ການຕໍ່ສູ້ທີ່ຮຸນແຮງຂຶ້ນ ລະຫວ່າງ ພວກກຸ່ມກະບົດຊົນເຜົ່າ ແລະ ກອງກຳລັງລັດຖະບານ ໃນພາກເໜືອຂອງປະເທດ ມຽນມາ ໄດ້ບັງຄັບໃຫ້ປະຊາຊົນຫຼາຍພັນຄົນຕ້ອງຫຼົບໜີເຂົ້າ ໄປໃນແຂວງ ຢຸນໜານ ທີ່ຕັ້ງຢູ່ພາກໃຕ້ຂອງປະເທດ ຈີນ, ກໍ່ໃຫ້ປັກກິ່ງມີຄວາມເປັນຫ່ວງ ກ່ຽວກັບ ຄວາມປອດໄພຢູ່ເຂດຊາຍແດນ.
ການປະທະກັນ ແລະ ລາຍງານ ກ່ຽວກັບລູກປືນຈຳນວນນຶ່ງທີ່ຖືກຍິງຫລົງເຂົ້າໄປໃນເຂດ ແດນຂອງ ຈີນ ນັ້ນ, ໄດ້ກະຕຸ້ນໃຫ້ມີການໂຕ້ຖຽງກັນທາງອອນລາຍ, ໂດຍທີ່ບາງຄົນຮຽກ ຮ້ອງໃຫ້ບັນດາເຈົ້າໜ້າທີ່ໃນ ຈີນ ເຮັດວຽກເພີ່ມເຕີມເພື່ອຊ່ວຍແກ້ໄຂບັນຫາຂັດແຍ້ງ ແລະ ໃຫ້ການຊ່ວຍເຫຼືອຕໍ່ຄວາມພະຍາຍາມໃນການສ້າງຄວາມປອງດອງຊາດ ຢູ່ໃນ ມຽນມາ.
ບັນດານັກວິເຄາະໄດ້ກ່າວວ່າ ຍ້ອນຜົນປະໂຫຍດທາງດ້ານເສດຖະກິດຂອງ ຈີນ ທີ່ມີຢູ່ໃນ ຂົງເຂດ ທີ່ເກີດການຂັດແຍ້ງໃກ້ເຂດຊາຍແດນນັ້ນ, ມັນຈຶ່ງມີຂໍ້ຈຳກັດຫຼາຍຢ່າງ ຕໍ່ສິ່ງທີ່ສາ ມາດເຮັດໄດ້, ແຕ່ມັນກໍຍັງມີສັນຍານຈາກ ປັກກິ່ງ ເຊັ່ນກັນວ່າ ພວກເຂົາເຈົ້າອາດຈະຫາ ທາງໃໝ່ເພື່ອແກ້ໄຂ້ການຂັດແຍ້ງດັ່ງກ່າວ.
ໃນການຮັບມືກັບຄວາມຮຸນແຮງນັ້ນ, ຈີນ ໄດ້ເຕືອນໃຫ້ທະຫານຂອງຕົນກຽມພ້ອມ ແລະ ໄດ້ຮຽກຮ້ອງໃຫ້ຢຸດການປະຕິບັດການທາງທະຫານໂດຍທັນທີ ເພື່ອຮັບປະກັນວ່າຄວາມ ໝັ້ນຄົງຕາມເຂດຊາຍແດນໄດ້ກັບຄືນສູ່ສະພາບປົກກະຕິໂດຍໄວເທົ່າທີຈະໄວໄດ້. ນອກນັ້ນ ຈີນ ຍັງໄດ້ກ່າວວ່າ ຕົນມີຄວາມເຕັມໃຈທີ່ຈະຫຼິ້ນບົດບາດແບບສ້າງສັນໃນຂັ້ນຕອນ ການສ້າງສັນຕິພາບໃນມຽນມາ ແລະ ຄວາມພະຍາຍາມໂດຍລັດຖະບານໃໝ່ທີ່ຈະແກ້ໄຂ ບັນຫາຂັດແຍ້ງ ກັບພວກຊົນເຜົ່າກຸ່ມນ້ອຍທີ່ມີມາຫຼາຍທົດສະວັດແລ້ວນັ້ນ.
