ຈີນກ່າວວ່າ ຕົນຈະອະນຸຍາດໃຫ້ພວກນັກທ່ອງທ່ຽວ ໄປທ່ຽວຊົມໝູ່ເກາະຕ່າງໆທີ່ເປັນຂໍ້
ຂັດແຍ້ງກັນໃນເຂດທະເລຈີນໃຕ້ ຊຶ່ງເປັນການເຄຶ່ອນໄຫວ ທີ່ມີທ່າທີວ່າຈະເພີ່ມຄວາມເຄັ່ງ
ຕຶງຍິ່ງຂຶ້ນໄປອີກ ກ່ຽວກັບເຂດນ່ານນໍ້າທະເລທີ່ກ້ວາງໃຫຍ່ໄພສານແຫ່ງນັ້ນ.
ແຜນການດັ່ງກ່າວຂອງປັກກິ່ງສໍາລັບໝູ່ເກາະ Paracel ມີທ່າທີວ່າຈະສ້າງຄວາມຂຸ່ນເຄືອງ
ໃຫ້ແກ່ຫວຽດນາມ ທີ່ໄດ້ອ້າງເອົາເປັນກໍາມະສິດໝູ່ເກາະດັ່ງກ່າວວ່າ ເປັນອານາເຂດຂອງ
ຕົນເຊັ່ນກັນນັ້ນ. ນະຄອນຫລວງຮາໂນຍ ໄດ້ອອກຖະແຫລງການສະບັບນຶ່ງເມື່ອອາທິດ
ຜ່ານມານີ້ ປະນາມ ການແຂ່ງຂັນເຮືອໃບລົມ ຢູ່ອ້ອມໝູ່ເກາະ Paracel ທີ່ຈັດຕັ້ງຂຶ້ນມາ
ໂດຍພວກເຈົ້າໜ້າທີ່ແຂວງໄຫໜານຂອງຈີນ.
ປັກກິ່ງແມ່ນໄດ້ເພີ່ມການເອົາທ່າທີຮຸກຮານຂຶ້ນໄປນັບມື້ ກ່ຽວກັບການອ້າງເອົາກໍາມະສິດ
ໃນເຂດທະເລຈີນໃຕ້ທັງໝົດ ທີ່ມີເນື້ອທີ່ 3.5 ລ້ານກິໂລແມດມົນທົນນັ້ນອັນເປັນການສ້າງ
ຄວາມເປັນປໍລະປັກຕໍ່ກັນ ກັບຫວຽດນາມ ແລະຂູ່ແຂ່ງອື່ນໆຂອງຂົງເຂດ ໂຮມທັງຟິລິບ
ປິນ ມາເລເຊຍ ແລະບຣູໄນ ທີ່ຕ່າງກໍອ້າງເອົາພາກສ່ວນນຶ່ງຂອງເສ້ນທາງເດີນເຮືອດັ່ງກ່າວ
ເປັນກໍາມະສິດຂອງຕົນເຊ່ນກັນ.
ໃນກອງປະຊຸມສຸດຍອດຂອງສະມາຄົມອາຊ່ຽນໃນອາທິດນີ້ ບັນດາຜູ້ນໍາກຸ່ມ 10 ປະເທດ
ດັ່ງກ່າວ ຮັບປາກວ່າ ຈະປະຕິບັດງານໃຫ້ສໍາເລັດລົງໃນທັນທີ ກ່ຽວກັບກົດການປະຕິບັດ
ເພື່ອແກ້ໄຂບັນຫາຂໍ້ຂັດແຍ້ງຕ່າງໆ ກັບຈີນ ຢູ່ໃນເຂດທີ່ອາດມີຊັບພະຍາກອບອຸດົມສົມ
ບູນທີ່ສຸດນັ້ນ.