ອຸບັດເຫດທີ່ບໍ່ຖ່ານຫິນສາມແຫ່ງໃນຈີນ ຍັງຜົນໃຫ້ມີຜູ້ເສຍຊີວິດຢ່າງນ້ອຍ 30 ຄົນ ແລະ ອີກ 13 ຄົນ ຍັງຕິດຄ້າງຢູ່ໃນບໍ່ຖ່ານຫິນນັ້ນ.
ອົງການຂ່າວຊິວຫົວຂອງທາງການຈີນກ່າວວ່າ ຄົນງານທັງໝົດ 28 ຄົນ ໃນບໍ່ຖ່ານຫີນແຫ່ງນຶ່ງ ທີ່ແຂວງ Shaanxi ທາງທິດຕາເວັນຕົກ ສຽງເໜືອ ໄດ້ເສຍຊີວິດ ເວລາສາຍສົ່ງໃຕ້ດິນເກີດໄຟໃໝ້ ເມື່ອຄືນວັນ ເສົາ. ລາຍງານຂ່າວເວົ້າວ່າ ພວກກູ້ໄພໄດ້ກູ້ເອົາຊາກສົບຄົນງານມາໄດ້ຫ້າຄົນ ໃນຕອນເດິກຂອງເຊົ້າ ວັນອາທິດມື້ນີ້.
ອົງການຂ່າວຊິນຫົວລາຍງານອີກວ່າ ໃນອຸບັດເຫດອີກບັ້ນນຶ່ງນັ້ນ ເຫດ ລະເບີດໃນເຂດບໍ່ຖ່ານຫິນ ທີ່ ແຂວງຮູໜານ ໄດ້ສົ່ງຜົນໃຫ້ມີຜູ້ເສຍຊີວິດ 2 ຄົນ ໃນວັນອາທິດມື້ນີ້ຄືກັນ.
ໃນເຫດຮ້າຍບັ້ນນຶ່ງອີກຕ່າງຫາກນັ້ນ ສື່ມວນຊົນຈີນກ່າວວ່າ ມີຄົນງານ 13 ຄົນຖືກຕັນຢູ່ທາງໃນບໍ່ຖ່ານຫີນ ທີ່ຖືກນ້ຳຖ້ວມແຫ່ງນຶ່ງໃນແຂວງ Gansu ທາງພາກຕາເວັນຕົກສຽງເໜືອຂອງຈີນ. ຊິນຫົວກ່າວວ່າມີສາມຄົນຖືກຊ່ວຍດຶງຂຶ້ນມາໄດ້ຈາກບໍ່ຖ່ານຫີນທີ່ຖືກນ້ຳຖ້ວມໃນເມືອງ Jib ໃນມື້ນີ້.
ຈີນຖືວ່າເປັນປະເທດທີ່ມີປະຫວັດດ້ານຄວາມປອດໄພຂອງບໍ່ຖ່ານຫີນທີ່ຂີ້ຮ້າຍທີ່ສຸດຂອງໂລກ ໂດຍມີຄົນງານບໍ່ຖ່ານຫີນໃນຈີນເສຍຊີວິດກວ່າ 2,600 ຄົນ ເມື່ອປີກາຍນີ້ ຍ້ອນອຸບັດເຫດແລະເຫດລະເບີດຕ່າງໆ.
ສ່ວນໃນອີກຂ່າວນຶ່ງນັ້ນ ສື່ມວນຊົນຂອງຈີນກ່າວວ່າ ລົດບັສຄັນນຶ່ງໄດ້ ປະສົບອຸບັດເຫດຕົກລົງໄປສູ່ແມ່ນ້ຳ ໃນແຂວງ Sichuan ທາງພາກຕາເວັນ ຕົກສຽງໃຕ້ຂອງຈີນ ຍັງຜົນໃຫ້ມີຜູ້ຫາຍສາບສູນ 27 ຄົນແລະ ຢ້ານວ່າອາດເສຍຊີວິດແລ້ວ.
ອົງການຂ່າວຊິນຫົວກ່າວວ່າ ພວກກູ້ໄພສາມາດຊ່ວຍກູ້ເອົາ 11 ຄົນມາໄດ້ ຫລັງຈາກລົດບັສຕົກໜ້າຜາ ລົງໃສ່ແມ່ນ້ຳ Dajin ໃນເຂດປົກຄອງຕົນເອງ ຂອງທິເບດເມື່ອວັນອາທິດມື້ນີ້. ລົດບັສຄັນນັ້ນກຳລັງເດີນທາງໄປຍັງເມືອງ Chengdu ເມືອງຫລວງຂອງແຂວງ Sichuan.
