ພວກກູ້ໄພຈີນ ໄດ້ຊ່ອຍພະນັກງານບໍ່ຖ່ານຫີນ 22 ຄົນ ອອກຈາກບໍ່ຖ່ານຫີນ ທີ່ຖືກນໍ້າຖ້ວມ
ໃນພາກເໜືອຂອງຈີນ ບ່ອນທີ່ພວກເຂົາເຈົ້າໄດ້ຕົກຄ້າງຢູ່ເປັນເວລານຶ່ງອາທິດນັ້ນ.
ອົງການຂ່າວທາງການຂອງຈີນລາຍງານວ່າ ພະນັກງານບໍ່ຖ່ານຫີນຈຸນີ້ໄດ້ນໍາຂຶ້ນມາສູ່ໜ້າດິນ
ແລ້ວ ໃນຕອນເຊົ້າວັນອັງຄານມື້ນີ້ ຊຶ່ງປາກົດວ່າພວກເຂົາເຈົ້າມີສຸກຂະພາບແຂງແຮງດີປົກກະຕິ.
ໄດ້ມີພວກພະນັກງານບໍ່ຖ່ານຫີນ 26 ຄົນຕົກຄ້າງຢູ່ໃນບໍ່ຖ່ານຫີນທີ່ຜິດກົດໝາຍ ໃນວັນທີ 23
ສິງຫາຜ່ານມາ ໃກ້ໆກັບເມືອງ Qitaihe ທາງພາກຕາເວັນອອກສຽງເໝືອຂອງປະເທດ
ຫຼັງຈາກພວກຂຸດບໍ່ຖ່ານຫີນ ໄດ້ເຈາະຖືກອຸໂມງທີ່ມີນໍ້າຖ້ວມນັ້ນ. ມີພວກພະນັກງານບໍ່
ຖ່ານຫີນ 45 ຄົນ ປະຕິບັດງານຢູ່ ໃຕ້ດິນ ໃນຕອນທີ່ອຸບບັດຕິເຫດເກີດຂຶ້ນ ແຕ່ກໍໄດ້ມີ
ພະນັກງານ 19 ຄົນສາ ມາດຫຼົບໜີອອກມາໄດ້.
ພະນັກງານ 3 ຄົນຂອງຈຳນວນທັງໝົດ 26 ຄົນນັ້ນໄດ້ຖືກຊ່ອຍອອກມາໃນວັນເສົາແລ້ວ
ແລະຄົນນຶ່ງນັ້ນໄດ້ເສຍຊີວິດໃນຕອນທີ່ຊ່ອຍອອກມາ.
ຄວາມຫວັງສຳລັບພວກພະນັກງານບໍ່ຖ່ານຫີນ 22 ຄົນ ແມ່ນມີຂຶ້ນອີກໃນວັນຈັນວານນີ້
ຫຼັງຈາກພວກກູ້ໄພໄດ້ຍິນສຽງດັງມາຈາກທໍ່ທີ່ຍາວ 280 ແມັດ ທີ່ເຈາະ ເພື່ອນຳເອົາອາກາດ
ລົງໄປໃນບໍ່ຖ່ານຫີນນັ້ນ.
ບໍ່ຖ່ານຫີນຂອງຈີນ ແມ່ນຮວມຢູ່ໃນບັນດາບໍ່ຖ່ານຫີນທີ່ເປັນອັນຕະລາຍທີ່ສຸດໃນໂລກ ເພາະວ່າ
ບໍ່ໄດ້ມີການປະຕິບັດມາດຕະການທາງດ້ານຄວາມປອດໄພແລະສ່ວນໃຫຍ່ກໍຈະເປັນການປະຕິ
ບັດງານທີ່ຜິດກົດໝາຍ.
