ບັນດາເຈົ້າໜ້າທີ່ຈາກ 4 ປະເທດແຄມແມ່ນໍ້າຂອງ ພົບປະກັນຢູ່ທີ່ກຸງປັກກິ່ງໃນວັນຈັນມື້ນີ້ ເພື່ອສ້າງຕັ້ງກົດເກນຕ່າງໆໃນດ້ານຄວາມປອດໄພຮ່ວມກັນໃນບໍລິເວນບ່ອນທີ່ມີການໂຈມຕີທີ່ໄດ້ສັງຫານລູກເຮືອຈີນ 13 ຄົນໃນເຮືອ 2 ລໍາ ທີ່ແລ່ນຕາມລໍາແມ່ນໍ້າຂອງໃນຕົ້ນເດືອນນີ້.
ທ່ານ Meng Jiangzhu ລັດຖະມົນຕີຄວາມປອດໄພສາທາລະນະຂອງຈີນໄດ້ເປັນເຈົ້າພາບຈັດການພົບປະກັນດັ່ງກ່າວ ຊຶ່ງມີພວກເຈົ້າໜ້າທີ່ລະດັບສູງມາຈາກມຽນມາ ສປລາວ ແລະໄທ ມາຮ່ວມນໍາ.
ທ່ານ Meng ກ່າວວ່າ ພວກປະເທດເຫລົ່ານີ້ຈະຈັດຕັ້ງລະບຽບການແລກປ່ຽນຂ່າວຂໍ້ມູນລັບແລະທໍາການລາດຕາເວນຮ່ວມກັນຕາມລໍາແມ່ນໍ້າຂອງນັ້ນ.
ພວກລູກເຮືອຈີນໄດ້ຖືກສັງຫານໃນວັນທີ 6 ເດືອນນີ້ ໃນເຂດສາມຫລ່ຽມຄໍາ ທີ່ເປັນເຂດຊາຍແດນທີ່ມີຊື່ສຽງໂດ່ງດັງຍ້ອນການເຄື່ອນໄຫວຂອງກຸ່ມແກ໊ງລັກລອບຄ້າຢາເສບຕິດ. ພວກເຈົ້າໜ້າທີ່ໄດ້ພັບເຫັນຢາບ້າຈໍານວນຫລາຍກວ່າ 9 ແສນເມັດ ຢູ່ໃນເຮືອລໍານຶ່ງທີ່ຖືກຈີ້ນັ້ນ.
ທາງການຈີນແລະໄທປະກາດໃຫ້ຮູ້ໃນວັນສຸກຜ່ານມານີ້ວ່າ ທະຫານໄທ9 ຄົນໄດ້ຍອມຈໍານົນ ຫລັງຈາກຖືກຊີ້ໂຕວ່າເປັນຜູ້ຕ້ອງສົງໄສໃນການຄາດຕະກໍາພວກລູກເຮືອຈີນເຫລົ່ານັ້ນ.
ທາງເຈົ້າໜ້າທີ່ຈີນກໍາລັງກົດດັນໃຫ້ມີການດໍາເນີນຄະດີພວກທະຫານໄທເຫລົ່ານີ້ໂດຍໄວ ແລະໃຫ້ມີການລົງໂທດຢ່າງໜັກ ຖ້າທາງສານຕັດສິນວ່າພວກເຂົາມີຄວາມຜິດແທ້.
