ທາງການກະຊວງອຸດສະຫະກຳແລະການຄ້າຂອງລາວລາຍງານວ່າສະພາວະການຄ້າລະວ່າງລາວກັບຈີນໄດ້ມີມູນຄ່າເພີ່ມສູງຂື້ນຢ່າງຕໍ່ເນຶ່ອງໃນໄລຍະນຶ່ງທົດສະວັດມານີ້ ໂດຍສະເພາະແມ່ນໃນປີ 2009 ທີ່ຜ່ານມານີ້ ກໍປາກົດວ່າການຄ້າລະຫວ່າງສອງຝ່າຍມີມູນຄ່າລວມເກີນກວ່າ 744 ລ້ານໂດລາ ຫລືເພີ່ມຂື້ນເຖິງ 77 ເປີເຊັນ ເມື່ອທຽບໃສ່ປີ 2008.
ໂດຍໃນມູນຄ່າການຄ້າທັງໝົດດັ່ງກ່າວນັ້ນ ເປັນການສົ່ງອອກສິນຄ້າຂອງລາວໄປຈີນ ເຖິງ 367 ລ້ານຫລືຄິດເປັນອັດຕາສະເລັ່ຍທີ່ເພີ່ມຂື້ນຈາກປີ 2008 ເຖິງ 149 ເປີເຊັນ ໃນຂະນະທີ່ລາວເອງນຳເຂົ້າສິນຄ້າຈາກຈີນຄິດເປັນມູນຄ່າລວມ 377 ລ້ານ ຫລືຄິດເປັນອັດຕາສະເລ່ຍທີ່ເພີ່ມຂື້ນຈາກປີ 2008 ເຖິງ 44 ເປີເຊັນ ຊຶ່ງພາຍໃຕ້ສະພາວະການຄ້າທີ່ປັບຕົວສູງຂື້ນດັ່ງກ່າວນີ້ ກໍຍັງເຮັດໃຫ້ທາງການຂອງທັງສອງຝ່າຍໄດ້ສະແດງຄວາມເຊື່ອໝັ້ນວ່າມູນຄ່າການຄ້າລະຫວ່າງລາວກັບຈີນໃນ ຕະຫລອດຊ່ວງປີ 2010 ນີ້ຈະເພີ່ມຂື້ນເປັນຫລາຍກວ່າ 1000 ລ້ານໂດລາຢ່າງແນ່ ນອນ ເນຶ່ອງຈາກວ່າສະເພາະໃນຊ່ວງ 2 ເດືອນທຳອິດຂອງປີ 2010 ນີ້ ປາກົດວ່າ ການຄ້າລະຫວ່າງລາວກັບຈີນມີມູນຄ່າລວມເຖິງ 190 ລ້ານແລ້ວ ສາເຫດສຳຄັນທີ່ເຮັດໃຫ້ມູນຄ່າການຄ້າລະຫວ່າງລາວກັບຈີນເພີ່ມຂື້ນກໍຍ້ອນວ່າ ທາງການລາວກັບຈີນຖືວ່າທັງສອງປະເທດເປັນຫຸ້ນສ່ວນທາງຍຸດທະສາດການພັດທະ ນາທາງເສດຖະກິດເພື່ອເຮັດໃຫ້ປະຊາຊົນລາວ-ຈີນມີສະພາບຊີວິດການເປັນຢູ່ທີ່ດີຂື້ນເລື້ອຍໆ.
ຍິ່ງໄປກວ່ານັ້ນການທີ່ລາວເອັງກໍເປັນປະເທດສະມາຊິກຂອງກຸ່ມອາຊຽນທີ່ໄດ້ເລີ່ມລົງມືປະຕິບັດຕາມຂໍ້ຕົກລົງວ່າດ້ວຍເຂດການຄ້າເສລີລະຫວ່າງອາຊຽນກັບຈີນນັບແຕ່ຕົ້ນປີ 2010 ນີ້ ເປັນຕົ້ນມາແລ້ວນັ້ນ ກໍຍັງເຮັດໃຫ້ຜູ້ນຳລາວມີຄວາມເຊື່ອໝັ້ນວ່າການປະຕິບັດຕາມຂໍ້ຕົກລົງ ດັ່ງກ່າວນີ້ຈະສົ່ງຜົນດີຕໍ່ກ່ານພັດທະນາລາວໃນອະນາ ຄົດອີກດ້ວຍ.
ດັ່ງທີ່ທ່ານ ຈູມມະລີ ໄຊຍະສອນ ເລຂາທິການໃຫຍ່ພັກປະຊາຊົນປະຕິວັດລາວແລະ ປະທານປະເທດລາວໄດ້ຖະແຫລງເພື່ອຄວາມເຊື່ອໝັ້ນດັ່ງກ່າວໃນຕອນນຶ່ງວ່າ
"ເຂດການຄ້າເສລີລະຫວ່າງອາຊຽນ-ຈີນ ຈະນຳເອົາຜົນປະໂຍດຢ່າງຫລວງຫລາຍມາ ສູ່ອາຊຽນກັບຈີນ ພ້ອມກັນນັ້ນຍັງຈະເຮັດໃຫ້ບັນດາປະເທດມະຫາອຳນາດແລະກຸ່ມ ເສດຖະກິດຂະໜາດໃຫຍ່ຂອງໂລກພາກັນຫັນມາໃຫ້ຄວາມສົນໃຈແລະໃຫ້ຄວາມສຳ ຄັນໃນການພັດທະນາສາຍພົວພັນທາງເສດຖະກິດພແລະການຄ້າກັບປະເທດໃນເອ ເຊຍຕາເວັນອອກຫລາຍຂື້ນ ພວກຂ້າພະເຈົ້າຖືວ່າການຮ່ວມມືກັບຈີນເປັນການສ້າງກຳລັງແຮງໃຫ້ແກ່ຕົນທີ່ຈະຊ່ວຍໃຫ້ລາວມີຄວາມສະດວກຍິ່ງຂື້ນໃນການເຂົ້າຫາຕະຫລາດສິນຄ້າ ຕະຫລາດເທກນິກ ແລະເທກໂນໂລຈີ່ທີ່ກ້າວໜ້າ."
ສ່ວນກ່ຽວກັບສະພາວະການລົງທຶນຂອງຈີນຢູ່ໃນລາວນັ້ນ ທາງການລາວໂດຍກະຊວງແຜນການແລະການລົງທຶນ ກໍໄດ້ສະເໜີລາຍງານວ່າການລົງທຶນສະສົມຂອງ ຈີນຢູ່ໃນລາວມີມູນຄ່າລວມເກີນກວ່າ 3,577 ລ້ານໂດລາ ໂດຍເປັນການລົງທຶນໃນ 12 ພາກການຜະລິດດ້ວຍກັນ ແຕ່ວ່າພາກການຜະລິດທີ່ກຸ່ມທຶນຈີນໄດ້ໃສຫ້ຄວາມສຳຄັນຫລາຍເປັນພິເສດນັ້ນ ກໍຄືພາກການກະເສດ ອຸດສະຫະກຳບໍ່ແຮ່ ແລະພາກ ພະລັງງານໄຟຟ້າ ແລະລ່າສຸດນັ້ນ ທາງການຈີນກໍຍັງໄດ້ປະກາດແຜນການລົງທຶນສ້າງດາວທຽມເພື່ອປ່ອຍຂື້ນສູ່ວົງໂຄຈອນໃຫ້ກັບລາວໃນມູນຄ່າເຖິງ 250 ລ້ານສະຫະລັດອີກດ້ວຍ.
ໂດຍການລົງທືນຂອງຈີນທີ່ເປັນໂຄງການຂະໜາດໃຫຍ່ຢູ່ໃນລາວໃນເວລານີ້ ກໍຄືການຊື້ກິດຈະການເໜືອງແຮ່ຄຳແລະທອງແດງຢູ່ເຊໂປນ ການສ້າງເມືອງໃໝ່ສາມ ຫລ່ຽມຄຳ ຢູ່ເມືອງຕົ້ນເຜິ້ງໃນແຂວງບໍ່ແກ້ວ ການສ້າງເມືອງໃໝ່ China Town ຢູ່ໃນເຂດນະຄອນຫລວງວຽງຈັນ ແລະການຂຸດຄົ້ນບໍ່ແຮ່ບ໊ອກໄຊ້ຕ໌ ຢູ່ພາກໃຕ້ຂອງລາວ ສ່ວນຢູ່ເຂດພາກເໜືອນັ້ນ ກໍມີໂຄງການປູກຢາງພາຣາ ສາລີ ອ້ອຍ ເປັນຕົ້ນ ແລະຊາ ເປັນບໍລິເວນທີ່ກວ້າງກວ່າ 2 ແສນ ເຮັກຕ້າ ຊຶ່ງກໍເຮັດໃຫ້ການລົງທຶນຂອງ ຈີນຢູ່ໃນລາວໄດ້ແຊງໜ້າໄທຂື້ນມາເປັນອັນດັບ 1 ຢ່າງເປັນທາງການແລ້ວໃນປັດຈຸບັນນີ້.