ຈີນກ່າວໃນວັນອັງຄານມື້ນີ້ວ່າ ຕົນຫວັງວ່າຈະຊ່ອຍຫາທາງແກ້ໄຂບັນຫາຂັດແຍ້ງທາງດ້ານ
ການເມືອງໃນລີເບຍ ໃນລະຫວ່າງທໍາການໂອ້ລົມສົນທະນາກັນໃນສັບປະດານີ້ກັບຜູ້ຕາງໜ້າຄົນນຶ່ງຂອງຂະບວນການຝ່າຍກະບົດລີເບຍນັ້ນ.
ທ່ານ Hong Lei ໂຄສົກປະຈໍາກະຊວງການຕ່າງປະເທດຈີນ ກ່າວວ່າການໂອ້ລົມສົນທະ
ນາກັນໃນວັນອັງຄານມື້ນີ້ແລະວັນພຸດມື້ອື່ນກັບທ່ານ Mahmoud Jibril ທູດພິເສດຂອງ
ຝ່າຍກະບົດ ສະທ້ອນໃຫ້ເຫັນເຖິງຄວາມປາດຖະໜາຂອງຈີນທີ່ຢາກຮັກສາການຕິດຕໍ່ພົວ
ພັນກັບທຸກພັກຝ່າຍໃນບັນຫາຂັດແຍ້ງກັນນີ້. ທ່ານ Jibril ເປັນປະທານຄະນະບໍລິຫານ
ສະພາໄລຍະຂ້າມຜ່ານແຫ່ງຊາດລີເບຍ ຊຶ່ງທ່ານ Hong ບັນລະຍາຍວ່າເປັນກໍາລັງສໍາຄັນ
ອັນນຶ່ງໃນການເມືອງລີເບຍນັ້ນ.
ແຕ່ໜັງສືພິມ Global Times ທີ່ພັກຄອມມີວນິດຄວບຄຸມ ບັນລະຍາຍການຢ້ຽມຢາມຂອງທ່ານ Jibril ວ່າເປັນພາກສ່ວນນຶ່ງຂອງຄວາມພະຍາຍາມໂດຍພວກກະບົດເພື່ອຜູກຄວາມສໍາພັນກັບປະເທດທີ່ມີບົດບາດສໍາຄັນຂອງໂລກ ແລະໜັງສືພິມສະບັບນີ້ອ້າງຄໍາເວົ້າຂອງບັນດານັກວິເຄາະເຫດການທີ່ກ່າວວ່າ ພວກເຈົ້າໜ້າທີ່ຈີນໄດ້ໃຫ້ຄວາມສົນໃຈຫລາຍຂຶ້ນເລື້ອຍໆໃນການຊ່ອຍເຫລືອເພື່ອຫາທາງຍຸຕິການສູ້ລົບກັນລະຫວ່າງຝ່າຍກະບົດແລະພວກກໍາລັງຈົງຮັກພັກດີຕໍ່ທ່ານກາດດາຟີ ຜູ້ນໍາລີເບຍນັ້ນ.
ທ່ານ Abdelati Obeidi ລັດຖະມົນຕີຕ່າງປະເທດຂອງລັດຖະບານກາດດາຟີ ໄດ້ທໍາການຢ້ຽມຢາມກຸງປັກກິງເປັນເວລາ 3 ມື້ເພື່ອທໍາການໂອ້ລົມສົນທະນາກັບບັນດາເຈົ້າໜ້າທີ່ຈີນໃນຕົ້ນເດືອນນີ້. ນັກການທູດຈີນທ່ານນຶ່ງກໍໄດ້ພົບປະກັບທ່ານ Mustafa Abdel Jalil ຜູ້ນໍາຂະ ບວນການຝ່າຍກະບົດເຊ່ນກັນທີ່ປະເທດ Qatar.