັນ ແລະການຊຸມນຸມຂອງພວກປະທ້ວງ.
ຄົນລ້ຽງແກະ ຊຶ່ງຂ່າວເວົ້າວ່າມີຊື່ສັ້ນໆວ່າ Mergen ນັ້ນໄດ້ຖືກລົດແລ່ນຕໍາແລະຢຽບ
ຕາຍໃນຂະນະທີ່ຜູ້ກ່ຽວແລະຄົນອື່ນໆອີກພະຍາຍາມຕັນທາງລົດບັນທຸກຖ່ານຫິນບໍ່ໃຫ້
ແລ່ນຜ່ານເດິ່ນຫຍ້າທີ່ພວກຄົນລ້ຽງ ສັດໃຊ້ໄວ້ລ້ຽງສັດເຂົາເຈົ້ານັ້ນ.
ບັນດາເຈົ້າໜ້າທີ່ລັດຖະບານໃນທ້ອງຖິ່ນອອກຖະແຫລງການສະບັບນຶ່ງກ່າວວ່າ ປະຊາ
ຊົນຢ່າງນ້ອຍ 2 ຄົນໄດ້ຖືກຈັບກຸມໃນຂໍ້ຫາມີສ່ວນພົວພັນກັບເຫດການດັ່ງກ່າວ.
