ຈີນໄດ້ທຳການໄກ່ເກຍການເຈລະຈາ ລະຫວ່າງພັກຝ່າຍທີ່ເປັນ
ປໍລະປັກຂອງຊູແດນໃຕ້ ແລະກໍ ໄດ້ຮັບການໃຫ້ຄຳໝັ້ນສັນຍາ
ຈາກພັກຝ່າຍຕ່າງໆວ່າ ຈະເລັ່ງລັດຂັ້ນຕອນການສ້າງສັນຕິພາບ
ຂອງປະເທດ.
ເຈົ້າໜ້າທີ່ຂອງຊູແດນໃຕ້ ກ່າວວ່າ ທັງສອງຝ່າຍແມ່ນໄດ້ຕົກລົງ
ກັນໃນນະຄອນ Khartoum ໃນວັນຈັນວານນີ້ ເພື່ອເລັ່ງລັດ
ການເຈລະຈາ ໃນການປະກອບລັດຖະບານໄລຍະຂ້າມຜ່ານ
ແລະແລະດຳເນີນງານເພື່ອຍຸຕິສະພາບການເປັນປໍລະປັກກັນນັ້ນ.
ລັດຖະມົນຕີກະຊວງການຕ່າງປະເທດຂອງຊູແດນ ທ່ານ Ali
Karti ກ່າວວ່າ ການເຈລະຈາທີ່ວ່ານີ້ ແມ່ນໄດ້ລິເລີ້ມໂດຍຄູ່ຕຳແໜ່ງຝ່າຍຈີນ ທ່ານ Wang Yi ຜູ້ຊຶ່ງທຳການຢ້ຽງຢາມນະຄອນ Khartoum ເມືອງຫຼວງຂອງຊູແດນ ໃນຂະນະນີ້.
ການປະຊຸມ ມີຂຶ້ນກ່ອນກອງປະຊຸມສຸດຍອດທີ່ວາງແຜນໂດຍ ກຸ່ມພາກພື້ນໃນເຂດອາຟຣິກາ
ຕາເວັນອອກ ທີ່ເອີ້ນວ່າ IGAD ຢູ່ທີ່ອີຕີໂອເປຍ ໃນວັນອາທິດຈະມາເຖິງນີ້ ທີ່ມີເປົ້າໝາຍເພື່ອຍຸຕິການສູ້ລົບກັນໃນຊູແດນໃຕ້.
ຈີນ ແມ່ນໄດ້ລົງທຶນຢ່າງຫຼວງຫຼາຍໃນການຜະລິດນ້ຳມັນໃນຊູແດນໃຕ້ ແລະໄດ້ສົ່ງກອງກຳ ລັງ ສູ້ລົບໄປຊ່ອຍ ທີ່ເປັນພາກສ່ວນນຶ່ງຂອງກຳລັງຮັກສາສັນຕິພາບຂອງອົງການສະຫະປະຊາຊາດ ຢູ່ໃນປະເທດດັ່ງກ່າວ.
ໃນວັນອາທິດແລ້ວນີ້ ທ່ານ Wang ໄດ້ກ່າວປົກປ້ອງ ໃນຄວາມພະຍາຍາມໄກ່ເກຍຂອງຈີນ
ໃນຊູແດນໃຕ້. ທ່ານໄດ້ກ່າວວ່າ ການໄກ່ເກຍນີ້ ແມ່ນໜ້າທີ່ຮັບຜິດຊອບຂອງມະຫາອຳນາດ
ຂອງໂລກ ບໍ່ແມ່ນແຕ່ວ່າ ເພື່ອຜົນປະໂຫຍດຂອງຈີນພຽງລຳພັງ.
ຊູແດນໃຕ້ ໄດ້ປະສົບກັບການສູ້ລົບກັນທີ່ບືດຍາວນານກວ່າປີນຶ່ງ ລະຫວ່າງ ກອງກຳລັງທີ່ຈົງຮັກພັກດີກັບປະທານາທິບໍດີ ທ່ານ Salva Kiir ແລະພວກທີ່ຈົງຮັກພັກດີກັບ ອະດີດຮອງປະທານາທິບໍດີ ທ່ານ Riek Machar. ການສະໜັບສະໜຸນນັ້ນແມ່ນເປັນໄປຕາມເສັ້ນສາຍ
ຂອງກຸ່ມຊົນເຜົ່າ ໂດຍທີ່ພວກຊົນເຜົ່າ Dinka ສະໜັບສະໜຸນປະທານາທິບໍດີ ແລະຊົນເຜົ່າ Nuer ສະໜັບສະໜຸນ ທ່ານ Machar.
