ກະຊວງການຄ້າຂອງ ຈີນ ໃນວັນອາທິດວານນີ້ ໄດ້ເປີດການສືບສວນ ໃນເລື້ອງ ການຕໍ່ຕ້າທຸ້ມເທວັດຖຸທີ່ເຮັດດ້ວຍສານປະກອບ ໂຄໂພລີເມີ ຫຼື POM ເຂົ້າໃນຕະຫຼາດ, ເຊິ່ງແມ່ນຢາງພລາສຕິກວິສະວະກຳຊະນິດນຶ່ງ, ທີ່ຖືກນຳເຂົ້າຈາກ ສະຫະພາບ ຢູໂຣບ, ສະຫະລັດ, ຍີ່ປຸ່ນ ແລະ ໄຕ້ຫວັນ ອີງຕາມລາຍງານຂອງອົງການຂ່າວ ຣອຍເຕີສ໌.
ພລາສຕິກດັ່ງກ່າວ ສາມາດໃຊ້ທົດແທນເຫຼັກສ່ວນນຶ່ງເຊັ່ນ ທອງແດງ ແລະ ສັງກະສີ ແລະ ຖືກໃຊ້ສຳລັບຫຼາຍຢ່າງລວມທັງອາໄຫຼ່ລົດຍົນ, ເຄື່ອງອີເລັກໂທຣນິກ ແລະ ການແພດ, ອີງຕາມການກ່າວໃນຖະແຫຼງການຂອງກະຊວງ.
ການສືບສວນສອບສວນຄວນແລ້ວສຳເລັດ ພາຍໃນນຶ່ງປີ ແຕ່ອາດຕໍ່ເວລາອອກໄປ 6 ເດືອນ, ອີງຕາມການກ່າວຂອງເຂົາເຈົ້າ.
ຄະນະກຳມາທິການຢູໂຣບ, ເຊິ່ງຄວບຄຸມນະໂຍບາຍການຄ້າຂອງສະຫະພາບຢູໂຣບ, ໄດ້ກ່າວວ່າ ເຂົາເຈົ້າຈະສຶກສາຢ່າງລະມັດລະວັງ ກ່ຽວກັບ ຫົວຂໍ້ຕ່າງໆຂອງການສືບສວນ ກ່ອນຕັດສິນໃຈ ກ່ຽວກັບບາດກ້າວຕໍ່ໄປໃດໆ.
ໂຄສົກທ່ານນຶ່ງໄດ້ກ່າວວ່າ “ພວກເຮົາຄາດວ່າ ຈີນຈະຮັບປະກັນວ່າ ການສືບສວນສອບສວນນີ້ ແມ່ນສອດຄ່ອງຢ່າງເຕັມທີ່ກັບກົດລະບຽບ ແລະ ພັນທະຂອງອົງການການຄ້າໂລກ (WTO).”
ການສືບສວນ ກ່ຽວກັບ ຢາງພລາສຕິກ ຂອງ ຈີນ ໄດ້ມີຂຶ້ນທ່າມກາງຄວາມຂັດແຍ້ງດ້ານການຄ້າທີ່ກວ້າງຂວາງກັບ ສະຫະລັດ ແລະ ຢູໂຣບ.
ສະຫະລັດ ໃນວັນອັງຄານທີ່ຜ່ານມາໄດ້ເປີດເຜີຍການຂຶ້ນພາສີຢ່າງຫຼວງຫຼາຍຕໍ່ລົດໄຟຟ້າຂອງ ຈີນ, ຫຼື EV, ໄມໂຄຊິບຄອມພິວເຕີ, ຜະລິດຕະພັນການແພດ ແລະ ສິນຄ້ານຳເຂົ້າອື່ນໆ.
ຟໍຣັມສະແດງຄວາມຄິດເຫັນ