ລິ້ງ ສຳຫລັບເຂົ້າຫາ

ຈີນຂັບໄລ່ ນັກຂ່າວ Al-Jazeera ອອກຈາກປະເທດ

  • ສິງ ບູຣົມມະວົງ

ທ່ານ Hong Lei ໂຄສົກປະຈໍາກະຊວງການຕ່າງປະເທດຈີນ ກ່າວຕໍ່ບັນດານັກຂ່າວທີ່ກຸງປັກກິ່ງ. ວັນທີ 8 ພຶດສະພາ 2012.

ຕາໜ່າງ​ໂທລະພາບ Al-Jazeera ກ່າວ​ວ່າ ຕົນ​ໄດ້​ຖືກບີບບັງຄັບໃຫ້ ປິດ​ການ​ປະຕິບັດ​ງານ​ເກັບ​ກຳ​ຂ່າວ​ພາສາ​ອັງກິດ​ຂອງ​ຕົນ​ໃນ​ຈີນ ຫຼັງ​ຈາກ​ເ​ຈົ້າ​ທີ່​ຈີນ​ບໍ່​ຍອມ​ຕໍ່ໃບ​ອະນຸຍາດ​ນັກ​ຂ່າວ ​ແລະ​ຕໍ່​ວີ​ຊາ​ໃຫ້​ນັກ​ຂ່າວ​ ຄົນ​ດຽວ​ຂອງ​ຕົນ​ ປະ​ຈໍາ​ກຸງ​ປັກ​ກິ່ງ​ນັ້ນ.

Al-Jazeera ​ທີ່​ມີ​ສຳນັກງານ​ຕັ້ງ​ຢູ່​ໃນ Qatar ກ່າວ​ໃນ​ວັນ​ຈັນ​ວານ​ນີ້ວ່າ ຕົນ​ບໍ່​ມີ​ທາງ​ເລືອກ​ອື່ນ​ໃດ ນອກຈາກປິດ​ຫ້ອງການ​ໃນ​ກຸງ​ປັກກິ່ງ​ລົງ ຫຼັງ​ຈາກຈີນ​ບໍ່ຍອມ​ຕໍ່​ໜັງສື​ອະນຸຍາດ ​ໃຫ້​ນາງ Melissa Chan ນັກ​ຂ່າວຂອງ​ຕົນ ​ແລະ​ບໍ່​ຍອມ​ອະນຸຍາດ​ໃຫ້​ນັກ​ຂ່າວ​ຄົນ​ອື່ນ​ໄປ​ປ່ຽນ​.

ສະ​ໂມ​ສອນ​ນັກ​ຂ່າວ​ຕ່າງປະ​ເທດໃນຈີນກ່າວ​ວ່າ ​ຕົນ​ຮູ້ສຶກຕົກ​ໃຈ​ນໍາ​ການ​ຕັດສິນ​ໃຈ​ຂອງ​ຈີນ ​ແລະ​ເອີ້ນ​ວ່າ ມັນ​ເປັນຄວາມ​ພະຍາຍາມ​ເພື່ອ​ກວດກາ​ແລະ​ນາບ​ຂູ່​ພວກ​ນັກ​ຂ່າວຕ່າງປະ​ເທດໃນ​ຈີນ. ​ເປັນ​ເທື່ອ​ທໍາອິດ ນັບ​ແຕ່​ປີ 1998 ​ເປັນ​ຕົ້ນ​ມາ ທີ່​ຈີນ​ໄດ້ເນລະ​ເທດນັກ​ຂ່າວ​ຕ່າງປະ​ເທດ​ທີ່ໄດ້​ຮັບ​ອະນຸຍາດ​ໃຫ້ເຮັດ​ວຽກຢູ່​ໃນ​ປະ​ເທດ.

​ໃນ​ລະຫວ່າງ​ການ​ຖະ​ແຫລ​ງຂ່າວ​ທີ່​ມີ​ການ​ໂຕ້​ຖຽງ​ກັນ​ເລັກ​ນ້ອຍກັບ​ພວກ​ນັກ​ຂ່າວ​ຕ່າງປະ​ເທດ ​ໃນ​ວັນ​ອັງຄານ​ມື້​ນີ້ ​ໂຄສົກ​ກະຊວງ​ການ​ຕ່າງປະ​ເທດ​ຈີນ ທ່ານ Hong Lei ​ບໍ່​ໄດ້​ໃຫ້​ເຫດຜົນ​ໃດໆ ສໍາ​ລັບການ​ຂັບ​ໄລ່​ນາງ Chan ນັ້ນ ​ແຕ່​ເຕືອນ​ວ່າ ພວກ​ນັກ​ຂ່າວ​ຕ່າງປະ​ເທດ​ຈະ​ຕ້ອງ​ເຄົາລົບ​ແລະ​ປະຕິບັດ ​ຕາມ​ກົດໝາຍ​ແລະ​ກົດ​ລະບຽບ​ທີ່​ກ່ຽວຂ້ອງ ຂອງ​ຈີນ.

ບັນດາ​ເຈົ້າ​ໜ້າ​ທີ່​ຈີນ​ໄດ້​ສະ​ແດງ​ຄວາມ​ບໍ່ພໍ​ໃຈຫວ່າງ​ໄວໆ​ຜ່ານ​ມານີ້ກ່ຽວກັບ​ການສະ​ເໜີ​ຂ່າວ​ຂອງໂທລະພາບ al-Jazeera ​ໃນ​ຈີນ​ນັ້ນ ​ໂດຍ ສະ​ເພາະແມ່ນ​ລາຍ​ງານ​ຂ່າວ​ທີ່​ວ່າ ທາງ​ການ​ຈີນ​ໄດ້​ເກີດ​ໂມ​ໂຫ​ໂທໂສ​ນໍາ​ການສະ​ເໜີ​ສາລະ​ຄະດີໃນ​ເດືອນ​ພະຈິກປີ​ກາຍທີ່​ເນ້ນ​ເຖິງ​ການ​ກົດ​ຂີ່ປາບ​ປາມ​ໃນ​ຄ້າຍ​ສັບພະທຸ​ກອອກແຮງ​ງານ​ແຫ່ງ
ຕ່າງໆ​ຂອງ​ຈີນນັ້ນ.

XS
SM
MD
LG